Leh dưi tŭ yap jing krĭng ƀuôn sang mrâo hlăk thŭn 2017, dŭm thŭn êgao, să Dă Sar, kdriêk Lạc Dương, čar Lâm Đồng gĭr nanao čiăng bi kjăp leh anăn mđĭ hnơ̆ng čuăn krĭng ƀuôn sang mrâo mđĭ hnơ̆ng. Lu hdră bruă, klei mtrŭt mjhar dưi ngă tŭ dưn. Kyuanăn, bruă duh mkra – ala ƀuôn ti să mâo klei đĭ kyar, hŏng hnư hrui wĭt kah knar grăp čô thŭn 2024 mâo êbeh 60,4 êklăk prăk, đĭ 31,9 êklăk prăk mkă hŏng thŭn 2017. Čil Ha Ôñ ti să Dă Sar, kdriêk Lạc Dương brei thâo:

 “Tinei ƀuh klă mnuih ƀuôn sang mâo klei mlih hlăm bruă duh mkra, leh mtaih êngiê mâo klei đĭ kyar jăk, êlâo kơ mtlaih êngiê mă bruă knuă amâo mâo msĕ sơnei, kâo ƀuh klă klei anăn”.

Jing alŭ wăl mâo giăm 70% mnuih djuê ƀiă, kdriêk Lạc Dương uêñ mĭn nanao kơ bruă djuê ana. Hlăm anăn, hdră mkŏ mkra krĭng ƀuôn sang mrâo, kdriêk Lạc Dương đru mđĭ kyar bruă mkra mjing, mđĭ hnư hrui wĭt kơ mnuih djuê ƀiă. Kluôm kdriêk mâo 23 êpul hgŭm bruă, 36 êpul bi mguôp dôk ngă bruă hlăm bruă lŏ hma. Čil Poh, k’iăng khua bruă sang čư̆ êa kdriêk Lạc Dương brei thâo, lu klei bi hmô mkŏ klei mkra mjing, ba čhĭ, dưi đru kơ mnuih djuê ƀiă mđĭ kyar klei ba čhĭ mnơ̆ng dhơ̆ng.

Mnuih djuê ƀiă ti Lạc Dương ară anei kâo ƀuh klei hơ̆k mơak kyua klei mlih hlăm klei mă bruă knuă, mă bruă găl hĭn. Boh nik ară anei ƀrư̆ hruê ƀrư̆ đĭ kyar hlăm ƀuôn sang, hĭn kơnăn hlăm alŭ wăl mâo klei bi hmô bruă lŏ hma kdrăp mrâo mrang, bruă pla mjing ana mâo ênoh msĕ si boh hồng, atiso, teinan hruê̆ ba wĭt hnư prăk lu kơ mnuih ƀuôn sang, bi hơĭt klei hdĭp, hluê anăn đru mbĭt hŏng alŭ wăl hnưm mâo djăp 19 hnơ̆ng čuăn krĭng ƀuôn sang mrâo.

Hluê si klei tĭng mkă, čar Lâm Đồng mâo êbeh 350 knơ̆ng bruă, êbeh 50 êpul hgŭm bruă, êpul bi mguôp mơ̆ng mnuih djuê ƀiă ngă phŭn hŏng ênoh prăk bi klă êbeh 2.770 êklai prăk, amâo djŏ knŏng mkŏ mjing bruă mă bruă dŭm êbâo čô ƀiădah lŏ đru mguôp hlăm klei mđĭ kyar bruă duh mkra alŭ wăl. Liêng Hót Ha Kliêng ti să N’Thôl Hạ, kdriêk Đức Trọng jing sa hlăm dŭm gru hmô mơ̆ng Êpul phung khua thŭn hlăm bruă hluê ngă gru mngač Hồ Chí Minh. Ñu brei thâo, leh hruê mtaih êngiê thŭn 1975, ñu nao hgŭm hlăm bruă bi ring, hgŭm hlăm êpul hgŭm bruă, 8 thŭn ngă kahan ksiêm ƀuôn. Khua hlăm kahan ksiêm să. Ñu hluê ngă nanao hdră kčah mtrŭn mơ̆ng Đảng, hdră bhiăn lăn čar.

 “Kâo ngă bruă yang ƀuôn ăt čiăng mdei leh mơh, ƀiădah bruă sang čư̆ êa čiăng kâo ăt duh myơr. Kâo klam bruă phung khua thŭn hlăm ƀuôn. Kâo mă kơ jih jang, kâo kăn čiăng kơ prăk mlan. Êlâo dih dleh dlan hĭn êjai mrâo mtaih êngiê, nao ngă bruă răng mgang klei êđăp ênang ti alŭ wăl dleh êmăn ƀiădah ăt dưi bi leh jăk. Kâo hmăng hmưi phung mda asei lŏ hluê hriăm, mă bruă knuă, ngă djŏ hŏng klei kčah mtrŭn mơ̆ng Đảng, klei bhiăn lăn čar”.

Hlăm 5 thŭn êgao, hŏng ênoh prăk mơ̆ng dŭm hdră ala čar kñăm iêo mkrum leh 15.00 êklai prăk čiăng mkŏ mkra krĭng ƀuôn sang mrâo, ti čar Lâm Đồng mâo leh 76 hlăm 78 să krĭng mnuih djuê ƀiă jing să krĭng ƀuôn sang mrâo, 15 să ênŭm hnơ̆ng čuăn krĭng ƀuôn sang mrâo mđĭ hnơ̆ng, 4 să krĭng ƀuôn sang mrâo bi hmô. 5 thŭn êgao, jih jang ênoh prăk duh kơ krĭng mnuih djuê ƀiă ti čar Lâm Đồng êbeh 1.264 êklai prăk. Hluê anăn, đru bi hơĭt klei hdĭp mnuih ƀuôn sang krĭng mnuih djuê ƀiă. Truh kơ ară anei, hnơ̆ng gŏ sang mnuih djuê ƀiă ƀun ƀin hrŏ adôk hlăm brô 2%, hnư hrui wĭt kah knar grăp čô mâo 50 êklăk prăk. K’Beo, k’iăng khua Êpul gơ̆ng bruă ƀuôn sang să N’Thôl Hạ, kdriêk Tuy Đức, čar Lâm Đồng brei thâo:

 “Êlâo dih mnuih djuê ƀiă pô dôk kƀah klei thâo, amâo thâo mă bruă knuă, ƀun knap amâo mâo thâo jih. Leh hruê mtaih êngiê, hluh hlir lăn čar, mâo klei gĭt gai mơ̆ng Đảng, knŭk kna mnuih ƀuôn sang thâo čoh bruă ngă hma, klei hdĭp mda đĭ kyar, mlih lu sơnăk hŏng êlâo kơ ka mtaih êngiê. Bi kơ bruă mkŏ mkra, boh nik jing êlan klông dưi pŏk prŏng, mâo klei uêñ mĭn mơ̆ng gưl dlông. Mnuih ƀuôn sang hơ̆k mơak, bi mtă kơ hdơ̆ng pô mă bruă knuă, mđĭ hnư hrui wĭt”.

Dŭm klei mlih jăk ti krĭng mnuih djuê ƀiă čar Lâm Đồng jing klei bi klă kơ klei uêñ mĭn mơ̆ng Đảng, knŭk kna leh anăn klei gĭr mơ̆ng mnuih ƀuôn sang. Mơ̆ng sa krĭng lăn mơ̆ng dŭm klei dleh dlan, ară anei dưi bi mlih mâo êlan prŏng, dŭm klei bi hmô bruă duh mkra tŭ dưn hŏng klei hdĭp dhar kreh. Boh tŭ dưn anei amâo djŏ knŏng mđĭ hnơ̆ng klei hdĭp ƀiădah lŏ bi kjăp klei đăo knang mơ̆ng dŭm djuê ana hŏng dŭm hdră kčah mtrŭn mơ̆ng Đảng. Hŏng klei đĭ kyar anei, Lâm Đồng srăng lŏ bi klă kơhưm jing sa hlăm dŭm alŭ wăl nao êlâo hlăm bruă mkŏ mkra krĭng ƀuôn sang mrâo, đru mguôp hlăm klei đĭ kyar Lăn Dap Kngư leh anăn lăn čar.