Ti Jakatar, Indonesia, Pô bi ala Vũ Hồ, Khua êpul SOM ASEAN Việt Nam ba anăp êpul bi ala Việt Nam nao hlăm klei kƀĭn trông Phung khua êmua gưl dlông ASEAN (SOM) leh anăn klei kƀĭn tal 15 Êpul ngă bruă êpul gơ̆ng gĭt gai ASEAN (ACCWG) kơ Timor-Leste mŭt hlăm ASEAN. Dŭm klei kƀĭn trông tal anei kñăm mprăp kơ Klei kƀĭn trông gưl dlông ASEAN tal 42 leh anăn dŭm klei kƀĭn trông Khua phŭn bruă hŏng tač êngao srăng mkŏ mjing ti mlan 5/2023 ti Indonesia.

Hlăm klei kƀĭn trông SOM, phung khua êmua gưl dlông ASEAN mâo klei bi trông leh anăn bi tŭ ư kơ hdră êlan hluê ngă dŭm mta phŭn tal êlâo mơ̆ng ASEAN hlăm thŭn 2023, mâo wăt bruă mtrŭt mđĭ klei đĭ kyar leh anăn krŭ wĭt, mđĭ ai dưi leh anăn boh tŭ hdră ngă bruă mơ̆ng ASEAN, bi mdrơ̆ng hŏng dŭm klei lông dlăng kơ klei êđăp ênang. Hlăm klei kƀĭn tal 15 Êpul ngă bruă Êpul gơ̆ng gĭt gai ASEAN kơ bruă Timor Leste akâo mŭt hlăm ASEAN, dŭm ala čar tŭ ư lŏ đru kơ Timor Leste mđĭ hĭn ai dưi, ƀrư̆ ƀrư̆ bi mâo djăp ênŭm dŭm hnơ̆ng čuăn mơ̆ng ASEAN.