“Bruă klei mrâo năng bi pral hĭn, êmăt hĭn, klă mngač hĭn, kjăp hĭn lehanăn djŏ hŏng klei jing sĭt hĭn”. Anăn yơh jing klei k’iăng khua knŭk kna Trần Hồng Hà blŭ ti bi kƀĭn bruă klei mrâo akŏ yan mnga Quý Mão 2023 mâo mkŏ mjing aguah 31/1, ti Hà Nội. Klei anei mâo Dhar bruă kiă kriê klei hâo hưn gưl dlông, Phŭn bruă hâo hưn, Êpul hgŭm phung ngă bruă klei mrâo Việt Nam lehanăn hră klei mrâo Nhân dân mkŏ mjing. Mbĭt hŏng anăn lŏ mâo phung khua kiă kriê dŭm anôk bruă klei mrâo, phung ngă bruă klei mrâo khua thŭn, lehanăn lu phung čih klei mrâo, dăp hdră bruă klei mrâo...

Ti anôk bi kƀĭn Khua kiă kriê kơ bruă klei mrâo gưl dlông hlăm Dhar bruă kiă kriê klei hâo hưn gưl dlông Tống Văn Thanh lač: Dlăng kluôm jih jang bruă klei mrâo hlăm wưng Tết Quý Mão 2023 mâo duh bi liê hŏng klei ƀhĭ klĭ, lu hdră êlan, mjing lu jơr hnơ̆ng kjăp, mâo bi êdah hlăm djăp mta, êdah êdi jih jang klei čih kơ bruă klei mrâo yan anei Mơăk Đảng, mơak yan mnga, hơ̆k mơak kơ lăn čar kjăp knhuang čhuang nao găn klei dleh dlan, kơrŭ wĭt bruă duh mkra leh klei ruă tưp , bi hdơr kơ khua gĭt gai Hồ Chí Minh kdrăm k'ah, mâo klei jưh knang, klei êpa mhao kơ ai tiê bi mguôp jhŏng ktang mơ̆ng jih jang djuê ana Việt Nam.