Sa hruê knhal jih mlan 9, êdeh ôtô mdiăng hmei nao ti êlan gak răng knông lăn truh kơ anôk gak răng, răng mgang mrô 1 mơ̆ng kđông kahan knông lăn Ia Mơ, nao ti krah čư̆ dliê, dlăng kơ klei mtah ƀuh ti anăp, păt dah kâo wơr hĕ klei Khua bruă kđi čar ti kđông kahan Nguyễn Đức Hùng hưn kơ anôk gak răng dưi hing hang jing 3 amâo mâo: Amâo mâo pui kmlă dăng kông, amâo mâo êa yua, amâo mâo pui kmlă. Drông hmei jing phung knuă druh, lĭng kahan gak răng mâo leh giăm 1 hruê kăm, ƀô̆ mta diñu jŭ, asei kjăp msĕ si sa bĕ ana kyâo ti krah čư̆ dliê krĭng Lăn Dăp Kngư. Trung tá Rơ Lan Khúi, Khua êpul ksiêm dlăng bruă knŭk kna kđông kahan knông lăn Ia Mơ lač, ti knông lăn yan anei, ayŏng adei lĭng kahan knông lăn dôk mâo êa yua. Truh kơ yan bhang, mđiă mtrang msĕ pui čuh ngă kơ grăp čô bi blĕ êa hŏ hang. Trung tá Rơ Lan Khúi bi êdah: “Ti anôk gak răng anei mâo lu klei dleh dlan, pui kmlă amâo mâo, êa yan hjan mnei êa krông, hnoh êa. Yan mbhang amâo mâo mtam. Čiăng iêo đĭng blŭ hŏng mô̆ anak, mă bruă hŏng kđông kahan srăng nao truh ti êlan klah 3 anôk km 0 čiăng iêo đĭng blŭ. Bi ayŏng adei tŭ klei suăi yơh, bruă klam mơ̆ng Đảng leh anăn knŭk kna jao, ayŏng adei ăt bi klă mâo klei mĭn hơĭt ngă bruă knuă.

Hŏng phung lĭng kahan ti anôk gak răng, êa yuôm hĭn kơ mah. Diñu mđŭ grăp aruăt êa lĕ mơ̆ng tôl sang čiăng yua tŭk knă hlăm grăp hruê. Êa kƀah hin, pui kmlă lŏ kƀah hĭn mơh. Knŏng knang kơ masin bi êran djăp yua hlăm mmông mmăt, đa đa yua mă pui pit. Mrâo anei, anôk gak răng dưi mdưm kdrăp pui kmlă êran hŏng pil yang hruê ƀiădah ăt dôk mkra wĭt hlăm brô 2 mlan hŏng anei.

"Huă ƀơ̆ng, pĭt đih hlăm dliê" suăi êmăn msĕ sơnăn, ƀiădah phung knuă druh lĭng kahan kđông kahan knông lăn Ia Mơ mâo nanao klei mđĭ ai hdơ̆ng pô “hlăm kdrăp yua mơ̆ng phung lĭng kahan amâo mâo klei dleh dlan ôh ƀiădah knŏng mâo mă ai tiê găn hgao jih jang”. Grăp hruê, leh bi ruê̆ bruă klam hiu găk răng knông lăn, phung lĭng kahan grat mtah lŏ wĭt ti anôk bruă čiăng čoh bruă ngă hma, kriê dlăng đang djam pô. Thiếu tá Trần Văn Hạnh, ti kđông kahan knông lăn Ia Mơ brei thâo: “Čoh bruă ngă hma tinei jing pla djam hlăm yan hjan. Yan bhang amâo mâo dưi pla ôh. Rông mnŭ, phưi kan, rông bê mơ̆ng kđông kahan, pô kriê dlăng. Bi kơ klei huă ƀơ̆ng ăt mâo klei hơĭt”.

Ti krah čư̆ dliê amâo djŏ knŏng mâo mă ênai čĭm čap, lir knip mnê, ƀiădah lŏ mâo ênai mnŭ kdjô̆, jing klei mtah mơ̆ng đang djam puăn, đang tei hung. Anôk bruă lŏ rông sa phung bê mâo êbeh 20 drei čiăng bi hơĭt klei huă ƀơ̆ng aguah tlam mơ̆ng phung lĭng kahan. Thượng tá Nguyễn Đức Hùng, khua bruă kđi čar kđông kahan knông lăn Ia Mơ brei thâo, Kđông kahan knông lăn Ia Mơ kriê dlăng, răng mgang 12,6 km êlan knông lăn hŏng Campuchia. Kdrêč êlan knông lăn mơ̆ng kđông kahan răng mgang ka mâo ôh gơ̆ng bi knăl kyuanăn bruă klam răng mgang klei dưi kiă kriê jing dleh dlan êdi. Ƀiădah hŏng ai tiê răng mgang klei dưi kiă kriê ala čar, amâo mâo dưi mjhuak, knuă druh lĭng kahan kđông kahan knông lăn Ia Mơ bi klă nanao klei mĭn, klei kjăp, găn hgao klei dleh dlan čiăng bi leh jăk bruă klam dưi jao. Thượng tá Nguyễn Đức Hùng, mñă ktang: “Klei hdĭp aguah tlam ti anôk gak răng ăt adôk mâo lu klei dleh dlan, ƀiădah 100% amâo mâo ôh pô ngă amâo mâo jăk bruă klam ti dŭm anôk gak răng knông lăn. Bruă Đảng, êpul gĭt gai kđông kahan mâo nanao klei mđĭ ai leh anăn mlih tuôr knuă druh ti dŭm anôk dleh dlan, amâo mâo brei sa čô dôk sui đei.”

Găn lu yan mđiă ktang leh anăn yan hjan, krĭng knông lăn Ia Mơ mâo nanao phung lĭng kahan knông lăn gak răng – diñu msĕ si sa pŏk khil mgang klei êđăp ênang ti ƀăng jang knông lăn Ala čar.