Đỗ Như Ý, ti ƀuôn prŏng Hà Nội jing sa hlăm dŭm pluh êbâo čô tuê hiu čhưn ênguê hriê ktuê dlăng kluôm dhuôm Knăm mơak kphê Ƀuôn Ama Thuôt gưl tal 8. Hŏng ñu, Knăm mơak kphê gưl anei dưi brei kơ ñu klei kđăm siam hlăm grăp hdră bruă. Ñu ăt mâo klei kñăm hŏng kphê Ƀuôn Ama Thuôt leh anăn klei ñŭ kma hŏng čư̆ dliê, anak mnuih leh anăn dhar kreh krĭng lăn:

Kâo nao hgŭm hlăm knăm mơak kphê Ƀuôn Ama Thuôt mơ̆ng hruê mkŏ mjing klei hriăm kdŏ mmuñ, truh kơ knăm mơak êlan dơ̆ng, mlam kdŏ mmuñ, knăm pui mngač. Kâo mnăm leh kphê ti êlan Phan Đình Giót…Kâo ƀuh knăm mơak thŭn anei jing krưh kơăm, mâo klei mơak mñai, yan adiê êđăp, anak mnuih jĕ giăm, kphê bŏ hŏng mnâo mnañ krĭng Lăn Dăp Kngư.

Êjai phung tuê hiu čhưn ênguê mơ̆ng anôk kbưi amâo mâo dưi wơr ôh 5 hruê knăm bŏ hŏng ênai mmuñ, pui mngač, lu mnâo ƀâo mngưi leh anăn ai tiê khăp kơ phung tuê mơ̆ng krĭng pla mjing kphê, phung mkŏ mjing knăm mơak leh anăn dŭm mta bruă nao mbĭt ti dŭm kdriêk, wăl krah hlăm čar ăt dôk tŭ mă dŭm klei ka jih. Hồ Sỹ Trung, khua kiă kriê đang pla mjing kphê V’Ori, kdriêk Krông Pač, čar Dak Lak brei thâo, anei jing gưl tal êlâo dŭm adŭ bruă ti kdriêk mkŏ mjing dŭm mta bruă sa ai hŏng Knăm mơak kphê Ƀuôn Ama Thuôt gưl tal 8, ƀiădah dưi mkŏ mjing dŭm gru kruăk amâo mâo dưi wơr. Măi kar kphê dưm ti Wăl kriê pioh hƀuê ênuk ala čar Kđông pla mjing kphê cada dưi ngă bruă jih hnơ̆ng čiăng đru kơ phung tuê hriê čuă dlăng kphê hnưm hĭn ti Việt Nam, nao čuă êlan lŏ bi êdah hƀuê ênuk kphê êbeh 100 thŭn mơ̆ng krĭng lăn anei. Hồ Sỹ Trung hmăng hmưi, dŭm hruê knăm mrâo êgao amâo djŏ knŏng dưi kđăm dŭm klei jăk siam, ƀiădah lŏ mbŏ klei khăp hŏng kphê, iêo jak thiăm phung mda asei đĭ kyar bruă anei, mkŏ mjing dhar kreh kphê kơ čar Dak Lak:

Grăp hruê mâo lu mnuih leh anăn mơak sơnăk leh dưi ktuê dlăng video farm (film mdar kơ klei bi hmô đang pla mjing kphê) leh anăn mnăm kphê, nao čuă dlăng hdră mkra mjing kphê hlăm êlan kphê Việt, phung mda asei lŏ nao truh ti sang dlăng hră kphê leh anăn thâo boh tŭ mơ̆ng kđông pla kphê kara jing phŭn agha kphê Việt Nam bi lar klei anăn truh kơ jih jang phung mda asei čiăng mâo thiăm sa hdră tă bruă mă sui…

Mâo lu mnuih hriê hŏng Knăm mơak kphê Ƀuôn Ama Thuôt gưl tal 8, Nguyễn Văn Lạng khua hđăp bruă sang čư êa čar Dak Lak, jing pô bi klă kluôm 8 gưl mkŏ mjing knăm Mơak. Jing sa hlăm phung mkŏ mjing Knăm mơak kphê, Nguyễn Văn Lạng bi klă, truh kơ gưl tal 8 mkŏ mjing, Dak Lak amâo djŏ knŏng dưi truh kơ bruă mkŏ mjing knăm mơak prŏng hĭn, lu jơr, thơ̆ng kơ bruă hĭn, leh anăn mâo lu klei ñu kma hŏng yang ƀuôn klă mngač hĭn.

Knăm mơak tal anei amâo djŏ knŏng bi mkŏ dŭm hdră bruă mơ̆ng bruă mkra mjing kphê, ƀiădah lŏ bi mguôp hŏng dŭm mta bruă mkăn bi êdah klei găl mơ̆ng Dak Lak jing arăng hriê tinei dưi ƀuh anăn jing ƀuôn prŏng kphê, mnuih ƀuôn sang grăp čô thâo raih kơ kphê leh anăn grăp čô dưi jing phung thơ̆ng kơ bruă hưn mdah kphê, jing jih jang nao hgŭm diñu myưng m’ang hưn mdah hŏng phung tuê, hŏng tar rŏng lăn.

Ăt jing sa čô ktuê dlăng 8 gưl mkŏ mjing knăm mơak, mbĭt anăn bi mguôp êlam hŏng êpul êya kphê Việt Nam, nai prĭn Trịnh Đức Minh, Khua gĭt gai Êpul hgŭm kphê Ƀuôn Ama Thuôt lač, Knăm mơak kphê gưl tal 8 klă klơ̆ng mđing truh kơ dŭm mta phŭn hlăm dhar kreh kphê, êjai pluă mbĭt dŭm pluh workshop leh anăn talkshow hlăm dŭm hdră bruă. Nai prĭn Trịnh Đức Minh mñă klă, Knăm mơak tal anei tu jing hlăm bruă hưn mdah boh tŭ dưn mơ̆ng bruă pla mjing kphê leh anăn dhar kreh krĭng Lăn Dăp Kngư, mâo klei tŭ jing tă hră kơ phung pô knăm mơak mâo dŭm knhuang êbat djŏ hlăm bruă mđĭ kyar bruă mkra mjing leh anăn bi mbŏ dhar kreh kphê kơ êdei anăp.

Knăm mơak anei hưn mdah hŏng phung ktuê dlăng lu dưi ƀuh klei prŏng hĭn mơ̆ng dhar kreh kphê. Sitôhmô dŭm workshop, dŭm klei blŭ hrăm hưn mdah kơ phin kar kphê leh anăn hlĭng êa kphê. Amâodah klei yăl dliê leh anăn mnăm kphê kar hŏng phĭn si ngă ñu. Knăm mơak ƀrư̆ ƀrư̆ đru kơ lu phung blei ba yua thâo săng boh tŭ mơ̆ng kphê leh anăn lŏ kač thiăm kơ kphê čiăng ngă bruă hiu čhưn ênguê.

Knăm mơak kphê Ƀuôn Ama Thuôt gưl tal 8, mkŏ mjing hlăm lu klei bi knăm jăk, hŏng ênoh kphê jing yuôm leh anăn hơĭt, mbĭt hŏng dŭm sang hjiê kphê Dak Lak ăt dôk bŏ dlan, hŏng 5 hruê knăm mơak mâo angĭn êđăp, hŏng dŭm hdră êlan prŏng mơ̆ng Ƀuôn Ama Thuôt dôk hlăm wưng dơ̆ng truh anăp. Trần Đức Nhật, kiăng khua bruă sang čư êa ƀuôn prŏng Ƀuôn Ama Thuôt brei thâo, alŭ wăl ăt dôk hlăm thŭn tal êlâo hluê ngă hdră hjăn mâo leh bruă kƀĭn ala bi klă, dôk ksiêm duah mkŏ mjing hdră mkŏ mjing Ƀuôn Ama Thuôt jing ƀuôn prŏng kphê tar rŏng lăn… Kyuanăn, klei tŭ jing mơ̆ng knăm mơak kphê gưl tal 8 mâo boh tŭ dưn yuôm bhăn hlăm wưng kơ anăp:

Mkŏ mjing tŭ jing Knăm mơak kphê Ƀuôn Ama Thuôt gưl tal 8 anei jing tur knơ̆ng brei kơ hmei bi leh hră mơar bi mbŏ hlăm hdră čuăn mkŏ mjing anăn knăl Ƀuôn Ama Thuôt jing ƀuôn prŏng kphê tar rŏng lăn, bi klă ti jing mta knăm, ti jing bruă klam phŭn mơ̆ng ƀuôn prŏng Ƀuôn Ama Thuôt srăng ngă hlăm wưng kơ anăp. Hmăng hmưi Ƀuôn Ama Thuôt srăng ba anăp jing anôk truh êjai bơ̆k bâo kơ Ƀuôn Ama Thuôt mơ̆ng Việt Nam jing bơ̆k bâo kơ sa ƀuôn prŏng kphê tar rŏng lăn.

Êbeh 100 thŭn pla mjing, mđĭ kyar kphê ti čar Dak Lak, giăm 20 thŭn knăm mơak Kphê Ƀuôn Ama Thuôt dưi mkŏ mjing, Ana kphê kma leh hlăm klei hdĭp leh anăn dhar kreh dŭm djuê ana hlăm čar, lar bra kluôm krĭng Lăn Dăp Kngư leh anăn kluôm ala. Mbĭt hŏng knăm mơak kphê mkŏ mjing 2 thŭn 1 blư̆, Dak Lak – Ƀuôn Ama Thuôt lŏ jing anôk mkŏ mjing dŭm klei bi lông kphê jăk yâo Việt Nam, ba kphê jăk yâo Việt Nam nao kơ tar rŏg lăn. Dưi mkŏ mjing wăl kphê siam leh anăn mâo boh tŭ kdlưn hĭn kơ bruă duh mkra. Êngao kơ năn, Knăm mơak čing čhar, Knăm mơak yan mnga dŭm mơ̆ng djuê ana krĭng Yŭ dưr, Ngŏ Dưr, Knăm mơak yang mnga Quan họ Bắc Ninh ăt kma mbĭt hŏng krĭng lăn anei. Đang war dhar kreh lu jơr hŏng kmeh gơ̆ng jing bruă duh mkra – dhar kreh kphê, dôk mkŏ mjing boh kdrŭt ba čar Dak Lak ƀrư̆ ƀrư̆ truh kơ mta kñăm pô, mkŏ mjing Ƀuôn Ama Thuôt jing anôk jưh jơ̆ng mơ̆ng kphê tar rŏng lăn.