Klei kƀĭn trông gưl dlông ASEAN – Australia gưl tal 3 bi mni hdră êlan ngă bruă thŭn 2020 – 2024. Hlăm thŭn 2022, hnơ̆ng klei mnia mblei 2 tĭng mâo 101 êklai dolar Mi, êjai anăn FDI mơ̆ng Australia kơ ASEAN mâo êbeh 2 êklai dolar Mi. Khua knŭk kna Australia Anthony Albanese mñă klă dlăng yuôm bhăn ASEAN, ƀuăn hluê ngă hdră êlan bi mguôp bruă duh mkra Ngŏ Dhŭng Asi truh ti thŭn 2040, mkŏ mjing boh kdrŭt klei bi mguôp hdră êlan kluôm dhuôm ASEAN – Australia.

Hlăm klei kƀĭn trông gưl dlông ASEAN – Êpul hgŭm lu ala čar tal 13, dŭm tĭng bi kah mbha kơ hdră tă leh anăn ƀuăn bi myuôm hdră êlan lu tĭng, mpŭ kơ klei bhiăn, mđĭ hĭn klei bi mguôp bi mdrơ̆ng hŏng dŭm klei lông dlăng tar rŏng lăn. Khua kiă kriê Êpul hgŭm lu ala čar Antonio Guterres mñă klă, Êpul hgŭm lu ala čar čiăng mâo klei hrăm mbĭt mơ̆ng dŭm êpul êya lu tĭng msĕ si ASEAN leh anăn mñă brei mtrŭt mđĭ klei bi mguôp dua tĭng hlăm bruă hluê ngă dŭm mta kñăm mđĭ kyar kjăp, hlăm anăn kñăm kơ bruă bi mguôp mlih pui kmlă, mtô mjuăt bi hriăm mrô, bruă mdrao mgŭn, bruă mă, kriê pioh klei lu jơr mnơ̆ng dhơ̆ng hdĭp, bi mdrơ̆ng hŏng klei mlih yan adiê….Mñă klă Việt Nam jing ƀĭng hgŭm hur har, čŏng pô mơ̆ng ASEAN leh anăn Êpul hgŭm lu ala čar, Khua knŭk kna mñă klă Việt Nam amâo mâo mdei klei gĭr hŏng bruă đua klam hĭn, đru kơ dŭm mta bruă mbĭt mơ̆ng Êpul hgŭm lu ala čar, mđĭ hĭn klei nao hgŭm hlăm dŭm mta bruă răng mgang klei êđăp ênang, mbĭt anăn gĭr bi leh jăk dŭm bruă klam tar rŏng lăn jao leh.

Nah êngao klei kƀĭn trông, hruê mbruê, Khua knŭk kna Phạm Minh Chính mâo mmông bi tuôm hŏng Khua knŭk kna Australia Anthony Albanese leh anăn Khua êpul bi ala Russia, Khua phŭn bruă hŏng tač êngao Russia Sergei Lavrov.

Tlam hruê 7/9/2023, Phung khua kiă kriê dŭm ala čar ASEAN lehanăn Ƀĭng hgŭm nao leh ti Knăm mjưh ruê̆ Klei bi kƀĭn gưl dlông ASEAN tal 43, dŭm klei Bi kƀĭn gưl dlông djŏ tuôm lehanăn Knăm mlih jao păn ngă Khua kiă kriê ASEAN mơ̆ng Indonesia kơ Lào. Blŭ ti knăm anei, Khua kiă kriê mlih wir mơ̆ng ASEAN hlăm thŭn 2024, Khua knŭk kna Lào Sonexay Siphandone klă klơ̆ng hưn mthâo Mta phŭn thŭn ASEAN 2024 jing “Mtrŭt mđĭ hdră bi hgŭm lehanăn Čŏng đĭ kyar” hưn mthâo kơ d ŭm bruă phŭn, mđing kơ bru ă bi kjăp klei bi hgŭm mguôp, tŭ ư kơ bruă klam phŭn mơ̆ng ASEAN, mtrŭt mđĭ hdră mkŏ mkra Êpul êya bi hgŭm, đĭ kyar, h’ĭt kjăp lehanăn mdrơ̆ng kjăp hŏng dŭm klei lông dlăng, klei bi mlih pral dleh dưi ksiêm dlăng hlăm krĭng wăl. Leh 3 hruê mă bruă mjêč, Klei bi kƀĭn gưl dlông ASEAN tal 43, dŭm klei Bi kƀĭn gưl dlông djŏ tuôm tŭ jing jăk siam. Mmăt hruê 7/9/2023, Khua knŭk kna Phạm Minh Chính mbĭt hŏng Êpul bi ala Việt Nam đuê̆ leh mơ̆ng Indonesia wĭt kơ ala čar, mjưh ruê̆ jăk siam gưl hiu čhưn lehanăn mă bruă ti Klei bi kƀĭn gưl dlông ASEAN tal 43 lehanăn dŭm Klei bi kƀĭn gưl dlông djŏ tuôm./.