Hluê si anôk bruă jai čar Dak Nông, 9 mlan êgao, kluôm prăk jia hrui wĭt mâo 1962 êklai prăk, knar hŏng 66,4% gưl dlông jao leh anăn knar hŏng 75,8% mkă hŏng wưng anei thŭn dih. Hnư knŭk kna hrui wĭt thŭn anei hrŏ lu kyua hmăi mơ̆ng lu mta klei. Hlăm anăn, čar dôk hluê ngă lu hdră êlan amâo mâo mă, bi hrŏ, bi kdung hruê tla prăk jia čiăng kơ dŭm knơ̆ng bruă krŭ wĭt bruă mkra mjing mnia mblei.

Knŏng bruă bi hrŏ 50% prăk jia răng mgang wăl hdĭp mda ngă hrŏ truh 100 êklai prăk hnư hrui wĭt mơ̆ng 9 mlan. Mbĭt hŏng anăn, hdră êlan bi hrŏ 30% jai prăk lăn thŭn 2022, bi hrŏ păk jia dŭm mta mnơ̆ng dhơ̆ng ăt bi hrŏ hnư hrui wĭt 120 êklai prăk. Boh nik klei mnia mblei sang lăn amâo mâo đĭ, bruă ba jao sang lăn ti alŭ wăl hrŏ hmăi kơ hnư hrui wĭt mơ̆ng lăn ala hlăm čar. Klă klơ̆ng, hlăm 9 mlan, hnư hrui wĭt mơ̆ng bruă yua lăn knŏng mâo mă 246 êklai prăk, knar hŏng 28,4% klei tĭng mkă alŭ wăl, knar hŏng 41,5% mkă hŏng wưng anei thŭn dih. Dhar bruă jia čar Dak Nông dôk gĭr hluê ngă dŭm hdră êlan čiăng bi mbŏ hnư hrui wĭt, rơ̆ng kơ prăk knŭk kna hrui wĭt thŭn 2023 djŏ hŏng hdră kčah.