Klei kƀĭn dưi mkŏ mjing leh knŭk kna ba mdah hdră ngă bruă wưng thŭn 2022 – 2026 hluê ngă asăp mtrŭn mrô 15 mơ̆ng Êpul khua bruă Đảng kơ bruă hŏng tač êngao bruă duh mkra đru kơ klei đĭ kyar ala čar truh ti thŭn 2030. Blŭ hlăm klei kƀĭn, Khua knŭk kna Phạm Minh Chính mñă ktang, mđĭ hĭn bruă hŏng tač êngao bruă duh mkra jing hdră êlan prŏng mơ̆ng Đảng leh anăn knŭk kna drei hlăm wưng mtrŭt mđĭ bi mrâo mrang ala čar.

Hdră ngă bruă mơ̆ng knŭk kna bi klă hdră “Thâo mĭn hŏng klei mbruă, ngă bruă ktang phĭt, bi mdrơ̆ng hŏng klei mbruă, mâo boh tŭ dưn, mă yuă grăp klei găl kơ klei đĭ kyar ala čar” leh anăn ba mdah 7 êpul bruă klam kñăm kơ bruă hŏng tač êngao bruă duh mkra mơ̆ng ară anei truh kơ thŭn 2026. Khua knŭk kna gĭt gai hlăm klei kƀĭn kñăm bi klă êlam kơ boh sĭt, dưn yua klei găl čiăng pŏk phai klei mnia mblei, duh bi liê, hiu čhưn ênguê, kreh knhâo – mrâo mrang, ba yua dŭm boh kdrŭt đĭ kyar mrâo. Mơ̆ng anăn, ba mdah dŭm hdră êlan hluê ngă tŭ dưn hdră ngă bruă anei mơ̆ng knŭk kna, hŏng ai tiê mjing klei arưp aram jing klei găl, bi klă dŭm boh klei čiăng ruh mgaih mtam, hluê ngă hnưm dŭm hdră tă, bruă klam hlăm wưng man dưi leh anăn sui.