Răk klei hưn mthâo ti Knăm bi hdơr kơ knhuah gru hruê anei mơ̆ng 50 thŭn êlâo, lĭng kahan lehanăn mnuih ƀuôn sang čar Bình Định pŏk leh hdră kdơ̆ng mblah mtlaih êngiê wăl krah Quy Nhơn lehanăn čar Bình Định hlăm hdră mblah Yan mnga thŭn 1975. Hdră mblah tŭ dưi hruê 31/3 mtlaih êngiê Bình Định jing klei bi êdah mơ̆ng hdră êlan khăp kơ ala čar lehanăn ai tiê jhŏng ktang, klei mmuñ dôk kwang nanao hưn lač kơ klei săn asei, klei mĭn cách mạng jhŏng ktang mơ̆ng lĭng kahan lehanăn mnuih ƀuôn sang drei.

Leh 50 thŭn mtlaih êngiê, Bình Định mâo hdră duh mkra amâo mdei pŏk mlar, mơ̆ng sa čar ƀun, ară anei kpưn đĭ dôk mrô 5/14 alŭ wăl krĭng Dưr kwar Krah lehanăn ktuê hang ksĭ kwar Krah, dôk tal 25/63 čar, ƀuôn prŏng kluôm ala. Nao lehanăn blŭ hrăm ti knăm anei, Khua anôk bruă kriê dlăng klei hâo hưn lehanăn đru čung ba mnuih ƀuôn sang gưl dlông Nguyễn Trọng Nghĩa tĭng dlăng, čar Bình Định mâo leh dŭm klei bi mlih jăk hlăm hdră mkra mlih klei ngă hră mơar, jak iêu klei duh bi liê, mđĭ kyar bruă tuh tia, hiu čhưn, mjuăt bi hriăm mnuih mă bruă, mđĭ kyar kdrăp mrâo, kdrăp mrô./.