Dŭm hruê akŏ yan mnga Ất Tỵ, sang măi mơ̆ng kmơ̆ng bruă tă kčoh Able Joy hŏng 4.500 čô mă bruă ti wăl anôk bruă tuh tia Hoà Phú (Dak Lak) mă bruă jih hnơ̆ng. Trần Trí Vĩ, khua kiă knơ̆ng bruă brei thâo, kmơ̆ng bruă mĭ tĭng srăng duah thiăm 1000 čô mnuih mă bruă čiăng rơ̆ng mkra mjing djăp 7 êklăk mnơ̆ng dhơ̆ng hluê si hră kuôl kă:

 “Truh kơ wưng anei, klei kuôl kă mnơ̆ng dhơ̆ng knơ̆ng bruă 2025 bŏ jih leh. Ăt hmăng hmưi Dak Lak lŏ mâo sang anôk čiăng pŏk mlar klei đĭ kyar. Dlăng kơ Dak Lak kơ hnơ̆ng tŭ jăk leh anăn anak mnuih adôk lu êdi.”

Sa klei bi knăl jăk mkăn jing čar Dak Lak mrâo dưi bi lông čhĭ tŭ jing wăl lăn sang êa drao hđăp (mrô 02 Mai Hắc Đế) hrui wĭt 568 êklai prăk. Anôk anei srăng dưi mđĭ kyar jing sa anôk bruă mnia mblei leh anăn wăl sang dôk gưl dlông, hŏng ênoh duh bi liê thŭn 2025 mĭn tĭng 1.300 êklai prăk. Anei amâo knŏng jing klei găl mtrĭt mđĭ klei đĭ kyar ngăn prăk ƀiădah lŏ mđĭ hnơ̆ng bruă mkŏ mkra leh anăn hnơ̆ng hdĭp ti ƀuôn prŏng Ƀuôn Ama Thuôt. Bùi Văn yên, khua knơ̆ng bruă ngăn prăk čar Dak Lak mñă klă:

 “Mphun kơ ênoh hrui wĭt anei jing klei năng mơak, mkŏ mjing tur knơ̆ng kơ drei ba yua ngăn prăk, boh nik jing prăk hrui wĭt mơ̆ng lăn thŭn 2025 anei. Yuôm hŏng phung duh bi liê jing knơ̆ng bruă mâo ai dưi dôk mjêč ngă hdră anei. Mĭn tĭng hlăm wang 3 thŭn hdră srăng dưi bi leh, boh nik hlăm thŭn anei ênoh prăk duh bi liê lu, ñu đru mtrŭt mđĭ bruă duh mkra mơ̆ng čar.”

Khădah mâo dŭm klei bi knăl jăk, ƀiădah čiăng mâo mta kñăm đĭ kyar 8%, čar Dak Lak srăng pral ruh mgaih dŭm klei dleh kpăk hlăm bruă kriê dlăng. Tal êlâo jing mkra mlih hdră čuăl mkă, hdră êlan yua lăn, mjêč hluê ngă klei čuăk mkă čar dưi bi klă, mgaih msir dŭm klei kpăk gun djŏ tuôm hŏng bruă kriê dlăng, yua lăn mâo phŭn mơ̆ng đang čư̆ dliê. Mbĭt hŏng anăn jing mtrŭt bi hmar klei brei čan duh bi liê bruă knŭk kna.

Hluê si Nguyễn Hoài Dương, khua knơ̆ng bruă lŏ hma leh anăn mđĭ kyar krĭng ƀuôn sang, čar čiăng pral bi hơĭt klei ngă hră mơar knŭk kna:

 “Boh klei iêo jak klei duh bi liê, kâo ƀuh čăng êdi, ară anei drei srăng ngă klă klơ̆ng, wăt hlăm bruă lŏ hma, hlăm mkra mjing drei lui leh lu klei găl mơ̆ng phung duh bi liê hriê tinei. Diñu bi lač klei ngă hră mơar knŭk kna mơ̆ng čar Dak Lak dleh êdi. Drei srăng ksiêm wĭt mtam leh anăn bi klă amâo djŏ knŏng knơ̆ng bruă hdră êlan ƀiădah bruă klam dŭm knơ̆ng, dhar bruă, dŭm alŭ wăl mkăn ya srăng ngă čiăng iêo jak klei duh bi liê.”

Phạm Ngọc Nghị, Khua bruă sang čư̆ êa čar Dak Lak brei thâo, čiăng mâo mta kñăm đĭ kyar 8%, čar čiăng mđing hluê ngă dŭm hdră êlan hrăm mbĭt leh anăn ktang phĭt. Êlâo hĭn, mlih mrô hră mơar knŭk kna jing klei mđing tal êlâo. Mđĭ kyar bruă mkŏ mkra jing mta kmeh gơ̆ng. Êngao kơnăn, mtrŭt mđĭ klei duh bi liê hluê hdră knŭk kna, êngao knŭk kna jing sa hdră êlan yuôm bhăn, iêo jak ai dưi mơ̆ng êngao knŭk kna, bi hrŏ klei ktrŏ kơ ngăn prăk knŭk kna, mbĭt anăn mkŏ mjing bruă mă leh anăn mđĭ kyar bruă mkŏ mkra. Mbĭt hŏng anăn, čar srăng mtrŭt mđĭ bruă mkra mjing boh mnga bruă lŏ hma, bruă tuh tia nah tluôn, čiăng mđĭ ênoh boh mnga bruă lŏ hma, mkŏ mjing boh kđrŭt đĭ kyar hơĭt kjăp. Mbĭt anăn, mđĭ kyar dŭm mta bruă msĕ si bruă hiu čhưn ênguê, ngăn prăk…čiăng bi lu jơr bruă duh mkra. Phạm Ngọc Nghị lač:

            “ Kñăm gĭt gai bi kna bruă hrui wĭt leh anăn bi liê ngăn prăk, mbruă, tŭ dưn rơ̆ng kơ klei bi kna prŏng mơ̆ng bruă duh mkra. Mtrŭt bi pral klei brei čan duh bi liê bruă knŭk kna leh anăn hluê ngă tŭ dưn 3 hdră ala čar kñăm, ƀuah mkra dŭm klei ngă soh hlăm klei duh bi liê. Hmao ruh mgaih klei dleh dlan kơ knơ̆ng bruă phung duh bi liê, kñăm duh bi liê bruă mkrŏ mkra hlăm wăl anôk tuh tia mơ̆ng čar kñăm iêo jak phung duh bi liê hlăm leh anăn êngao lăn čar.”

Hŏng klei gĭr, klei sa ai mơ̆ng bruă sang čư̆ êa leh anăn êpul êya knơ̆ng bruă, Dak Lak dưi mâo mta kñăm đĭ kyar 8% hlăm thŭn 2025. Yuôm hĭn kơnăn jing klei anei srăng mkŏ jing boh kdrŭt kơ klei đĭ kyar ktang hlăm wưng kơ anăp, čiăng kơ čar Dak Lak năng jing knơ̆ng anôk bruă duh mkra mơ̆ng Lăn Dap Kngư.