Blŭ hrăm gĭt gai Klei bi kƀĭn, Khua Anôk bruă kƀĭn ala Trần Thanh Mẫn čih yap lehanăn bi mni hdră ngă brua mơ̆ng Anôk bruă kƀĭn ala, dŭm anôk bruă, êpul êya mâo lu klei đru mguôp, gĭr ktưn, msir mghaih lu bruă hŏng boh tŭ êdah êdi. Mñă klă thŭn 2025 jing thŭn mkŏ mjing Klei bi kƀĭn bruă Đảng dŭm gưl, mđing truh kơ Klei bi kƀĭn kluôm ala tal 14 mơ̆ng Đảng, mprăp kơ hdră ruah khua Anôk bruă kƀĭn ala gưl 16 lehanăn ruah phung bi ala Êpul gơ̆ng bruă ƀuôn sang wưng thŭn 2026 - 2031.

Thŭn mkŏ mjing dŭm hdră kđi čar yuôm bhăn msĕ si bi hdơr 95 thŭn hruê mkŏ mjing Đảng, 135 thŭn Hruê k'kiêng Khua gĭt gai Hồ Chí Minh, 50 thŭn Hruê mtlaih êngiê kluôm kwar Dhŭng, hluh lir ala čar, 80 thŭn hruê mkŏ mjing ala čar, mprăp bi hdơr 80 thŭn hruê mkŏ mjing Hdră ruah khua Anôk bruă kƀĭn ala Việt Nam tal êlâo, Khua Anôk bruă kƀĭn ala Trần Thanh Mẫn mtă kơ Adŭ bruă kƀĭn ala, bruă Đảng anôk bruă lehanăn anôk bruă Công đoàn lŏ dơ̆ng mđĭ lar ai tiê đua klam, hgŭm mguôp, mĭn mrâo čiăng bi leh jih bruă klam mâo kčah jao./.