âo hŏng anei giăm 50 thŭn êgao, dŭm êbâo čô hlăk ai kbiă mơ̆ng ƀuôn prŏng phŭn nao kơ Dhŭng Lăn Dap Kngư rŭ mjing mkŏ mkra ala ƀuôn mrâo. Kdrăp diñu dưi djă ba knŏng jing ai tiê hlăk ai mrâo mrang, nao mkŏ mjing ƀuôn sang mrâo. Ti anăn diñu hlŏng bi anăn dŭm anăn mơ̆ng ƀuôn sang pô mơ̆ng dưr, msĕ si: Mê Linh, Gia Lâm, Từ Liêm, Đông Anh… Čiăng kơ dŭm boh ƀuôn, să hlăm ƀuôn sang mrâo anei, mâo să Liên Hà, kdriêk Lâm Hà ară anei, jing mă anăn mơ̆ng sa boh să ti kdriêk Đan Phượng, ƀuôn prŏng Hà Nội. Nguyễn Thị Bích Hạnh hlue găp djuê trruh kơ Lâm Đồng mơ̆ng điêt, ară anei ngă Khua êpul hgŭm bruă mniê să Liên Hà brei thâo, kluôm să mâo êbeh 2.000 gŏ êsei hŏng giăm 9.000 čô mnuih. Mnuih ƀuôn sang bi êdah nanao ai tiê thâo bi mguôp hlăm klei duh ƀơ̆ng:

“Hŏng Liên Hà snăn klei bi mguôp mơ̆ng amai adei mniê hlăm bruă mkŏ mkra krĭng ƀuôn sang mrâo, mâo mđĭ hĭn leh. Phung amai adei mkŏ mjing leh dŭm êpul hgŭm bruă pla mjing ana rông hluăt mrai hlăm krĭng mnuih djuê ƀiă. Mnuih amai adei Čĭl, K’ho jih ai tiê bi pla mjing ana rông hluăt mrai, lehanăn mâo đru brei čan prăk mơ̆ng anôk bruă lŏ hma pioh blei lip, mkra pra anôk rông hluăt, duh bi liê bruă pla mjing ana rông hluăt mrai, blei ba mjeh mrâo. Mơ̆ng anăn, klei hdĭp mda phung amai adei mâo klei đĭ kyar hĭn leh, kyuadah mâo prăk ba wĭt hlăm grăp hrue, pioh yua aguah tlam”.

Truh kơ ară anei, ênoh mâo ba wĭt kah knar grăp čô mnuih ti kdriêk Lâm Hà, čar Lâm Đồng êbeh 52 êklăk prăk, đĭ êbeh 2,5 blư̆ mkă hŏng 10 thŭn êlâo; hnơ̆ng ênoh gŏ êsei ƀun hrŏ hĭn êdi knŏng adôk 1,68%; 100% să djăp djăp ênoh čuăn krĭng ƀuôn sang mrâo; jing kdriêk tal 5 hlăm čar Lâm Đồng mâo khua knŭk kna tŭyap jing kdriêk djăp ênoh čuăn krĭng ƀuôn sang mrâo wưng thŭn 2016 – 2020; lehanăn mâo klei myun mâo khua lăn čar mđup brei Mêđai mă bruă mrô 3.

Klei hdĭp mda ala ƀuôn mâo klei đĭ kyar klei hdĭp dhar kreh ai tiê mnuih ƀuôn sang djăp djuê ana ti kdriêk Lâm Hà – krĭng duh mkra mrâo mơ̆ng mnuih Hà Nội ti Lâm Đồng mâo leh klei đĭkyar jăk. K’Thế –  Khua kiă kriê anôk bruă dhar kreh kdriêk Lâm Hà lač, hlăm jih jang bruă dhar kreh, djăp mta bruă prŏng hlăm alŭ wăl, mâo nanao knhuah gru mơ̆ng mnuih Hà Nội lehanăn mnuih djuê ƀiă tinăn:

“Mâo hĕ anăn “Lâm - Hà” jing klei bi mguôp mơ̆ng Lâm Đồng lehanăn Hà Nội, kyuanăn yơh klei bi mguôp jih jang djăp djuê ana hlăm kdriêk jing jăk snăk, mơ̆ng anăn jih jang hdră êlan mơ̆ng Đảng lehanăn knŭk kna. Amâo mâo djŏ knŏng mnuih ƀuôn sang djăp djuê ana đuič ôh, ƀiădah Đảng, knŭk kna čiăng snăk bi kriê pioh mđĭ bi lar knhuah gru jăk siam msĕ si čing čhar, kriê pioh klei kưt mmuiñ djuê ana pô. Čang hmăng kơ Đảng, knŭk kna mâo klei mđĭng, đru hlăm bruă kriê pioh dhar kreh djuê ana. Čiăng kơ mgi dih leh klei hdĭp mda đĭ kyar hĭn, srăng ba yua lu kdrăp mrâo mrang hĭn hlăm bruă duah ƀơ̆ng. Bi kơ bruă kriê pioh knhuah gru dhar kreh snăn hmei čang hmăng srăng ba yua hlăm sang hră mơar mtô tông čing čhar, mtô kưt muiñ. Đru kơ phung hđeh thâo ba yua lehanăn thâo săng kơ dhar kreh djuê ana pô, kñăm mđrăm mbĭt bi thâo kriê pioh mđĭ bi lar kơ gưl êdei”.

 Trần Văn Hiệp, Khua knơ̆ng bruắang čư̆ êa čar Lâm Đồng bi myuôm dŭm boh tŭ dưn kdriêk Lâm Hà gĭr leh ba wĭt klei tŭdưn halwm wưng êgao, lehanăn bi mklă bruă mkŏ mkra krĭng ƀuôn sang mrâo klă sĭt jing leh bruă hŏng jih jang mnuih, mâo klei bi ktưn prŏng snăk, lar bra leh hlăm tar bŏ čar, mâo jih bruă kđi čar, lehanăn mnuih ƀuôn sang jih ai tiê hlue ngă. Kluôm čar mâo leh 107/111 boh să djăp ênoh čuăn krĭng ƀuôn sang mrâo, lehanăn 5 kdriêk mâo tŭyap leh djăp ênoh čuăn krĭng ƀuôn sang mrâo. Trần Văn Hiệp, lač:

“Čiăng lŏ dơ̆ng mđĭ bi lar boh tŭ dưn leh mâo, hmei akâo hlăm wưng ti anăp kdriêk Lâm Hà lŏ mkŏ wĭt bruă lŏ hma, mlih mrâo hdră êlan mđĭ kyar, rŭmjing krĭng ƀuôn sang mâo klei kjăp, lehanăn thâo klă kơ phŭn agha anôk ngă bruă. Mđĭ hĭn djăp mta klei găl leh mâo ti kdriêk, dưn yua jih ai ktang pioh kơ klei duh bi liê mđĭ kyar bruă duh mkra ala ƀuôn. Rơ̆ng dưi bi hrŏ ƀun hŏng klei kjăp, rơ̆ng kjăp klei êđăp ênang hlăm yang ƀuôn. Lŏ mđĭ hĭn nanao klei thâo bi mguôp jih jang djuê ana, lŏ đru mguôp lu hĭn, klă mngač hĭn kơ klei mđĭ kyar kluôm čar Lâm Đồng./.