K’Châu, mnuih djuê ana K’Ho (ti alŭ 2, să Lộc Nam, Kdriêk Bảo Lâm, čar Lâm Đồng) brei thâo, gŏ sang ñu mâo anăn čiăng tŭ mă 25,5 ha lăn dliê ti čuê mrô 5, wăl dliê mrô 491, leh anăn gŏ sang aduôn Ka Phấn ăt bi klă leh anăn mâo anăn čiăng tŭ mă 16,5 ha ti wăl dliê mrô 491. Ƀiădah klă sĭt 2 čô anei amâo mâo mă sa mta čuê dliê ôh.

“Dliê yang ƀuôn hmei mâo hdră anăn ƀiădah arăng amâo mâo jao ôh. Êlâo dih, anôk amiêt K’Hân lač: Ih mâo hlăm hdră anăn jao lăn dliê. Kâo bi klă hră mơar kuôl kă. Leh anăn ñu lŏ lač: bi klă khă bi mâo đuč, ya ih dưi pla hĕ dliê. Jao dliê ƀiădah amâo mâo thâo ti anôk jao. Ya gơ̆ jao deh thâo hĕ!”.

Hluê si hră anăn yang ƀuôn êpul mă bruă răng mgang dliê mâo Knơ̆ng bruă lŏ hma leh anăn mđĭ kyar krĭng ƀuôn sang bi klă mâo K’Đản jing khua êpul, ti alŭ 1 leh anăn 13 gŏ sang ti alŭ 2 leh anăn alŭ 4 mơ̆ng să Lộc Nam. Ƀiădah amâo mâo thâo ôh ya ngă bruă sang čư̆ êa kdriêk Bảo Lâm mâo klei bi klă jao dliê kơ Nguyễn Duy Minh, anôk ti mrô sang 29, êlan Tô Hiệu, ƀuôn hgŭm Lộc Sơn, ƀuôn prŏng Bảo Lộc jing pô bi ala. Leh anăn êpul yang ƀuôn anei mơ̆ng Nguyễn Duy Minh bi ala knŏng mâo mă 6 gŏ sang, amâo mâo djŏ 14 gŏ sang msĕ hŏng hdră kčah. Kluôm ênhă dliê dưi jao jing 209ha, hlăm anăn dliê mâo 93ha, lăn dliê amâo mâo kyâo jing 116ha. Lu phung dưi jao dliê hlăm êpul anei mâo hră gŏ êsei ti anôk mkăn, leh anăn ăt kăn djŏ mnuih djuê ƀiă lei.

Dliê leh anăn lăn dliê tinei ƀrư̆ ƀrư̆ jing đang boh kroh, đa đa lŏ čhĭ kơ pô mkăn leh anăn mdơ̆ng sang. Hluê si knơ̆ng bruă lŏ hma leh anăn mđĭ kyar krĭng ƀuôn sang čar Lâm Đồng, truh kơ mlan 9/2019, hlăm 93ha dliê hrông jao kơ êpul yang ƀuôn anei kriê dlăng, luč hơăi mang 73ha. Võ Thiên Bình, khua bruă sang čư êa čar Lộc Nam mñă klă, phŭn agha bi rai dliê, ksĭng mmiă lăn dliê kyua jao amâo mâo djŏ pô.

“Bruă jao lăn, jao dliê hlăm wưng êgao ti alŭ wăl mâo dŭm klei ngă soh. Ară anei anôk bruă kahan ksiêm dôk ksiêm duah, bi klă boh klei anei. Bruă kriê dlăng, răng mgang dliê mơ̆ng phung pô dliê dôk mâo lu klei êdu kƀah, klei soh. Mâo klei ngă soh kyua jao amâo mâo djŏ pô.”

Hruê 8/7/2022, Lê Văn Ba ti alŭ 4, să Lộc Phú hmao ƀuh 3 čô jing Nguyễn Đức Dạo, Nguyễn Đức Chung leh anăn Nguyễn Văn Dũng dôk druôm kyâo dliê ti čuê mrô 5, wăl dliê 438A. Lê Văn Ba mâo êpul phung anăn čăm biêng tơl êka truh 12%. Anôk bruă phat mkra kdriêk Bảo Lâm kčŭt hưn leh 2 čô jing Nguyễn Đức Dạo leh anăn Nguyễn Đức kơ klei “Čŏng ngă klei bi êka”. Lê Văn Ba ăl ngêñ êdi kyua 3 čô anei čăm biêng, ƀiădah knŏng kčŭt hưn mă 2 čô. Bruă bi rai dliê mơ̆ng êpul anei anôk bruă djŏ tuôm amâo mâo bơ̆k bâo ôh.

“Mjhua bruă knŭk kna jao dliê čiăng čhĭ dliê, bi rai dliê, bi rai kyâo dliê lu sơnăk. Kâo hmao ƀuh lu klei ngă soh, kâo kčŭt hưn leh. Khua gĭt gai kdriêk Bảo Lâm, Nguyên Trung Kiên mâo klei bi klă hrui wĭt jih kluôm ênhă dliê anăn wĭt jao kơ êpul kriê dlăng dliê akŏ êa Dam Bri kriê dlăng. Ƀiădah ară anei, dŭm klei ngă soh mâo bruă sang čư êa čar Lâm Đồng gĭt gai kơ kdriêk mgaih msir kluôm ênhă anăn, pla wĭt dliê leh anăn bi klă phung ngă soh čiăng ƀuah mkra hluê si klei bhiăn. Ƀiădah truh kơ ară anei, dŭm klei anei jing klei wơr leh.”

          Ti čar Lâm Đồng knŏng mrâo mâo mă 8 êpul êya yang ƀuôn mâo bruă sang čư êa dŭm kdriêk jao dliê hŏng kluôm ênhă jing 2.260ha, ƀiădah truh kơ ară anei hrui wĭt leh 5 êpul êya. Klei năng mđing jing jih 3 êpul yang ƀuôn hŏng 99 gŏ sang ti kdriêk Bảo Lâm dưi jao giăm 860ha dliê leh anăn lăn dliê hrui wĭt sơăi. Vŏ Danh Tuyên, k’iăng khua kiă kriê knơ̆ng bruă lŏ hma leh anăn mđĭ kyar krĭng ƀuôn sang čar Lâm Đồng tŭ lač:

Ti Lâm Đồng mâo êdi klei jao dliê amâo mâo djŏ pô. Mphŭn bi klă jing djŏ, ƀiădah truh kơ êdei dŭm gŏ sang anăn mjhua leh anăn čhĭ kơ pô mkăn. Ksĭng mmiă lăn lŏ ham, bi rai dliê. Leh hmei hmao ƀuh hmei rui wĭt leh 5 klei bi hmô êpul yang ƀuôn. Ti anăn ăt mâo bruă klam kriê dlăng mơ̆ng knuă druh kriê dlăng dliê. Pô dliê leh anăn bruă sang čư êa alŭ wăl ăt ka ngă ktang ôh hlăm bruă anei.”

Mâo lu klei kƀĭn, lu klei hưn leh anăn klei bi klă mâo leh knơ̆ng, dhar bruă djŏ tuôm leh anăn bruă sang čư êa čâr Lâm Đồng ba mdah hŏng mta kñăm mñă kơ bruă sang čư êa dŭm kdriêk hrui wĭt klei bi klă jao lăn dliê kơ êpul yang ƀuôn. Biădah boh sĭt, ti dŭm krĭng lăn anei jing lăn đang boh, sang pưk kjăp. Dliê jao hŏng klei mpliă pliă kyua anăn bi kĕ bơ̆ng. Bruă klam anei amâo djŏ hnơ̆ng mplĕ kơ pô mă dliê. Pătdah knơ̆ng hrui wĭt dŭm klei bi klă jao dliê kơ êpul yang ƀuôn amâo mâo lŏ mĭn kơ bruă klam.