Ơ mnuih ƀuôn sang lehanăn lĭng kahan hlăm kluôm ala!

        Sa yan mnga mrâo Quý Mão lŏ truh hlăm lăn čar Việt Nam drei khăp hơiêng! Hlăm mmông đuĕ nao kơ thŭn mrâo bŏ hŏng klei mgei ai tiê anei, kâo bi ala kơ phung khua kiă kriê Đảng, lăn čar, hŏng ai tiê klei khăp kâo mơĭt truh hŏng lĭng kahan lehanăn phung ƀuôn sang kluôm ala, jih mnuih Việt Nam drei hdĭp kơ ala tač êngao hlăm klei sĭt suôr lehanăn kâo hơêč hmưi jăk siam truh hŏng jih jang sa thŭn mrâo jăk siam êdi. Kâo mơĭt truh jih jang mah jiăng ala tač êngao, phung ƀuôn sang djăp ala čar dlông rŏng lăn sa klei hơêč hmưi jăk siam, hgŭm mbĭt, lehanăn amâo mâo mdei đĭ kyar.

        Thŭn Nhâm Dần - 2022 mrâo leh êgao hŏng lu klei lông dlăng, lu klei năng hdơr, lu klei amâo mâo jăk mâo mơh, hmăi hriê klei kăn jăk rei truh hŏng lăn čar drei, lehanăn jih jang mnuih tar rong lăn. Mơ̆ng klei anăn, kluôm Đảng, jih jang phung ƀuôn sang, lĭng kahan drei dưn yua leh jih ai tiê thâo khăp kơ lăn čar,hur har jih ai tiê bi mguôp, gĭr ngă djăp mta bruă mâo ba wĭt leh lu klei tŭ dưn yuôm bhăn, djăp ênŭm hŏng lu klei êdah êdi, Êjai mdrơ̆ng hŏng klei ruă tưp, lehanăn bi kơrŭ bruă duh mkra, mkŏ mjing klei duh mkra êngiê čŏng pô mđĭ kyar, mtrŭn agha êlam hĭn, mâo ba wĭt klei tŭ dưn kñăm kơ yang ƀuôn hơĭt kjăp, răng mgang kjăp klei êđăp ênang lăn čar, bi kjăp jih jang klei mnuih ƀuôn sangf đăo knang  hong Đảng, hŏng knŭk kna, hŏng hdră êlan yang ƀuôn ngă phŭn êngiê, mdưm hlăm ai tiê jih jang mnuih klei jăk jĭn mâo jih jang mnuih mpŭ mni, mah jiăng ala tač êngao khăp čiăng, lehanăn drei mâo mă lu klei hriăm. Bi ala kơ Đảng, kơ knŭk kna, kâo alŏ sa blư̆ jih ai tiê mpŭ mni, hơêč hmưi lehanăn lač jăk kơ jih jang phung ƀuôn sang kluôm ala kơ boh tŭ dưn mâo ba wĭt prŏng prĭn thŭn leh êgao.

        Čhuang mŭt hlăm thŭn mrâo Quý Mão - 2023, jing thŭn tal 3 leh thŭn kơ klei yuôm bhăn hlue ngă hdră klei bi kƀĭn prŏng kluôm ala tal 13, mơ̆ng Đảng, lehanăn hdră đĭ kyar duh mkra ala ƀuôn 5 thŭn 2021 - 2025. Hŏng klei gĭr prŏng kñăm mđĭ kyar lăn čar knư̆ hrue knư̆ prŏng ktang, jăk jĭn, čang hmăng kơ jih jang phung ƀuôn sang lehanăn lĭng kahan lŏ mđĭ hĭn knhuah gru thâo khăp kơ lăn čar, mâo klei thâo bi mguôp, gĭr hgao klei dleh dlan, mđĭ kyar kluôm ênŭm, lehanăn mlih mrâo prŏng, rŭ mdơ̆ng lăn čar kjăp, êđăp ênang, bi leh ênŭm mta kñăm, mjing bruă čuăn kčah jao, mjing atur knơ̆ng kơ klei đĭ kyar kjăp hlăm dŭm thŭn ti anăp, đru bi rŭ mdơ̆ng lăn čar khăp hơiêng drei knư̆ hrue knư̆ mdrŏng sah, jăk siam, hing ang hĭn.

       Hŏng ai êwa mtluk mtlak mơak mñai thŭn mrâo drông thŭn Quý Mão, sa blư̆ dơ̆ng kâo lŏ hơêč hmưi kơ jih jang phung ƀuôn sang, lĭng kahan, grăp gŏ sang, grăp čô mnuih Việt Nam sa thŭn mrâo mâo lu klei suah pral, klei mơak mñai, klei jăk jĭn, klei tŭ dưn mrâo.

Mơak yan mnga, sa klei thâo gĭr prŏng, ai êwa mrâo, klei đĭ kyar mrâo, hŏng lu klei tŭ dưn mrâo. Grăp boh sang mơak mñai, grăp čô mnuih mâo klei jăk jĭn.

Kkuh hŏng klei khăp!