Hlăm wưng dôk čhưn, Tập Cận Bình mâo leh klei bi blŭ hrăm hŏng phung khua prŏng hĭn mơ̆ng Đảng, bruă kƀĭn ala, Knŭk kna Việt Nam. Dua nah bi tŭ ư mđĭ hĭn klei bi hgŭm Việt Nam – China. Bi tŭ ư mđĭ hĭn bruă klam hlue ngă klei kuôl kă hgŭm duh mkra kluôm dhuôm hlăm alŭ wăl (RCEP) lehanăn klei kuôl kă mnia mblei êngiê ASEAN - China (ACFTA) mtrŭt klei mnia mblei dua nah đĭ kyar hlăm klei bi knar.

Mđĭ hĭn klei mă bruă bi djŏ hŏng klei bhiăn lu tĭng, msĕ si mơ̆ng êpul hgŭm lu ala čar, klei bi hgŭm duh mkra mnia mblei Asi – Pacific (APEC), Klei bi hgŭm Asi - Ơrôp (ASEM), Êpul hgŭm dŭm ala car ngŏ dhŭgn Asi (ASEAN), bi đru hdơ̆ng găp hlăm dŭm bruă hŏng ala tač êngao. Dua nah ăt bi tŭ ư ksiêm dlăng lehanăn ruh mgaih lu mta klei amâo mâo thâo bi djŏ hlăm klei bi hgŭm plah wah Việt nam – China.

Hlăm klei hriê čhưn anei, mâo kuôl kă leh klei hgŭm hlăm bruă mkŏ bi hluh mbĭt êlan klông jing êlan dơ̆ng lehanăn êlan êdeh treng, ksiêm wĭt bruă čhĭ mnia găn knông lăn, klei bi mnia mblei boh mnga bruă lŏ hma, bruă lĭng kahan, bruă kreh knhâo, bruă dhar kreh , mjuăt asei mlei bruă sang hră mơar, lehanăn kơ klei hdĭp mda mnuih ƀuôn sang, bi hgŭm bruă hâo hưn, lehanăn dŭm alŭ wăl… Khua gĭt gai Tập Cận Bình lač jăk klei tŭ drông jăk siam hlăm klei bi đru bi hgŭm lehanăn mâo asăp jak iêo khua gĭt gai Đảng Tô Lâm lehanăn khua lăn čar Lương Cường pral mâo wưng nao čhưn kơ China./.