Klei tŭ dưn mơ̆ng bruă rông êmô ana mđai, đru hlăm klei duah ƀơ̆ng ti Ia Pết, čar Gia Lai
Thứ tư, 14:13, 09/04/2025 Pô mblang Y-Khem Niê/VOV Tây Nguyên Pô mblang Y-Khem Niê/VOV Tây Nguyên
VOV4.Êđê- Hdră rông êmô ana mđai đru kơ klei duh ƀơ̆ng mơ̆ng mnuih ƀuôn sang ti să Ia Pết, kdriêk Đăk Đoa, čar Gia Lai, dưi pŏk ngă mơ̆ng thŭn 2022. Hdră anei dôk hlăm hdră ala čar kñăm mđĭ kyar bruă duh mkra – ala ƀuôn krĭng mnuih ƀuôn sang djuê ƀiă lehanăn krĭng čư̆ čhiăng lehanăn Hdră kñăm ala čar bi hrŏ ƀun hơĭt kjăp, ƀrư̆ ƀrư̆ dôk mđĭ lar boh tŭ dưn hŏng mnuih ƀuôn sang djuê ana ƀiă ti alŭ wăl anei.

Ia Pết jing să dleh dlan êdi hlăm čar Gia Lai. Să mâo êbeh 1.800 gŏ sang hŏng giăm 9.200 čô mnuih, hlăm anăn lu jing mnuih djuê ana Jarai lehanăn Bahnar. Čiăng mâo đru mnuih ƀuôn sang hlăm klei duah ƀơ̆ng, să Ia Pết mkăp kơ grăp gŏ sang ƀun, giăm ƀun  1 drei êmô ana mđai. Êmô blei hlăm alŭ wăl jing mjeh êmô djuê mrâo.

Êjai ngă bruă anei, să mkŏ mjing klei bi kƀĭn ƀuôn, ksiêm dlăng hlei gŏ sang năng tŭ mă êmô mbha anăn. Leh mâo ênoh dŭm gŏ sang dưi dưn klei đru anei, să mưn êdeh mdiăng mnuih ƀuôn sang nao truh kơ anôk mkăp êmô rông, čiăng kơ mnuih ƀuôn sang pô ruah mă ti êmô pô čiăng rông. Lữ Quốc Tuấn, Khua să Ia Pết, lač snei:

 “Ênoh knŭk kna đru blei êmô rông jing mơ̆ng 14 - 15 êklăk prăk. Êngao kơ prăk knŭk kna đru, mnuih ƀuôn sang lŏ bi mguôp thiăm, pioh blei êmô rông jăk hĭn. Ênoh tui si čoh čuăn jing sa drei bi mâo mơ̆ng 120 kg, ƀiădah lu mnuih ƀuôn sang bi ruah êmô ktrŏ êbeh 160 kg/drei. Diñu lŏ bi mguôp thiăm mơ̆ng 1 - 3 êklăk prăk/drei. Truh ti mmông anei, mâo leh 109 gŏ sang mnuih ƀuôn sang mâo đru êmô rông.”

Leh êbeh 3 thŭn mkŏ mjing klei đru êmô kơ mnuih ƀuôn sang rông, snăn lu gŏ sang dơ̆ng mâo êmô rông. Rmah Thim, djuê ana Jarai, ti ƀuôn Alphun, să Ia Pết, brei thâo:

 “Čiăng msir klei ư̆ êpa ƀun ƀin. Knŭk kna đru leh kơ mnuih ƀuôn sang rông êmô. Hlăm ƀuôn mâo leh lu mnuih rông êmô. Sang kâo rông 1 drei êmô ana mđai, sa th\n mđai sa drei”.

Mbĭt hŏng bruă mkăp êmô kơ mnuih ƀuôn sang, bruă sang čư̆ êa alŭ wăl lŏ ktrâo atăt hdră rông, lehanăn răng mgang klei ruă kơ êmô. Lê Minh Thu, knuă druh bruă lŏ hma să  Ia Pết, lač:

 “Êjai dôk ngă bruă anei, să iêo bi trông hŏng mnuih ƀuôn sang, mkŏ mjing hdră nao ruah êmô pô čiăng rông. Leh bi tŭ ư kơ bruă anei, să atăt mnuih ƀuôn sang truh kơ anôk rông êmô brei mnuih ƀuôn sang čŏng ruah, mtô mnuih ƀuôn sang mkra war êning, mtô bi hriăm hdră rông, bi mguôp hŏng anôk bruă rông êmô bi hriăm mnuih ƀuôn sang hdră rông. Mơ̆ng leh ngă bruă anei, truh kơ ară anei mâo leh dŭm gŏ sang tlaih leh mơ̆ng klei dleh dlan”.

Mâo klei đru jăk mơ̆ng bruă sang čư̆ êa, mnuih ƀuôn sang păn kjăp jih jang hdră rông êmô. Kyuanăn jih jang êmô đru anăn đĭ hriê kơ prŏng hŏng klei jăk, lehanăn dơ̆ng mđai. Nek, mnuih ti să Ia Pết, yăl dliê:

 “Sang kâo rông 1 drei êmô ana mđai, lehanăn mâo mđai leh sa lung. Klei hdĭp mdul leh, kâo mơak snăk. Kâo gĭt ktĭr duah ƀơ̆ng čiăng mâo klei đĭ kyar, bi mlih klei hdĭp, mđĭ ênoh mâo ba wĭt.”

Sa čô mnuih mơ̆ng ƀuôn Alphun, să Ia Pết, lač:

 “Kâo amâo mâo pưk hma ôh, ară anei knŭk kna đru mdơ̆ng brei sang , đru êmô rông. Kâo lač jăk kơ Đảng lehanăn knŭk kna lu êdi.”

Bruă mbha êmô pioh rông ti să Ia Pết mâo đru leh lu mnuih ƀuôn sang mdul hĭn hlăm klei hdĭp. Ară anei să hlăk lŏ dơ̆ng ngă bruă anei, kñăm dưi đru kơ dŭm gŏ sang pioh mđĭ kyar klei hdĭp mda, rŭ mdơ̆ng klei hdĭp knư̆ hrue knư̆ trei mđao./.

 

Pô mblang Y-Khem Niê/VOV Tây Nguyên

Viết bình luận

TIN CÙNG CHUYÊN MỤC

Video

 

Tiếng chuông ngân (Jingle Bells)
Ru em
27/11/2024
Vi yông ‘nhă kơ ba
11/11/2024
Bơto bơtê cau lòt lơh broă ngài
24/10/2023