Mâo Êpul hgŭm mnuih mă bruă Việt Nam čuăn ruah mkŏ mjing klei kƀĭn kluôm Êpul 10 êpul hgŭm mnuih mă bruă čar alŭ wăl Krĭng Dhŭng kwar krah leh anăn Krĭng Lăn Dăp Kngư, hlăm 2 hruê mơ̆ng 25 – 26/7, ti ƀuôn prŏng Kon Tum mkŏ mjing leh klei kƀĭn kluôm Công đoàn čar Kon Tum gưl tal 11, wưng thŭn 2023 – 2028. Hŏng hdră “Mlih mrâo - ngă phŭn - bi mguôp - đĭ kyar”, klei kƀĭn kluôm Công đoàn čar Kon Tum gưl tal 11, wưng thŭn 2023 – 2028 dưi ksiêm wĭt, bi klă bruă hluê ngă hdră mtrŭn Klei kƀĭn kluôm tal 10, wưng thŭn 2018 – 2023, bi klă mta kñăm, hdră êlan, bruă klam hlăm bruă mnuih mă bruă leh anăn bruă công đoàn wưng thŭn 2023 – 2028.

Wưng păn bruă êgao, khădah tuôm hŏng lu klei dleh dlan, klei lông dlăng kyua hmăi mơ̆ng klei ruă tưp Covid-19, ƀiădah bruă công đoàn čar Kon Tum ăt mâo lu boh tŭ dưn yuôm bhăn. Dŭm gưl bruă công đoàn hluê ngă jăk bruă bi ala, răng mgang klei dưi, boh tŭ djŏ hŏng hdră bhiăn, klă sĭt mơ̆ng đoàn viên leh anăn mnuih mă bruă. Klei kƀĭn kluôm Công đoàn čar Kon Tum gưl tal 11, wưng thŭn 2023 – 2028. Čuăn ruah leh Êpul khua kiă kriê Êpul hgŭm mnuih mă bruă čar wưng păn bruă mrâo hŏng 32 čô, ruah mă 8 čô bi ala nao hlăm klei kƀĭn kluôm tal 13 Công đoàn Việt Nam.