Hŏng akŏ “Mtrŭt mđĭ klei bi mguôp bruă duh mkra, pŏk mlar klei găl duh bi liê dua tĭng”, klei kƀĭn trông mâo klei nao hgŭm mơ̆ng 400 knơ̆ng bruă 2 ala čar hŏng dŭm mta bruă phŭn msĕ si: mkra mjing mnơ̆ng ƀơ̆ng êa mnăm, ICT, kdrăp mrâo mtah, pui kmlă doh, dăng kông, rŭ mdơ̆ng, tuh tia mkă mjing, bruă lĭng kahan, mdrao mgŭn, êa drao, Internet, ênua mnia mblei, hdră bhiăn.

Blŭ hrăm hlăm klei kbĭn, Khua Knŭk kna Slovakia mñă klă klei mjĕ giăm plah wah dua ala čar mkŏ mjing hŏng tur knơ̆ng bi mguôp mơ̆ng sui leh anăn mta kñăm mơ̆ng gưl hriê čhưn anei jing mâo dŭm klei kuôl kă mđĭ hnơ̆ng klei mjĕ giăm hdră êlan. Khua Knŭk kna Robert Fico mñă ktang, Việt Nam jing ƀĭng hgŭm mnia mblei prŏng mơ̆ng Slovakia ti Ngŏ Dhŭng Asi, Slovakia hmăng hmưi mđĭ hĭn klei mnia mblei leh anăn ngă dŭm hdră klă klơ̆ng ti Việt Nam, boh nik hlăm dŭm mta bruă phŭn msĕ si bruă lĭng kahan, tuh tia, klei êđăp ênang hlăm Internet, mkra mjing oto leh anăn bruă mdrao mgŭn. Hlăm klei kbĭn, Khua Knŭk kna Lê Minh Hưng brei thâo ƀri gưl hriê čhưn ti Việt Nam tal anei, 2 čô Khua Knŭk kna mâo leh klei bi klă mbĭt kơ bruă mđĭ hnơ̆ng klei mjĕ giăm dua ala čar jing ƀĭng hgŭm hdră êlan, hluê anăn ba Việt Nam jing ala čar tal êlâo ti Ngŏ Dhŭng Asi mâo klei mjĕ giăm hdră êlan hŏng Slovakia, ba mơĭt klei hưn ktang kơ klei gĭr mơ̆ng dua ala čar čiăng mkŏ mjing ai ktang leh anăn pŏk mlar wăl anôk hdră êlan mrâo čiăng kơ dua ala čar mŭt hlăm wưng đĭ kyar mrâo, mâo kơhưm hĭn, kluôm êlam hĭn.