- Ơ ayŏng Y Khăm Niê Ta, hŏng bruă klam jing pô dlăng bruă Đảng ƀuôn mnuih djuê ƀiă, ya bruă đru kơ kơ krơ̆ng kjăp bruă kđi čar leh anăn bi lar kơhưm, bi hmô ciăng bi kƀĭn, bi mguôp đảng viên leh anăn mnuih ƀuôn sang ti ƀuôn pô?

Y Khăm Niê Ta: Hŏng kâo, klei đru kơ kâo krơ̆ng kjăp knhuah bruă kđi čar leh anăn mâo kơhưm hlăm krĭng mnuih djuê ƀiă jing klei đăo knang mnuih ƀuôn sang. Klei đăo knang anăn amâo djŏ čŏng mâo ôh, ƀiădah dưi mkŏ mjing mơ̆ng klei blŭ hlŏng ngă, bi hmô hlăm klei hdĭp aguah tlam, klei mă bruă knư, ngă djŏ hdră bhiăn mơ̆ng Đảng, knŭk kna leh anăn knhuah siam ƀuôn sang pô. Jing pô dlăng bruă Đảng, kâo jĕ giăm hŏng mnuih ƀuôn sang, săng mnuih ƀuôn sang, blŭ mnuih ƀuôn sang săng leh anăn ngă mnuih ƀuôn sang tŭ. Êjai knuă druh, đảng viên klă sĭt hdĭp mbĭt hŏng mnuih ƀuôn sang, bi đru gui klei dleh dlan, hdră duh ƀơ̆ng, klei đăo knang mnuih ƀuôn sang srăng ksul mbŭ. Mơ̆ng anăn dưi bi kbĭn đảng viên leh anăn mnuih ƀuôn sang bi mguôp sa ai mkŏ mjing ƀuôn sang ƀrư̆ hruê ƀrư̆ đĭ kyar, mdrŏng siam.

- Mơ̆ng boh sĭt bruă gĭt gai anôk bruă Đảng mơ̆ng ƀuôn A1 bi leh jăk bruă klam hlăm lu thŭn dơ̆ng, hluê si ih, ya bruă ngă tŭ dưn hĭn hlăm klei mđĭ hnơ̆ng jăk anôk bruă, čiăng kơ hdră mtrŭn mơ̆ng Đảng klă sĭt nao hlăm klei hdĭp?

Y Khăm Niê Ta:  Mơ̆ng boh sĭt gĭt gai anôk bruă Đảng ƀuôn A1, hluê si kâo, bruă tŭ dưn hĭn čiăng mđĭ hnơ̆ng klei kƀĭn anôk bruă hluê si asăp mtrŭn mrô 50 mơ̆ng gưl dlông jing ba klei kƀĭn anôk bruă nao mbĭt hŏng klei hdĭp ƀuôn sang. Anôk bruă amâo mâo bi trông khă bi mâo ƀiădah kñăm kơ dŭm boh klei msĕ si bi hrŏ ƀun, rŭ mdơ̆ng sag dôk, răng mgang klei êđăp ênang, kriê pioh dhar kreh, mđĭ kyar hdră duh ƀơ̆ng. Hdră mtrŭn srăng khuăt, klă pô, klă bruă, klă mmông, klă boh tŭ dưn, bi kƀĭn mâo klei ksiêm dlăng, bi klă, êngao kơnăn bi lar klei êngiê hlăm klei kƀĭn. Mtrŭt mjhar phung đảng viên, jhŏng bi trông, lač klă, lač sĭt. Bi mguôp klei bi kƀĭn anôk bruă hŏng hâo hưn hŏng hdră găl guôp hŏng mnuih djuê ƀiă čiăng kơ hdră mtrŭn klă sĭt nao hlăm klei hdĭp.

- Dŭm êpul hgŭm bruă tông čing čhar amâodah jing êpul bi hgŭm rông êmô êpul êua leh anăn dŭm gru hmô hdră duuh ƀơ̆ng ya hmăi kơ bruă bi mlih klei mĭn, knhuah mă bruă mơ̆ng mnuih ƀuôn sang. Leh anăn bruă klam mơ̆ng anôk bruă Đrng hlăm bruă mkŏ mjiing Đảng nao mbĭt hŏng mđĭ kyar bruă duh mkra ala ƀuôn si ngă dưi ngă ơ ayŏng?

Y Khăm Niê Ta: Dŭm gru hmô êpul tông čing, êpul- bi mguôp rông êmô mkŏ mjing leh klei mlih sĭt hlăm klei mĭn mnuih ƀuôn sang. Mơ̆ng klei čang guôn ară anei čŏng duah klei bi mguôp, mă mbĭt, tŭ mbĭt. Hŏng êpul tông čing, mnuih ƀuôn sang ƀuh boh tŭ dưn dhar kreh knhuah gru amâo djŏ knŏng kriê pioh ƀiădah lŏ đru mđĭ hnơ̆ng klei hdĭp ai tiê, hưn mdah ƀuôn sang. Êpul bi hgŭm rông êmô đru kơ mnuih ƀuôn sang bi mlih klei ngă bruă hliê điêt  jing mkra jing mâo êpul, thâo tĭng mkă, kpưn đĭ tlaih ƀun. Bruă klam mơ̆ng anôk bruă  bi êdah hŏng klei tă hdră, đru kơ mnuih ƀuôn sang dŭm gru hmô, tiŏ nao đảng viên nao hgŭm mbĭt. Hlue anănđru mkŏ mjing Đảng hŏng mđĭ kyar bruă duh mkra ala ƀuôn, bi kjăp klei đăo knang mnuih ƀuôn sang hŏng klei gĭt gai mơ̆ng Đảng ti nah gŭ.

- Dưi pah mni djŏ wưng bi hdơr 9 thŭn hruê mkŏ mjing Đảng, si klei ih čiăng mtă mtăn kơ phung mda asei, đảng viên mda asei krĭng mnuih djuê biă, krĭng knông lăn?

Y Khăm Niê Ta: Dưi pah mni djŏ wưng bi hdơr 9 thŭn hruê mkŏ mjing Đảng jing klei ktưn hưn leh anăn ăt jing bruă klam. Kâo hmăng hmưi phung mda asei, đảng viên krĭng knông lăn, krĭng mnuih djuê ƀiă mâo nanao klei mĭn hdĭp siam, klei hmăng hmưi kpưn đĭ mơ̆ng ƀuôn sang pô. Đăm mĭn ôh krĭng dleh dlan jing klei ênguôt ƀiădah dlăng anăn jing anôk mjuăt hriăm pô, duh myơr leh anăn đĭ hriê kơ prŏng. Phung mda asei, đảng viên čiăng jhŏng mĭn, jhŏng ngă, jhŏng đua klam, hriăm hră mơar, kriê pioh dhar kreh djuê ana, nao êlâo hlăm mđĭ kyar bruă duh mkra ala ƀuôn, răng mgang klei êđăp ênang krĭng knông lăn, mkŏ mjing ƀuôn sang mdrŏng siam, mrâo mrang. Anăn jing hdră klă klơ̆ng hĭn čiăng năng hŏng knhuah gru hing ang mơ̆ng Đảng.

- Lač jăk kơ ih lu!