Dak Lak ară anei mâo hlăm brô 42.000ha durian, hŏng êbeh 26.000ha dôk hrui pĕ, hnơ̆ng mâo êbeh 440.000 tôn, ƀiădah ênhă mâo mrô krĭng pla mjing mrâo mâo mă 7.400ha. Lu mnơ̆ng dhơ̆ng kyuanăn ka dưi ba čhĭ hŏng êlan phŭn, bi hrŏ ênoh. Bi ala sa knơ̆ng bruă pla leh anăn hrui blei durian ti alŭ wăl brei thâo, klei dleh dlan amâo djŏ knŏng anôk ba čhĭ ƀiădah wăt klei ngă bruă hlăm lăn čar.

“Ti Lăn Dap Kngư, ênhă pla pluă anei prŏng ƀiădah amâo mâo mrô đang pla, amâo djŏ mơ̆ng China amâo mâo brei, ƀiădah kyua pô săng amâo mâo djŏ, jing mdei hĕ. Bi hdră mtrŭn 2481, 2480 čih klă jing pô čŏng ngă, čŏng hưn mdah leh anăn anôk bruă mŭt kbiă bi klă hluê si klei pô hưn. Kyuanăn ară anei tơdah msĕ si nah dlông amâo mâo găl guôp, dleh kpăk ti knơ̆ng bruă lŏ hma leh anăn wăl hdĭp mda srăng mkra mlih brei djŏ guôp.”

Mrô krĭng pla mjing jing klei găl tal êlâo čiăng tui duah phŭn agha, mâo djăp ênoh čuăn ba čhĭ hơĭt kjăp, bruă kriê dlăng srăng dưi ngă jêñ jêñ kluôm. Dŭm anôk hrui blei amâo djŏ knŏng čiăng kơ klei čih hưn mnơ̆ng dhơ̆ng mơ̆ng mâo, ƀiădah lŏ čiăng klă kơ hdră pla mjing, yua êa drao, hrui pĕ, đŭng hruh leh anăn dŭ mdiăng. Ti anăp klei čuăn anei, Phŭn bruă lŏ hma leh anăn wăl hdĭp mda dôk ngă hdră tui duah phŭn agha sa anăn hlăm kluôm ala. Kdrăp anei čih hưn mơ̆ng krĭng pla mjing, hdră mkra mjing, truh kơ ba čhĭ. Êjai mơ̆ng dhơ̆ng mâo hră mơar mrô, klei kriê dlăng, tui duah leh anăn bi klă bruă klam srăng pral, mngač hĭn mkă hŏng klei kriê lăng êlâo dih.

 Lê Anh Trung, khua êpul hgŭm durian Dak Lak brei thâo, bruă tui duah phŭn agha điện tử srăng đru ksiêm dlăng kluôm klei mkra mjing. Ară anei êpul dôk bi mguôp hŏng dŭm knơ̆ng bruă lông ngă, anăp truh bi kluôm jar bruă anei.

“Hmei ruah leh dŭm knơ̆ng bruă mprăp nao hgŭm lông ngă. Mphŭn kčưm, mă sa knơ̆ng bruă lông ngă kluôm čiăng mkra mlih dŭm klei găl, leh anăn kơh pŏk mlar. Dŭm knơ̆ng bruă êlâo dih diñu mâo leh klei bi mguôp, kyuanăn êjai ngă bruă amâo jing klei dleh dlan ôh. Ƀiădah boh klei jing drei srăng mâo dŭm klei mkra mlih, găl guôp hŏng dhar bruă durian. Ñu jing phŭn mơ̆ng klei mkra mjing truh kơ hrui blei, truh kơ mkra mjing leh anăn ba čhĭ.”

Hlue si Đặng Thị Thủy, k’iăng khua knơ̆ng bruă lŏ hma leh anăn wăl hdĭpmda čar Dak Lak, čiăng kơ kdră anei ngă bruă tŭ dưn, klei lông dlăng prŏng hĭn amâo djŏ hlăm kdrăp mrâo mrang ƀiădah srăng bi mlih klei mưng mkra mjing. Bĭng ngă lŏ hma srăng mưng hŏng klei čih pioh điện tử, ngă djŏ hdră bhiăn, knơ̆ng bruă srăng duh bi liê leh anăn bi klă mngač klei čih pioh, bi Bruă sang čư̆ êa alŭ wă mâo bruă klam mtô lač. Ƀiădah, Đặng Thị Thủy, mñă ktang alŭ  wăl dôk bi mguôp hŏng dŭm anôk bruă djŏ tuôm bi kluôm jar bruă čiăng dưi ba yua hrăm mbĭt leh anăn kluôm dhuôm:

“Jar bruă anei srăng bi klă hdră mkra mjing ăt msĕ mơh krĭng pla mjing ară anei pô ăt ka thâo klă, leh anăn ngă dŭm klei amâo mâo klă mngač hmăi tru kơ dhar bruă. Mbĭt anăn kdrăp ăt đru mđĭ hnơ̆ng jăk leh anăn kơhưm mnơ̆ng dhơ̆ng, bi mâo djăp klei čuăngtui duah mơ̆ng anôk ba čhĭ ară anei, leh anăn ƀrư̆ ƀrư̆ mkŏ mjing anăn knăl durian Dak Lak, Việt Nam đĭ kyar hŏng êlan hơĭt kjăp.”

 Nguyễn Văn Long, Khuah dhar bruă kreh knhâo – mrâo mrang, Phŭn bruă lŏ hma leh anăn wăl hdĭp mda brei thâo, kdrăp tui duah phŭn agha dôk ngă hŏng dhar bruă durian êlâo kơ ba yua kluôm mơ̆ng hruê 1/7/2026. Anei dưi dlăng jing klei bi mlih mơ̆ng kriê dlăng đưm jing kriê dlăng hŏng klei čih pioh, tur knơ̆ng yuôm čiăng mđĭ ai bi ktưn mơ̆ng boh mnga bruă lŏ hma Việt Nam.

“Hmei čiăng kơ jar tui duah phŭn agha amâo djŏ knŏng đru kơ bruă kriê dlăng, ƀiădah klă sĭt jing kdrăp mnơ̆ng yua tŭ dưn, ba wĭt boh tŭ klă klơ̆ng kơ knơ̆ng bruă leh anăn mnuih ƀuôn sang, đru mđĭ kơhưm durian Việt Nam ti anôk mnia mblei ala tač êngao”.

Mơ̆ng dŭm klei kpăk hlăm mkăp brei mrô krĭng pla mjing truh kơ klei čuăn ksiêm dlăng hnơ̆ng jăk ƀrư̆ hruê ƀrư̆ ktang, dhar bruă durian Dak Lak dôk ti anăp klei mlih prŏng. Êjai kdrăp anei dưi ngă hrăm mbĭt, grăp mnơ̆ng dhơ̆ng srăng mâo phŭn agha klă mngač mơ̆ng phŭn. Anei jing tur knơ̆ng čiăng bi klă hnơ̆ng jăk, mđĭ kơhưm leh anăn mkŏ mjing anăn knăl durian Dak Lak leh anăn Việt Nam ti anôk mnia mblei.