Hlăm klei kƀĭn mâo hdră brei klei blŭ bi mguôp kơ dŭm mta phŭn klei kƀĭn tal 5, Bruă kƀĭn ala gưl 15 leh anăn ksiêm dlăng, brei klei blŭ kơ đa đa mta phŭn djŏ tuôm hŏng bruă djuê ana. Nao hlăm klei kƀĭn mâo Khua hlăm phŭn bruă kđi čar, K’iăng khua bruă kƀĭn ala Trần Thanh Mẫn.

Blŭ gĭt gai hlăm klei kƀĭn, K’iăng khua bruă kƀĭn ala Trần Thanh Mẫn mñă ktang, Đảng leh anăn knŭk kna mâo nanao klei uêñ mĭn, ba mdah leh anăn hluê ngă lu hdră êlan djuê ana, đru mkŏ mjing klei hơĭt, đĭ kyar, mđĭ hnơ̆ng klei hdĭp leh anăn ai tiê kơ mnuih ƀuôn sang dŭm djuê ana. Bi êdah klă hlăm hdră mơ̆ng knŭk kna leh anăn hluê ngă klei ksiêm dlăng krah wưng păn bruă mơ̆ng bruă kƀĭn ala hŏng bruă hluê ngă hdră mtrŭn mrô 88 leh anăn mrô 120 bi klă hdră kluôm leh anăn hdră êlan duh bi liê hlăm hdră ala čar kñăm mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng wưng thŭn 2021 – 2030.