Hlăm wưng êgao, klei klưh hroh lăn, boh tâo ti krĭng Lăn Dăp Kngư ngă truh lu klei hmăi kjham kơ anak mnuih, ngăn drăp mnuih ƀuôn sang. Phŭn agha truh lu klei klưh hroh lăn hlăm wưng êgao, boh nik jing ti krĭng Lăn Dăp Kngư mâo leh k’iăng khua phŭn bruă ngăn dŏ leh anăn wăl hdĭp mda Lê Công Thành hlăk mblang hlăm sa klei kƀĭn bruă klei mrâo knŭk kna tuôr mlan 7.

Bi êdah phŭn agha mâo klei anei, k’iăng khua phŭn bruă ngăn dŏ leh anăn wăl hdĭp mda Lê Công Thành brei thâo, hŏng dŭm ping čư, čŏng čư̆ čŏng mâo, mbĭt hŏng klei mlih mơ̆ng lăn dliê jing lăn ana pla mjing amâodah čuk hli lăn ngă êlan, mkra sang…rŏng lăn mâo leh klei mlih, truh kơ klei klưh hroh êjai mâo hjan prŏng. Klei bi knăl mơ̆ng klei klưh hroh jing hjan hlăm lu hruê, hjan prŏng, mâo klei kđang ti mtih sang, ping čư̆, lăn kbuôn kơ dlông, lăn mgei…Tơdah mâo dŭm klei anăn, Mnuih ƀuôn sang čiăng ktuê dlăng klei hưn kơ klei êa lip lêč, klưh hroh lăn, hưn hŏng bruă sang čư êa leh anăn phung jĕ giăm. Dŭm êpul êya ti alŭ wăl srăng ktuê dlăng leh anăn ngă klei mbĕ đuê tơdah mâo klei arưp aram, răng mgang klei hdĭp anak mnuih. K’iăng khua phŭn bruă ngăn dŏ leh anăn wăl hdĭp mda Lê Công Thành hưn brei răng, hjan, angĭn êbŭ knŏng mrâo kčưm, đăo knăl klei truh yan adiê ăt dleh dưi ksiêm dlăng, ngă truh lu klei amâo mâo jăk. Khua knŭk kna ăt mâo leh asăp mtrŭn gĭt gai dŭm čar krĭng Lăn Dăp Kngư lŏ dơ̆ng ktuê dlăng, mgaih msir.