Hlăm Klei bi kƀĭn gưl dlông ASEAN+3 tal 26, dŭm tĭng bi mklă hnơ̆ng yuôm bhăn mơ̆ng klei bi hgŭm ASEAN+3 hŏng klei êđăp ênang, hơ̆it kjăp leh anăn đĭ kyar. Khua gĭt gai ASEAN+3 bi tŭ bi hgŭm pŏk ngă tŭ dưn Hdră kčah bi hgŭm ASEAN+3 wưng 2023-2027, hlăm anăn mđĭ lar klei găl bi hgŭm kơ bruă duh mkra, mnia blei, ngăn prăk, mdrao mgŭn… leh anăn pŏk mlar dŭm bruă bi hgŭm mrâo, kƀĭn hlăm hdră mlih mrâo, rơ̆ng djăp mnơ̆ng ƀơ̆ng huă, bi mlih êa pui êwa čuh, kƀĭn mlih mrâo mbruă, klei bi mlih yan adiê… mđing truh mđĭ kyar kluôm leh anăn kjăp. Khua knŭk kna Phạm Minh Chính čang hmăng ASEAN+3 srăng mâo bruă klam jăk, tŭ dưn hlăm hdră kčĕ dŭm hdră msir dưi hlue ngă, hrăm mbĭt hgao klei dleh dlan, lông dlăng ară anei.

Hlăm Klei bi kƀĭn gưl dlông ASEAN-Mi tal 11, K’iăng Khua mil čhil Kamala Harris bi mklă Mi ƀuăn rơ̆ng ktang leh anăn sui hŏng ASEAN leh anăn krĭng wăl, nao ai hŏng ASEAN ngă bruă klam phŭn, mñă klă dua tĭng bi kah mbha klei tŭ dưn, mđing leh anăn hnơ̆ng trah dlăng sui, hrăm mbĭt mdrơ̆ng hŏng klei lông dlăng mbĭt.

Hlăm Klei bi kƀĭn gưl dlông ASEAN-Canada, dŭm tĭng ăt bi tŭ ư bi mklă Klei mĭn mbĭt klă sĭt mkŏ mjing klei bi hgŭm yuôm bhăn ASEAN-Canada. Hruê anei 7/9/2023, Khua gĭt gai dŭm ala čar srăng nao hlăm Klei bi kƀĭn gưl dlông ASEAN hŏng India leh anăn Klei bi kƀĭn gưl dlông Ngŏ Asi (EAS).

Nah êngao klei bi kƀĭn 6/9, Khua knŭk kna Phạm Minh Chính bi tuôm hŏng Khua knŭk kna Canada Justin Trudeau, Khua knŭk kna Japon Kishida Fumio, bi tuôm hŏng Khua mil čhil Dhŭng Korea Yoon Suk Yeol leh anăn Khua knŭk kna China Lý Cường.