Klei mĭn mơ̆ng hmei hlăm grăp mnĭt mmông yuôm bhăn anăn dleh êdi dưi hưn mdah klă. Dŭm kdrăn mblah kdrưh kơăm mơ̆ng aê ama pô êlâo, mơ̆ng phung kahan cách mạng, mơ̆ng mnuih ƀuôn sang drei, ƀrơ̆k bhiâo riâo rĭt msĕ si mâo hlăm klei mĭn hmei. Phung roh hŏng ala čar, klei ngêñ hlăm grăp čô ngă kơ hmei hĭn mơh lŏ mâo ai ktang. Hmei wơr hĕ hmei jing tlâo pluh pă čô mnuih hŏng kdrăp phao ktuang đ’điêt, ƀiădah dlăng anei jing sa êpul kahan jhŏng ktang, kjăp, ai ktang amâo mâo pô dưi bi kdơ̆ng, mprăp bi rai jih phung roh. Đăo knang, mgei ai tiê…

 Mơ̆ng dliê Trần Hưng Đạo lehanăn dua să Tam Kim, Hoa Thám (kdriêk Nguyên Bình), hmei nao ti să Minh Tâm – anôk dôk mơ̆ng gŏ sang Dương Mạc Thăng, Khua bruă Đảng hđăp čar Cao Bằng (anak Dương Mạc Thạch, jing Xích Thắng – Pô mă bruă kđi čar tal êlâo mơ̆ng Êpul Việt Nam Tuyên truyền Giải phóng quân).

Drông hmei hlăm sa boh sang điêt, Thăng lač, anôk anei sui hŏng anei knŏng mâo dŭm gŏ sang hriê dôk, djiêu gah jing dliê kmrơ̆ng, hlô mnơ̆ng. Gŏ sang Dương Mạc Thạch msĕ si kđông kahan êđăp ênang čiăng kơ phung knuă druh mơ̆ng Đảng mă bruă cách mạng. Tinei ƀuh leh dŭm mnĭt mmông hƀuê ênuk, jing anôk Awa Hô tuôm 2 blư̆ truh gĭt gai hdră mă bruă, Đại tướng Võ Nguyên Giáp ăt tuôm hgĭp lehanăn nao hgŭm hlăm lu hdră bruă kyua anăn ñu hnưm thâo kơ cáh mạng, jing knuă druh ba akŏ ti alŭ wăl. Dương Mạc Thăng lŏ hdơr klei amĭ ama yăl dliê kơ hruê mkŏ mjing Êpul Việt Nam Tuyên truyền Giải phóng quân; kơ mmông huă êsei kba amâo mâo hra, bi êdah klei gĭr ktưn lehanăn ai tiê ƀĭng kahan tŭ ku klei dleh knap.

“Awa Giáp bi trông hŏng Knơ̆ng gĭt gai, mmông huă tal êlâo jing êsei kba amâo mâo hra, amâo mâo djam, kyua tơ bi mklă mŭt hlăm êpul, wăt êdei anei nao kdơ̆ng mblah srăng mâo mmông dleh dlan, đa đa amâo mâo mnơ̆ng ƀơ̆ng huă, kyua anăn čiăng bi êdah klei gĭr ktưn lehanăn mprăp ai tiê hgao jih. Hluê si ama kâo yăl dliê, leh wĭt mklin sa anôk, phung hgŭm hlăm êpul đa čhum ao tĭ, đa amâo mâo djăp čhum ao. Bi mĭn, mmông anăn gơ̆ ê’ăt hĭn mkă hŏng ară anei ƀiădah phung kahan knŏng mâo 1 blah čhum ao, dưi hgao wưng ê’ăt anăn ăt jing klei gĭr prŏng, jŏng êdi.

Kơ mnĭt mmông hƀuê ênuk anei, Đại tướng Võ Nguyên Giáp čih snei: Ti krah yan pui adiê ê’ăt sriêt. Hlăm sa krĭng lăn prŏng ti krĭng čư̆ dliê lehanăn ana kyâo mtâo prŏng. Êpul Việt Nam Tuyên truyền Giải phóng quân gưl tal êlâo dưi bi mƀĭn ti gŭ hla čhiăm gru hrah. Bi ala bruă Đảng čar Cao - Bắc - Lạng mbĭt hŏng lu phung bi ala mnuih ƀuôn sang

Tày, Nùng, Mán mơ̆ng dua čar Cao Bằng lehanăn Bắc Kạn nao, dăp jing dua pruê̆ djiêu phung kahan. Kâo dưi bi ala Êpul hưn mthâo mkŏ mjing Êpul Việt Nam tuyên truyền Giải phóng quân lehanăn bi mklă bruă klam mơ̆ng Êpul hŏng Ala čar.

Ti Anôk bi kƀĭn kahan ƀuôn, kahan ba anăp, Kahan mnah mdăp kluôm ala tal sa dưi mkŏ mjing ti kdriêk Định Hóa, čar Thái Nguyên hruê 24/5/1947, bruă Kahan knơ̆ng gĭt gai lĭng kahan ala čar lehanăn kahn ƀuôn Việt Nam hưn mthâo leh Asăp mtrŭn mơ̆ng Knŭk kna ba mdah “Pluh klei ƀuăn” lehanăn “Pluh dua klei ƀuah mkra hlăm hdră đru čung ba mnuih ƀuôn sang” mơ̆ng êpul kahan ƀuôn, kahan ba anăp, kahan mnah mdăp. Leh kơnăn, knăm ƀuăn rơ̆ng dưi mkŏ mjing. Pluh klei ƀuăn rơ̆ng mâo leh Võ Nguyên Giáp răk kwang mbĭt hŏng kngan yơr phă dlông blŭ kwang: Kâo ƀuăn… kâo ƀuăn.

Mta phŭn mơ̆ng 10 klei ƀuăn, anăn jing sĭt suôr hŏng Ala čar, hŏng Đảng, hŏng mnuih ƀuôn sang, mprăp kdơ̆ng mblah săn asei ti gŭ hla čhiăm gru mơ̆ng Ala čar. Anăn jing ai ktang yuôm bhăn, mñă klă klei hgŭm mguôp, klei gĭr, hdră kdơ̆ng mblah, amâo uêñ săn asei, dleh knao gĭr răng mgang klei êđăp ênang, hnŭk êngiê mơ̆ng Lĭng kahan Trường Sơn, Kơiăng khua hđăp Adŭ ksiêm hriăm kơ hƀuê ênuk, Sang hră Đảng Tổng cục Hậu Cần, thŭn anei 95 thŭn lač, pô myun dưi nao hlăm êpul kahan mơ̆ng thŭn 1946 lehanăn găn 2 hdră kdơ̆ng mblah mơ̆ng djuê ana. Jih klei hdĭp ngă kahan đru leh kơ ñu thâo săng hĭn kơ klei yuôm bhăn mơ̆ng 10 klei ƀuăn.

 “10 klei ƀuăn mơ̆ng Lĭng kahan snăn klei yuôm bhăn hĭn jing sĭt suôr, mâo klei bi mjĕ plah wah êpul kahan hŏng Đảng, ŏng mnuih ƀuôn sang. Truh kơ ară anei hŏng Đảng, ăt bi êdah jing sa êpul sĭt suôr hĭn, klei sĭt suôr anăn truh kơ jih klei hdĭp, hŏng phung kahan. Hmei truh ti kdrăn mblah kwar Dhŭng thŭn 1968, mmông anăn bi mklă mŭt hlăm kdrăn mblah amâo čang hmăng hruê wĭt ôh, ya klei mtrŭt pô nao kdơ̆ng mblah? Yuôm bhăn hĭn jing klei đua klam hŏng Đảng, hŏng mnuih ƀuôn sang, hŏng klei êđăp ênang êngiê mơ̆ng Ala čar”…

Năng hŏng klei ƀuăn anăn, mơ̆ng sa êpul kahan mâo 34 čô, lĭng kahan drei ƀrư̆ dưi mkŏ mjing, đĭ kyar. Ară anei, ti gŭ jơ̆ng Slam Cao, 10 klei ƀuăn dưi kđăm mkra ti pŏk mdhă wăl knhuah gru anôk mkŏ mjing Êpul Việt Nam Tuyên truyền giải phóng quân. Trung tá Nguyễn Ngọc Quân, Pô mă bruă kđi čar Lĭng kahan răng mgang knông lăn Quang Long, Knơ̆ng gĭt gai Lĭng kahan răng mgang knông lăn Cao Bằng bi mklă:

 “Grăp knăm sa grăp hruê kăm, ti gŭ hla čhiăm gru kdrưh kơăm mơ̆ng ala čar, dưi răk kwang klei ƀuăn mơ̆n lĭng kahan, hmei, grăp čô kahan hlăm LĬng kahan yang ƀuôn Việt Nam ƀuh ktưn hưn êdi. Kâo pô mbĭt hŏng ƀĭng kahan hlăm êpul hdơr nanao, mơ̆ng anăn gĭr hluê ngă jăk bruă đua klam ti grăp anôk bruă, hgŭm mguôp, sa ai, gĭr msir mghaih jih klei dleh dlan, suaĭ êmăn bi leh jih bruă klam mâo kčah jao.

Hŏng 34 čô kahan tal êlâo lehanăn jing êpul mơ̆ng Lĭng kahan yang ƀuôn Việt Nam, 10 klei ƀuăn rơ̆ng yuôm bhăn dưi kđăm leh hlăm ai tiê grăp čô knuă druh, lĭng kahan. Amâo djŏ jing lĭng kahan kdơ̆ng mblah, păn kjăp kiê kngan răng mgang krĭng lăn, krĭng êa ksĭ, krĭng adiê mơ̆ng Ala čar, diñu lŏ hruê mlam ba wĭt klei hdĭp trei mđao, yâo mơak, hơĭt ênang kơ mnuih ƀuôn sang. Boh nik, hlăm dŭm klei truh mơ̆ng yan adiê ngă, klei ruă tưp, dŭm êbâo čô knuă druh, lĭng kahan amâo uêñ săn asei nao răng mgang mnuih ƀuôn sang, hluê ngă kluôm ênŭm klei ƀuăn, lŏ bi msiam pŏk rup hla čhiăm gru kdrưh kơăm mơ̆ng Đảng, mnuih ƀuôn sang kčah jao…/.