Hŏng boh sĭt mơ̆ng sang đung DK1 kđông kahan ti alŭ wăl hdră êlan, klei hdĭp aguah tlam dlhe dlan, yan adiê dleh ksiêm dlăng, kreh mâo dŭm angĭn êbŭ ktang găn alŭ wăl. Êjai mâo boh klei čiăng êdi klei jhŏng hlăm bruă kđi čar, klei gĭr ktưn, siă suôr hŏng lăn, hŏng Đảng leh anăn mnuih ƀuôn sang, mprăp ai tiê săn asei kyua klei dưi kiă kriê lăn čar. Mơ̆ng anăn yơh, hluê si Đại tá Trần Mạnh Chiến, khua bruă kđi čar Krĭng dua kahan êa: bruă mkŏ mjing klei jhŏng bruă kđi čar, klei gĭr ktưn, mprăp tŭ mă leh anăn bi leh bruă klam hŏng phung lĭng kahan ti sang đung jing boh klei kkmeh gơ̆ng, hluh hlir mao bruă Đảng – knơ̆ng gĭt gai lĭng kahan krĭng 2 kahan êa uêñ mĭn.

Hmei bi klă čiăng dưi ngă klei anăn, srăng yua jih jang dŭm hdră êlan hŏng klei djŏ hŏng boh sĭt ară anei. Hlăm anăn, mtô mjuăt mđĭ hĭn ai tiê bruă klam, klei jhŏng bruă  kđi čar, klei mĭn gĭr ktưn jing boh klei kmeh gơ̆ng. Bi lar bruă klam bi hmô, klei gĭr, bruă klam mơ̆ng grăp čô knuă druh, đảng viên êjai ngă bruă klam jing boh klei phŭn. Uêñ mĭn kơ nah tluôn jing gŏ sang phung lĭng kahan, ngă jăk hdră êlan đru hŏng lĭng kahan jing boh klei yuôm bhăn, jêñ jêñ. Ngă jăk dŭm mta phŭn anăn jing boh klei yuôm bhăn, bi klă tur knơ̆ng kjăp hlăm klei mĭn, bruă ngă mơ̆ng grăp čô lĭng kahan êjai ngă bruă klam.

Hluê si Trung tá Nguyễn Trung Đức, khua dlăng bruă đảng nah gŭ, khu bruă kđi čar êpul kahan DK1, BTl krĭng 2 kahan êa: hlăm wưng păn bruă mrâo êgao, dŭm anôk bruă đảng sang đung DK1 dưi gĭt gai, ktrâo lač dŭm anôk bruă bi leh dŭm hnơ̆ng čuăn, bruă klam hŏng lu boh tŭ êdah êdi msĕ si: Găk răng, ktuê dlăng boh sĭt hlăm wăl adiê, hlăm êa ksĭ, hmao hưn mdah hŏng knơ̆ng gĭt gai dŭm gưl mgaih msir djŏ dŭm boh klei, amâo brei mâo klei kjăt kƀla hlăm grăp boh klei. Mđĭ hnơ̆ng tŭ jăk bruă hriăm mjuăt, mprăp klei kdơ̆ng mblah, mkŏ mjing hdră bhiăn thơ̆ng kơ bruă, đru dŏng, đru kơ phung mă kan hdang hlăm êa ksĭ, hriăm mblah…Bruă mơ̆ng Đảng, bruă kđi čar, bruă đru nah tluôn, hdră êlan hluê ngă hrăm mbĭt, mâo boh tŭ dưn. Boh sĭt klei mĭn bruă kđi čar anôk bruă hơĭt kjăp, mâo klei bi mguôp, sa ai, êđăp ênang hlăm djăp mta, amâo mâo pô ngă soh hdră bhiăn. Trung tá Nguyễn Trung Đức brei thâo:

“Kyua klei dleh dlan leh anăn lu bruă klam mjêč, kyuanăn bruă kam gĭt gai mơ̆ng gưl bruă Đảng nah gŭ, anôk bruă đảng ti sang đung Dk1 jing yuôm bhăn sơnăk leh anăn jêñ jêñ thâo klă boh sĭt, đăo knăl boh klei, bi klă lu hdră êlan gĭt gai čiăng mgiah msir jăk dŭm boh klei dleh, mrâo msĕ si mâo kŭm păn tuê mŭt soh hŏng anôk kriê dlăng, boh klei mjêč, angĭn êbŭ, đru dŏng lu mnuih…”

Dŭm Sang đung DK1 jưh kahan ti dŭm krĭng ksĭ nah dhŭng mơ̆ng lăn čar kyuanăn tuôm hŏng lu klei dleh dlan. Amâo djŏ knŏng klei dleh dlan mơ̆ng yan adiê, ƀiădah lŏ dleh dlan hlăm bruă hluê ngă dŭm hră mơar, asăp mtrŭn… boh nik jing bruă mprăp kơ klei kƀĭn kluôm. Ƀiădah bruă đảng nah gŭ, khua gĭt gai êpul kahan DK1 dưn yua mbruă lu hdră êlan mkŏ mjing tŭ jing klei kƀĭn kluôm. Đại úy Bùi Thanh Hưng, khua dlăng bruă Đảng, khua bruă kđi čar sang đung DK1/9 brei thâo:

Anôk bruă hmei jưh kahan ti sang đung dlông êa ksĭ, mâo nanao klei uêñ mĭn gĭt gai mơ̆ng bruă đảng nah gŭ êpu kahan, bruă Đảng krĭng. Hlăm wưng păn bruă êgao anôk bruă hmei dưi bi leh jăk bruă klam, klei anăn bi êdah hŏng bruă bi leh bruă klam kđi čar mơ̆ng anôk bruă, klei bi mguôp hơĭt kjăp mơ̆ng dŭm êpul bruă Đảng, klei đĭ hriê kơ prŏng mơ̆ng grăp čô đảng viên leh anăn mnuih ƀuôn sang. Klei tŭ jing mơ̆ng klei kƀĭn kluôm dŭm anôk bruă Đảng Sang đung jing klei đăo knang čiăng kơ grăp čô lĭng kahan sang đung DK1 mđĭ lu blư̆ hŏng klei gĭr anôk akŏ angĭn êbŭ, răng mgang kjăp êa ksĭ nah dhŭng mơ̆ng lăn čar.

Mbĭt hŏng bruă mprăp leh anăn mkŏ mjing klei kƀĭn kluôm, anôk bruă Đảng dŭm sang đung jêñ jêñ ngă jăk bruă kđi čar, klei mĭn, hdră êlan, rơ̆ng kơ klei bi mguôp, bi sa ai, dlăng yuôm bruă gĭt gai bi leh jăk bruă klam kđi čar nao mbĭt hŏng mtrŭt mđĭ dŭm hdră bi lông ktưn. Mđĭ ai tiê thâo răng, mprăp kơ klei kdơ̆ng mblah, mgiah msir boh klei hlăm êa ksĭ. Phung lĭng kahan ti sang đung čŏng pô, hur har, mâo dŭm hdră êlan bi kdơ̆ng tŭ dưn hŏng dŭm hdră mnêč bi rai mơ̆ng dŭm êpul bi kdơ̆ng, phung mjhua hŏn bruă kđi čar, čiăng răng mgang tur knơ̆ng klei mĭn, ai ktang bruă kđi čar, hdră êlan mơ̆ng Đảng, răng mgang klei kiă kriê.

Gưl tal êlâo dưi nao hlăm klei kƀĭn kluôm anôk bruă Đảng ti sang đung, đảng viên Phạm Quang Dũng, anôk bruă Đảng sang đung DK1/10 brei thâo:

Khădah nao leh hlăm klei kƀĭn anôk bruă đảng ti hang lăn lu blư̆, ƀiădah gưl tal êlâo ti sang đung, khădah tuôm hŏng lu klei dleh dlan, kƀah lu mta, ƀiădah grăp čo đảng viên dưi ngă jăk bruă mprăp, anôk bruă mkŏ mjing djŏ hdră êlan, hră mơar, hŏng ai êwa kdrưh kơăm amâo mâo mdê hŏng lăn hang.

Kbưi hŏng lăn hang, klei ngă bruă dleh dlan, mâo lu bruă klam yuôm bhăn, dŭm gưl bruă đảng nah gŭ, anôk bruă đảng sang đung DK1 srăng čŏng pô thâo klă boh sĭt, đăo knăl boh sĭt, bi klă lu hră êlan gĭt gai mgiah msir boh klei dleh, mrâo, ƀiădah hŏng klei gĭr ktưn mơ̆ng gưl bruă đảng, khua kiă kriê sang đung, mbĭt hŏng klei sa ai mơ̆ng grăp čô lĭng  kahan, gưl bruă đảng, êpul bruă đảng dưi ngă jăk bruă mprăp bruă anăp truh kơ klei kƀĭn kluôm anôk bruă đảng nah gŭ wưng thŭn 2025 – 2027. Dŭm boh tŭ dưn dưi mâo hlăm wưng păn bruă êgao leh anăn klei tŭ jing mơ̆ng klei kƀĭn kluôm dŭm anôk bruă đảng sang đung jing klei bi klă kơ ai dưi, ai kdơ̆ng mblah mơ̆ng dŭm êpul bruă đảng sang đung DK1 leh anăn kluôm krĭng 2 kahan êa. Anăn jing klei bi klă hŏng klei đăo knang mơ̆ng Đảng, Knŭk Kna leh anăn mnuih ƀuôn sang hŏng êpul răng mgang klei dưi kiă kriê lăn čar ti êa ksĭ nah dhŭng Lăn čar.