Hrue mbrue 21/2, ti Ƀuôn prŏng Hồ Chí Minh mkŏ mjing leh klei bi tuôm gưl dlông plah wah Phŭn bruă kđi čar Đảng Cộng sản Việt Nam lehanăn êpul khua kiă kriê bruă Đảng Yang ƀuôn Campuchia (CPP) mâo Khua gĭt gai Đảng Cộng sản Việt Nam Tô Lâm lehanăn khua kiă kriê CPP, Hun Sen mđrăm mbĭt kiă kriê. Anei jing klei bi kƀĭn kñăm hyuă kjăp hĭn klei bi mguôp dua ala čar nao hlăm klei kluôm ênŭm, kjăp plah wah dua Đảng, dua knŭk kna lehanăn mnuih ƀuôn sang dua ala čar Việt Nam - Campuchia hlăm boh klei mrâo.

 Ti Anôk bi tuôm, Khua gĭt gai Đảng Tô Lâm lehanăn khua kiă kriê  CPP Hun Sen bi hưn mthâo leh bruă knuă mơ̆ng mdê bi Đảng, grăp ala čar, bi trông kơ boh klei dlông rŏng lăn, lehanăn hlăm alŭ wăl, ksiêm wĭt boh tŭ dưn klei bi hgŭm dua nah wưng leh êgao, lehanăn lŏ bi tŭ ư hdră êlan hlăm wưng tinăp. Dua čô khua kiă kriê mâo leh klei bi tŭ ư lŏ dơ̆ng hlue ngă dŭm klei gưl dlông dua ala čar bi trông leh, kñăm hyua kjăp hĭn bruă răng mgang klei êđăp ênang, bi hgŭm bruă duh mkra mnia mblei, bruă dhar kreh, bruă sang hră mơar, bruă hiu čhưn ênguê, dưn yua jih klei găl mơ̆ng grăp lăn čar, ciăng kơ dua nah mă bruă tŭ jing hĭn hlăm jih jang dŭm anôk bruă Đảng, bruă kƀĭn ala lehanăn dŭm phŭn dhar bruă, dŭm alŭ wăl dua ala čar mjing gru kruak knăl hlăm klei mđĭ kyar mrâo, duh kơ klei tŭ dưn kơ mnuih ƀuôn sang dua ala čar.

 Ti anôk bi tuôm, Khua knŭk kna Phạm Minh Chính lehanăn khua knŭk Hun Manet bi tŭ ư hlue ngă pral hlăm wưng tinăp, mkŏ wĭt bruă duh mkra Việt Nam – Campuchia, lehanăn 3 klei duh mkra Việt Nam, Campuchia lehanăn Lào.