Klei yăl dliê kơ sa čô “khua” čŏng mdưm mă pô mơ̆ng êpul FULRO tuuôm ngă rŭng răng hlăm êpul êya dŭm djuê ana Lăn Dap Knư jing Ybome (khăng iêô  Ja Na - 68 thŭn), ti ƀuôn Ring Rai, să Hà Bầu, kdriêk Đăk Đoa, čar Gia Lai. Mlan  2/2001, ti gŭ klei gĭt gai mơ̆ng Ksor Kơk - khua gĭt gai êpul FULRO dôk ti Mi, lu mnuih djuê ƀiă arăng mčhur ngă la griâo bi kdơ̆ng.

Leh klei mâo, Ja Na tŭ klei phat kđi 12 thŭn dôk hlăm mnă hŏng klei soh “Bi rai hră klei bi hgŭm djuê ana”. Hlăm hdră mkra mjuăt, Ybome thâo leh lu klei soh pô. Leh ruĕ mñă, ñu wĭt hŏng alŭ wăl, gĭr jih ai tiê mă bruă leh anăn mphŭn mkŏ mjing klei hdĭp mrâo.

 “Hlăk nao ngă ngă la griâo, bi kdơ̆ng, ară anei lŏ mĭn kâo luh êa ală. Knhal tuč mnuih ƀuôn sang hlăm ƀuôn klam boh jhat, kâo nao mŭt mnă. Ară anei kâo wĭt ti ƀuôn kâo mblang kơ mnuih ƀuôn sang thâo săng kơ klei bi hgŭm si ngă, klei yuôm bhăn jing brei mâo klei bi hgŭmm kơh srăng dưi hŏng jih jang”.

Bi hŏng Siu Un, 59 thŭn, dôk ti alŭ Tân Điệp 1, să Ia Ake, kdrriêk Phú Thiện, pô tuôm găn leh 16 thŭn dôk hlăm mnă, klei hdĭp aguah tlam jing sa klei mđĭ ai ñu lŏ mâo klei đăo knang. Mlan 6/2022, ñu lŏ wĭt bi kƀĭn hlăm Sang Aê Diê Klei Mrâo Mrang Jăk ti alŭ, hlăm Êpul Hiu hưn klei đăo mrâo mrang jăk - sa klei đăo djŏ hŏng hdră bhiăn knŭk kna. Siu Un  ară anei amâo lŏ hêñ, ñŭt huĭ, amâo lŏ mâo phung bi kdơ̆ng nah êngao mplư ôh. Ñu khăng yăl dliê kơ klei soh pô leh anăn wĭt hŏng klei đăo pô, đru kơ mnuih ƀuôn sang hlăm ƀuôn thâo kơ klei soh djŏ:

 “Pô lŏ wĭt hŏng klei đăo yơh, wĭt hŏng klei đăo phŭn. Tơdah wĭt, Đảng, Knŭk kna, bruă sang čư̆ êa jăk hŏng pô. Kâo ăt čang hmăng mnuih ƀuôn sang hlăm djăp ƀuôn êlan, dŭm anôk msĕ si Dak Lak, Gia Lai… hlei phung dôk djŏ tuôm kơ klei đăo klei mrâo mrang jăk Đê Ga snăn wĭt yơh hŏng klei đăo sĭt, wĭt hŏng klei đăo phŭn mâo Đảng, knŭk kna brei”.

Čiăng kơ êlan wĭt hŏng êpul êya, hŏng klei đăo kpă ênô thiăm pŏk mlar, hlăm dŭm thŭn êgao, čar Gia Lai pŏk ngă leh gru hmô “Wĭt hŏng klei đăo - răng mgang klei êđăp ênang alŭ ƀuôn”, hŏng klei hgŭm mơ̆ng 4 êpul: Đảng viên, phung mâo kơhưm, phung dlăng bruă klei đăo leh anăn phung tuôm soh čhuai hlue Fulro.

Jing khua dlăng bruă klei đăo Mrâo Mrang Jăk Việt Namm (kwar Dhŭng) ăt jing khua bruă mặt trận alŭ Sô Ma Lơng, să Chrôn Pơnan, kdriêk Phú Thiện, čar Gia Lai,  Kror Đuing brei tho, ñu hŏng dŭm gưl bruă sang čư̆ êa mtrŭt mjhar leh lu mnuih lui klei đăo Mrâo Mrang Jăk Đê Ga čiăng nao đăo djŏ hdră bhiăn.

 “Bruă sang čư̆ êa alŭ wăl mđing nanao kơ hmei, mjing klei găl kơ hmei kkuh mpŭ bi kƀĭn. Ăt iêô mthưr ayŏng adei tuôm soh leh wĭt kơ ƀuôn sang. Tal êlâo hmei jum leh 13 gŏ êsei đucc, ƀiădah ƀrư̆ truh ară anei êbeh 300 čô. Phung soh čhuai hmei bi mguôp hŏng phung pô mtô leh anăn bi hgŭm hŏng Siu Un nao grăp boh sang mtrŭtm mjhar, mđĭ ai, hâo hưn kơ diñu hlue ngă hdră êlan mơ̆ng Đảng, Knŭk kna”.

Hlue si Ra Lan Chung, K’iăng Khua dlăng bruă Đảng čar, Khua Knơ̆ng bruă sang čư̆ êa čar Gia Lai, hŏng dŭm boh phŭn jăk siam leh anăn djŏ klă, gru hmô “wĭt hŏng klei đăo, răng mgang klei êđăp ênang aŭ ƀuôn” ti alŭ wăl dôk mjing anôk jăk kơ phung tuôm lĕ hlăm klei soh dưi hdĭp, mă bruă, mđĭ klei hdĭp mnơ̆ng dhơ̆ng, ai tiê pô leh anăn đru mđĭ kyar êpul êya.

 “Hlăm wưng êgao snăn  iêo mkrum leh ai ktang mơ̆ng jih bruă kđi čar hgŭm msir mgaih klei dleh dlan mơ̆ng phung tuôm nao leh Fulrro lŏ wĭt hŏng êpul êya, mtô bi hriăm, mđĭ ai diñu đăm lŏ wĭt ngă ôh klei bi kdơ̆ng. Ti dŭm kdriêk hlăm čar dôk ngă gru hmô “Wĭt hŏng klei đăo - răng kriê klei êđăp ênang alŭ ƀuôn” hmei bi mni kơ klei tŭ, boh sĭt. Gru hmô anei mâo Phŭn bruă kahan ksiêm bi mni leh anăn bi mklă Gia Lai jing sa hlăm dŭm anôk lŏ dơ̆ng ngă leh anăn bi lar gru hmô amâo djŏ knŏng ti Gia Lai ôh ƀiădah wăt ti dŭm čar lăn Dap Kngư.”