Aguah anei 20/12, ti anôk bi kƀĭn ala čar ti ƀuôn prŏng phŭn Hà Nội, Êpul khua gưl dlông Đảng Cộng sản Việt Nam, Bruă Kƀĭn Ala, Khua lăn čar Việt Nam, Dhar bruă gưl dlông mặt trận čar kwar Việt Nam leh anăn Knơ̆ng gĭt gai lĭng kahan gưl dlông, Phŭn bruă lĭng kahan mkŏ mjing knăm bi hdơr 80 thŭn hruê mkŏ mjing lĭng kahan yang ƀuôn Việt Nam, 35 thŭn Hruê jih jang mnuih ƀuôn sang răng mgang klei êđăp ênang. Nao hlăm knăm bi hdơr mâo phung khua gĭt gai, phung khua gĭt gai hđăp mơ̆ng Đảng, knŭk kna, lĭng kahan, phung ngă bruă cáchj mạng, amĭ Việt Nam jhŏng ktang, khua kahan hlăm dŭm gưl.

Êdah hĭn hlăm knăm bi hdơr jing hdră yăl dliê kdŏ mmuñ hlăm 30 mnĭt, mâo dŭm klei kdŏ mmuñ, bi klah čŭn kơ hƀuê ênuk mkŏ mjing, kdơ̆ng mblah, mâo mă klei dưi mơ̆ng lĭng kahan ăt msĕ mơh bi klă bruă klam mơ̆ng lĭng kahan yang ƀuôn Việt Nam hlăm bruă mkŏ mjing leh anăn răng mgang lăn čar. Mđing truh kơ bruă yuôm bhăn anei, hlăm wưng êgao hlăm lăn čar mâo lu mta bruă klă klơ̆ng. Kluôm ala mâo leh êbeh 1.830 hdră kkuh drông bi hdơr, mâo ênoh hlăm brô 260 êklai prăk, ngă hdră mkra wĭt knưng bi hdơr kơ 32 čô lĭng kahan êpul Việt Nam hâo hưn mtlaih êngiê hŏng ênoh prăk 2,56 êklai prăk.