Aguah 9/8, ti ƀuôn prŏng Nha Trang, čar Khánh Hòa, Sang mđung asăp blŭ Việt Nam, Anôk bruă hâo hưn Gưl dlông, Dhar bruă kđi čar lĭng kahan yang ƀuôn Việt Nam - Phŭn bruă lĭng kahan leh anăn Knơ̆ng bruă sang čư̆ êa čar Khánh Hòa mkŏ mjing Hdră bi kƀĭn hŏng phung čih klei mrâo, hâo hưn kơ Hdră kđi čar kdŏ mmuiñ “Ktang mdrŏng mơ̆ng êa ksĭ ƀuôn sang”.

Anei jing hdră kdŏ mmuiñ mâo hnơ̆ng ala čar kñăm mđĭ ai tiê ktưn hưn, mpŭ kơ djuê ana, klei gĭr răng mgang klei dưi hlăm êa sĭ, plao ksĭ čar kwar, leh anăn lŏ dlăng wĭt boh tŭ hlue ngă Hdră mtrŭn Klei bi kƀĭn tal XIII mơ̆ng Đảng hlăm krĭng êa ksĭ, plao ksĭ mơ̆ng akŏ wưng truh ară anei. Hdră mkŏ mjing hlăm 8 mmông mmăt hruê 12/8 kơ anăp mâo 3 boh phŭn hŏng akŏ: “Thâo săng kơ êa ksĭ”, “Việt Nam mđing kơ bruă mdrŏng mơ̆ng êa ksĭ”, “Việt Nam mđing kơ klei ktang kơ êa ksĭ”.  Hlăm mmông bi kƀĭn hŏng phung čih klei mrâo, Phạm Mạnh Hùng, K’iăng Khua Knơ̆ng bruă Sang mđung asăp blŭ Việt Nam, K’iăng Khua Anôk bruă gĭt gai, Khua Anôk bruă mkŏ mjing Hdră kdŏ mmuiñ “Mdrŏng Ktang mơ̆ng êa ksĭ ƀuôn sang” bi mklă Việt Nam jing ala čar êa ksĭ hŏng klei čang hmăng lă lar mdrŏng sah mơ̆ng êa ksĭ leh anăn răng mgang klei êđăp ênang hlăm êa ksĭ, kñăm mđĭ ai tiê ktưn hưn, mpŭ kơ djuê ana, jih ai tiê răng mgang klei dưi hlăm êa ksĭ, plao ksĭ čar Kwar, mđĭ klei thâo răng mgang leh anăn mđĭ lar lu jơr mnơ̆ng dhơ̆ng mơ̆ng êa ksĭ, plao ksĭ  Việt Nam.