Leh 32 thŭn mkŏ mjing, truh ară anei, Lào Cai dôk hlăm êpul mrô sa hlăm 14 čar krĭng čư̆ čhiăng kwar Dưr. Hnơ̆ng đĭ kyar bruă duh mkra kah knar giăm 10%/thŭn; ênoh hrui mâo ngăn prăk knŭk kna hlăm alŭ wăl mâo êbeh 10 êbâo êklai prăk; ênoh gŏ êsei ƀun hrŏ pral, mơ̆ng 54,8% (1991) trŭn 19,3%.  Hlăm bruă hriăm lehanăn hluê ngă msĕ Awa, bruă Đảng lehanăn mnuih ƀuôn sang dŭm djuê ana Lào Cai pral tui ksiêm, mâo hdră ngă jăk hŏng bruă hnưm ba mdah klei kčah mtrŭn, hưn mthâo gru mngač kơ phung knuă druh kiă kriê, mâo klei kčah mtrŭn hjăn hlăm bruă hriăm lehanăn hluê ngă asăp Awa hnưm hĭn mơ̆ng kluôm ala.

Grăp thŭn, ba mdah nanao hdră bi mklă puăng hlăm bruă hriăm lehanăn hluê ngă asăp Awa. Mơ̆ng thŭn 2016 truh ară anei, Lào Cai bi mni leh kơ 3.356 êpul, mnuih mâo boh tŭ hlăm bruă hriăm lehanăn hluê ngă asăp Awa. K’iăng khua lăn čar Võ Thị Ánh Xuân mtă, bruă Đảng čar Lào Cai brei mâo dŭm hdră msir kjăp hĭn kñăm mđĭ lar ai ktang hgŭm mguôp, mâo hdră mtrŭn, hdră kčah djŏ guôp lehanăn krŭ wĭt ai tiê čŏng pô gĭr ktưn, si srăng ngă čiăng kơ mnuih ƀuôn sang dŭm djuê ana mđĭ kyar mđrăm mbĭt lehanăn dưi dưn dŭm hdră mtrŭn mđĭ kyar mơ̆ng lăn čar./.