Blŭ pŏk klei bi kƀĭn, Khua bruă kƀĭn ala Vương Đình Huệ mñă kơ phung bi ala ksiêm duah klă nik, hlăk mblang, bi klă boh sĭt, čŏng pô, kluôm dhuôm dŭm boh tŭ dưn dưi mâo leh, ktrâo klă dŭm klei dôk mâo, klei dleh kpăk, ba mdah, hluê ngtă dŭm hdră êlan kñăm mâo mă boh tŭ dưn hĭn hlăm thŭn 2023, ksiêm dlăng, bi klă mta kñăm, hnơ̆ng čuăn leh anăn dŭm bruă klam, hdră êlan hluê ngă hdră mđĭ kyar bruă duh mkra ala ƀuôn, ngăn prăk knŭk kna thŭn 2024.

Êngao kơnăn, Bruă kƀĭn ala ksiêm dlăng, bi klă bruă mkra mlih đa đa mta phŭn mơ̆ng hdră mtrŭn mrô 53 kơ Klei hưn ksiêm duah hdră hrui wĭt lăn, tla hnô, đru anôk dôk mrâo mơ̆ng hdră tač êdeh phiơr prŏng Long Thành. Ksiêm dlăng bi klă boh tŭ hluê ngă hdră mtrŭn mrô 43 kơ hdră êlan ngăn prăk, ngăn prăk đru kơ hdră krŭ wĭt leh anăn mđĭ kyar bruă duh mkra ala ƀuôn, boh tŭ ksiêm wĭt hdră bhiăn hluê si hnơ̆ng čuăn hdră mtrŭn mro 101 mơ̆ng Bruă kƀĭn ala gưl 15.

Aguah mbruê, hlăm klei bi kƀĭn tal 6, Bruă kƀĭn ala gưl XV, Khua knŭk kna Phạm Minh Chính hưn mdah boh tŭ hlue hdră hdră kčah mđĭ kyar bruă duh mkra- ala ƀuôn thŭn 2024. Hlue si klei hưn, bruă duh mkra- ala ƀuôn lŏ dơ̆ng mđing kơrŭ wĭt, dưi mâo hdră kñăm kčah, bruă duh mkra Việt nam lŏ dơ̆ng jing klei mngač kơ bruă duh mkra kluôm rŏng lăn.  Hdră bruă duh mkra lŏ dơ̆ng dưi mđĭ ktang, mlih mrô, bruă dhar kreh, ala ƀuôn dưi mđing dlăng mđĭ kyar, mâo boh tŭ klă mngač hĭn. Mơ̆ng tur knơ̆ng boh tŭ mơ̆ng 9 mlan, đăo tĭng thŭn 2023 gĭr mâo ƀiă êdi 10/15 hnơ̆ng kčah leh anăn hgao hdră kčah. Mbĭt anăn Khua knŭk kna lač hdră kñăm kluôm, mbĭt anăn ăt lač 12 bruă klam, hdră msir thŭn 2024 leh anăn wưng kơ anăp, hlăm anăn mñă 15 hnơ̆ng kčah phŭn kơ bruă duh mkra, ala ƀuôn, wăl hdĭp mda.