Klei čih yap mơ̆ng anôk bruă hưn kơ klei mgei lăn leh anăn êa poh yă, Anôk bruă ksiêm dlăng boh lăn breih ƀuh, knŏng 20 hruê akŏ mlan 7, ti alŭ wăl kdriêk Kon Plông,  čar Kon Tum mâo truh 70 gưl mgei lăn. Êlâo kơnăn anôk bruă ăt čih yap mâo truh dŭm êtuh gưl mgei lăn ti alŭ wăl anei. Hdĭp ti krĭng nah tluôn knơ̆ng knơ̆ng êa akŏ Kon Tum, amai Trần Thị Thu leh anăn lu mnuih ƀuôn sang ti alŭ 3, să Tân Lập, kdriêk Kon Braih rŭng răng êdi sĭt grăp blư̆ mâo klei hưn kơ klei mgei lăn.

 “Alŭ ƀuôn sang tinei ti gŭ jơ̆ng knơ̆ng êa. Mnuih ƀuôn sang hmư klei mgei lăn jing rŭng răng êdi. Tơdah klei mgei lăn ti dlông ti mâo klei hmăi leh anăn pŏk êa mâodah êa lêč, mnuih ƀuôn sang ti nei êngăp jih yơh. Tơdah sơnăn amâo lŏ thâo si ngă srăng hdĭp ôh”.

Klă sĭt, dŭm êtuh klei mgei lăn hlăm wưng êgao ti Kon Plông, mnuih ƀuôn sang ƀuh mâo klei mgei jing ƀiă sơnăk. Mnuih ƀuôn sang thâo mâo klei mgei lăn, hlăm klei hưn mơ̆ng anôk bruă thơ̆ng kơ bruă leh anăn hlăm klei mrâo. Aduôn Bùi Thị Oanh, ti alŭ Vi Rin, să Đăk Tăng, kdriêk Kon Plông lač sơnei:

 “Mnuih ƀuôn sang tinei ăt ƀuh msĕ yăng đar. Ka ƀuh mnuih djiê ôh yă ngă hŭi. Ka ƀuh klei arưp aram lač sĭt gơ̆ sơnăn yơh. Tinei ka tuôm mâo klei prŏng ôh”.

Ti anăp klei mâo lu klei mgei lăn ti kdriêk Kon Plong, čiăng kơ mnuih ƀuôn sang amâo mâo rŭng răng leh anăn kăn luč klei răng, dŭm gưl bruă sang čư êa čar Kon Tum mđĭ leh bruă ktuê dlăng, hâo hưn, mtô brei hdră bi mdrơ̆ng čiăng bi hơĭt mnuih ƀuôn sang.  Ƀiădah, hluê si Nguyễn Hữu Tháp, k’iăng khua bruă sang čư êa čar Kon Tum, klei kpăk hĭn ară anei jing sa ka mâo ôh sa mta klei ksiêm duah êlam kơ klei mgei lăn ti alŭ wăl anei, anei jing mta klei truh yan adiê amâo thâo hưn brei răng hnưm ôh:

 “Lŏ dơ̆ng gĭt gai kơ dŭm knơ̆ng, dhar bruă, dŭm alŭ wăl, kdriêk Kon Plông kjăp hŏng Anôk bruă ksiêm duah čiăng ktuê dlăng, čŏng pô bi mdrơ̆ng hŏng klei mgei lăn. Čar Kon Tum ka mâo ôh klei hrăm kơ bruă kriê dlăng leh anăn bi mdrơ̆ng hŏng klei mgei lăn. Mñă kơ Êpul khua gĭt gai ala čar bruă gang mkhư̆ klei truh yan adiê mâo klei uêñ mĭn, đru kơ alŭ wăl đăo knăl, bi mdrơ̆ng tơdah mâo klei mgei lăn ti alŭ wăl čar”.

Hluê si klei čih yap mơ̆ng anôk bruă hưn kơ klei mgei lăn leh anăn êa poh yă, Anôk bruă ksiêm dlăng boh lăn, hlăm dŭm êtuh gưl mgei lăn ti kdriêk Kon Plông, čar Kon Tum mơ̆ng thŭn 2022 truh kơ ară anei, gưl mdei lăn ktang hĭn jing 4.7 độ ti knhal jih mlan 8/2022. Leh gưl mgei lăn anei, adŭ bruă Êpul gĭt gai ala čar bi mdrơ̆ng hŏng klei mgei lăn msĕ si ksiêm dlăng boh sĭt, mkŏ mjing bruă mtô bi hriăm mđĭ ai dưi, klei thâo kơ phung knuă druh dŭm să, wăl krah ti kdriêk Kon Plông, mkŏ mjing klei hriăm bi mdrơ̆ng hŏng klei êa lêč, klei mgei lăn…

Ƀiădah truh kơ ară anei ka mâo ôh sa klei ksiêm duah kreh knhâo êlam kơ mta phŭn, hnơ̆ng arưp aram mơ̆ng klei mgei lăn ti kdriêk Kon Plông, čar Kon Tum, mơ̆ng anăn mâo hdră êlan bi mdrơ̆ng djŏ guôp./.