Knhal jih mlan 4 thŭn 1975, klei bi blah Hồ Chí Minh mŭt hlăm wưng bi mklă. Čiăng ba nao kahan pral kơ sài Gòn, êpul kahan mtlaih êngiê găn jih anôk kđông kahan phŭn mơ̆ng knŭk kna Sài Gòn, hlăm anăn mâo kđông kahan Đồng Dù, Củ Chi, sa anôk kjăp mơ̆ng Êpul kahan 25 “Kmlă krĭng hlơr “mơ̆ng Mi. Kahan hđăp Nguyễn Quang Luyến, ti êlan Nguyễn Thị Định, ƀuôn hgŭm Thành Nhất, ƀuôn prŏng Ƀuôn Ama Thuôt, lĭng kahan C17 - Trung đoàn 48 – Sư đoàn 320A, pô mbĭt hŏng Êpul kahan mtlaih êngiê mơ̆ng kdrăn mblah Lăn Dap Kngư nao truh ti Sài Gòn mgei ai tiê lŏ yăl dliê:

 “Aguah hruê 29/4 asăp mtrŭn mơ̆ng kbưi mnah, trup 6h10 mnĭt mphŭn pŏk êlan mŭt. Leh pŏk êlan ksŭng ngă snăn brei dưi pŏk ƀăng mơ̆ng 8 truh 9m čiăng kơ êdeh sar drei mơ̆ng tluôn nao mŭt.  Leh 2 boh êdeh sar mŭt snăn 1 boh đuôm amâo dưi mŭt ôh, kâo djă sa boh mtuh tui hlue êdeh sar nao mŭt ti mnư knhal tuč, snăn djiê dưm mơh ăt brei dưi mŭt mơh. Kâo đih kŭp, sa ênai mtuh prŏng snăk, amâo lŏ thâo ôh. Leh po hdơr snăn êdeh sar ti anăp pô leh, mnah ktang snăk. Huĭ hyưt snăn ƀiădah msĕ si nao hlăm knăm mơak, kâo ka tuôm ƀuh ôh msĕ snăn”.

Leh găn ktuê êlan gang mkhư̆ Củ Chi – Đồng Dù, dŭm anôk ksŭng ngă mơ̆ng êpul kahan mtlaih êngiê pral kwang dar hlăm wăl Sài Gòn. Yang hruê 30/4/1975, êdeh sar mơ̆ng kahan 203, êpul kâhn 2, nao leh ti Sang Klei Êngiê - anôk phŭn mơ̆ng Knŭk kna Sài Gòn hlăk anăn. Êdeh sar ba anăp mâo mrô 843 kyua Khua êpul Bùi Quang Thận gĭt gai mdar knŏng mnah, mnuh hlăm ƀăng jang nah điâo. Kyua djiê hĕ masin hlăk anăn kyua hnơ̆ng bi kgăn ktang đei.

Êdeh sar mâo mrô 390 kyua Pô ngă bruă kđi čar Vũ Đăng Toàn gĭt gai nao êdei blă ti anăp, mŭt mnuh ƀăng jang phŭn mơ̆ng Sang klei êngiê. 11h30 mnĭt hruê 30-4-1975 hla čhiăm gru mtlaih êngiê phiơr ti čuôr Sang klei êngiê. Anăn jing mnĭt mmông hưn kơ Klei mblah Hồ Chí Minh hƀuê ênuk mâo klei dưi kluôm. Nguyễn Thanh Cảnh ti ƀuôn hgŭm Thành Nhất, ƀuôn prŏng Ƀuôn Ama thuôt, kahan hâo hưn hlăm Anôk bruă hâo hưn, êpul kahan 2, hmư̆ asăp hâo hưn kơ klei bi blah lŏ hdơr:

 “Hmei nao hlăm êlan găn lu klei lông dlăng snăk, phung roh mnah ƀiădah hmei găn jih. Mphŭn snăn nah điâo kâo ƀuh sa êdeh sar đuôm tinăn. Snăn êdeh sar 390 kdŭn mnuh hlăm ƀăng jang leh anăn hlŏng dưi găn tinăn. Ayŏng Thận mă hla čhiăm gru ti êdeh leh anăn đĭ ti anôk tal 2 čŭt hla čhiăm gru mtlaih êngiê. Hlăk anăn Bùi Hữu Hạnh mrâo ba Dương Văn Minh kbiă. Dương Văn Minh lač hmei dôk guôn čiăng mŭt jao bruă, snăn ayŏng Thận lač amâo jao ya mta ôh, diih amâo dưi ôh, brei diih kdŭn yơh. Hlăk anăn hmei bi hia sơăi, mơak snăk.”

Dôk ti anôk hgăm ƀiădah ăt yuôm bhăn mơh, Mai Văn Tiêm, ti êlan Thủ Khoa Huân, ƀuôn prŏng Ƀuôn Ama Thuôt, Khua hđăp Anôk kăp mă mrô K26 - Anôk gĭt gai êpul kahan 3, ăt mâo ƀô̆ mta hŏng êpul kahan bi blah, mgei ai tiê yăl dliê:

 “Anôk hmei dưi răng mgang jăk snăk kyua hmei tui hlue Đại tướng Văn Tiến Dũng. Hruê 30/4 kâo mrâo leh mlih mmông mă bruă,kâo pŏk hdră mđung asăp Sài Gòn snăn hmư̆ Dương Văn Minh hưn amâo lŏ mâo klei dưi ôh, kâo mơak snăk. Kâo knŏng hdơr mâo pruĕ blŭ: “Kâo Dương Văn Minh Khua mil čhil êjai Việt Nam Cộng hòa hưn amâo mâo klei dưi ôh hŏng êpul kahan Mtlaih êngiê kwar Dhŭng Việt Nam”, kâo ur ktang, ayŏng adei ơi, phung roh hơăi leh. Kâo amâo bi mĭn ôh kơ klei anăn, tơdah lŏ mĭn kâo mgei ai tiê snăk.”

Phung lĭng kahan msĕ si Luyến, Cảnh,  Tiêm…jing phung dôk hdĭp ƀuh ti anăp klei mmuñ jăk siam kơ Yan mnga thŭn 1975. Klei bi hdơr dưi mdlưh kđông kahan roh 25 – Đồng Dù, klei bi mklă prak snăk ti Sang Klei Êngiê, amâodah asăp mđung hưn amâo mâo klei dưi ôh hlăm Hdră mđung asăp Sài Gòn, ăt kwang hlăm ai tiê phung kahan hlăk đưm - msĕ si klei mñă kơ klei čang hmăng êđăp ênang, klei êngiê./.