Êpul khua bruă Đảng gưl dlông Đảng Cộng sản Việt Nam, Bruă Kƀĭn Ala Ala čar yang ƀuôn ngă phŭn Việt Nam, Khua lăn čar Ala čar yang ƀuôn ngă phŭn Việt Nam, Knŭk kna Ala čar yang ƀuôn ngă phŭn Việt Nam, Khua dhar bruă gưl dlông Mặt trận čar kwar Việt Nam leh anăn gŏ sang bŏ hŏng klei ênguôt hnĭng hâo hưn:

Nguyễn Phú Trọng, khua gĭt gai Đảng gưl dlông, Khua knơ̆ng gĭt gai lĭng kahan gưl dlông, kkiêng hruê 14 mlan 4 thŭn 1944, ƀuôn sang: să Đông Hội, kdriêk Đông Anh, ƀuôn prŏng Hà Nội. Dôk ti sang mrô 5, êlan Thiền Quang, ƀuôn hgŭm Nguyễn Du, kdriêk čar Hai Ba Trưng, ƀuôn prŏng Hà Nội.

Ngă bruă mơ̆ng thŭn 1967, mŭt Đảng Cộng sản Việt Nam hruê 19 mlan 12 thŭn 1967. Khua hlăm bruă Đảng gưl dlông dŭm gưl VII, VIII, IX, X, XI, XII, XIII; Khua hlăm phŭn bruă kđi čar dŭm gưl VIII, IX, X, XI, XII, XIII; nao hgŭm Hlăm êpul Khua phŭn bruă kđi čar gưl VIII, khua Bruă Kƀĭn Ala Ala čar yang ƀuôn ngă phŭn Việt Nam gưl XI, XII; Khua gĭt gai gưl dlông Đảng Cộng sản Việt Nam dŭm gưl XI, XII, XIII; Khua lăn čar Ala čar yang ƀuôn ngă phŭn Việt Nam wưng thŭn 2016 – 2021, Khua êpul gơ̆ng bruă lĭng kahan leh anăn răng mgang klei êđăp ênang, Khua knơ̆ng gĭt gai lĭng kahan gưl dlông; Khua hlăm Êpul bruă Đảng kahan ksiêm gưl dlông, Khua Êpul gĭt gai gưl dlông kơ bruă gang mkhư̆ klei ƀơ̆ng ngăn, klei amâo mâo djŏ. Pô bi ala Bruă Kƀĭn Ala dŭm gưl XI, XII, XIII, XIV, XV.

Leh sa wưng dôk hlăm klei ruă, khădah mâo leh Đảng, Knŭk kna, êpul êya phung nai prŏng, nai prĭn, aê mdrao, phung thơ̆ng kơ bruă mdrao mgŭn... Jih ai tiê dŏng mdrao, gŏ sang jih ai tiê dlăng kriê, ƀiădah kyua thŭn leh khua, klei ruă kjham, ñu djiê leh hlăk 13 mmông 38 mnĭt tlam hrue 19 mlan 7 thŭn 2024 (jing hruê 14 mlan 6 thŭn Giáp Thìn), ti sang êa drao gưl dlông lĭng kahan 108, Hà Nội, hdĭp mâo 80 thŭn.

Giăm 60 thŭn ngă bruă, ñu mâo lu klei đru mguôp prŏng prĭn, boh nĭk hŏng bruă cách mạng hing ang mơ̆ng Đảng leh anăn djuê ana. Ñu mâo Đảng, Knŭk kna mđup brei Mêđai Mtŭ êa mah, Mêđai 55 thŭn bruă Đảng leh anăn lu Mêđai yuôm bhăn mơ̆ng Việt Nam leh anăn Tar rŏng lăn.

Klei djiê mơ̆ng Khua gĭt gai Đảng Nguyễn Phú Trọng jing klei luč liê prŏng hŏng Đảng, knŭk kna, jih jang mnuih ƀuôn sang leh anăn gŏ sang. Čiăng bi êdah klei ênguôt hnĭng leh anăn bi hdơr kơ Khua gĭt gai Đảng Nguyễn Phú Trọng, Êpul khua bruă Đảng gưl dlông Cộng sản Việt Nam, Bruă Kƀĭn Ala Ala čar yang ƀuôn ngă phŭn Việt Nam, Khua lăn čar Ala čar yang ƀuôn ngă phŭn Việt Nam, Knŭk kna Ala čar yang ƀuôn ngă phŭn Việt Nam, Khua dhar bruă gưl dlông mặt trận čar kwar Việt Nam bi klă mkŏ mjing knăm čang ênuh Khua gĭt gai Đảng Nguyễn Phú Trọng hŏng hdră bhiăn klei čang ênuh gưl ala čar.

ÊPUL KHUA BRUĂ ĐẢNG GƯL DLÔNG CỘNG SẢN VIỆT NAM

BRUĂ KɃĬN ALA ALA ČAR YANG ɃUÔN NGĂ PHŬN VIỆT NAM,

KHUA LĂN ČAR ALA ČAR YANG ɃUÔN NGĂ PHŬN VIỆT NAM,

KNŬK KNA ALA ČAR YANG ɃUÔN NGĂ PHŬN VIỆT NAM,

KHUA DHAR BRUĂ GƯL DLÔNG MẶT TRẬN ČAR KWAR VIỆT NAM