Ară anei čar Hải Dương mâo 178/178 să mâo ênŭm hnơ̆ng čuăn krĭng ƀuôn sang mrâo, 43 să mâo ênŭm hnơ̆ng čuăn krĭng ƀuôn sang mrâo mđĭ hnơ̆ng leh anăn 4 să krĭng ƀuôn sang mrâo bi hmô, 12 kdriêk, wăl krah, ƀuôn prŏng mâo ênŭm hnơ̆ng čuăn krĭng ƀuôn sang mrâo amâodah bi leh bruă klam mkŏ mra krĭng ƀuôn sang.

Blŭ hlăm knăm anăn, Khua knŭk kna Phạm Minh Chính mñă klă, čar Hải Dương mâo leh lu klei gĭr leh anăn dưi mâo lu boh tŭ dưn, đru mguôp yuôm bhăn hlăm boh tŭ mbĭt kơ ala čar hlăm bruă hluê ngă hdră ala čar kñăm mkŏ mkra krĭng ƀuôn sang mrâo. Khua knŭk kna đăo knang, hŏng ai tiê mrâo, boh kdrŭt mrâo, klei gĭt ktưn leh anăn klei hmăng hmưi mrâo, Hải Dương lŏ dơ̆ng mâo lu boh tŭ dưn kơ klei đĭ kyar bruă duh mkra ala ƀuôn, mkŏ mra krĭng ƀuôn sang mrâo hlăm wưng kơ anăp.