Hrue mbrue, ti ƀuôn prŏng HCM, Knơ̆ng bruă sang čư̆ êa čar Daklak mkŏ mjing leh klei bi kƀĭn hŏng phung ngă bruă klei mrâo čiăng hưn mdah kơ knăm mơak kphê Buôn Ma Thuột tal 9 thŭn 2025, hŏng akŏ “Buôn Ma Thuột – anôk truh mơ̆ng kphê tar rŏng lăn”. Mkŏ mjing sui hlăm 5 hrue, mơ̆ng hrue 9 - 13/3, Knăm mơak kphê Buôn Ma Thuột tal 9 thŭn 2025 mâo lu mta mrâo mkă hŏng dŭm gưl mkŏ mjing êlâo, năng ai srăng mâo êbeh 200.000 čô tue hriê čhưn. Mâo lu bruă ngă mơ̆ng knăm mơak kñăm čiăng mđĭ kyar bruă duh mkra ti čar Daklak. leh 8 thŭn mkŏ mjing, knăm mơak kphê Buôn Ma Thuột jing leh klei kdloh ƀrŏng êdi mơ̆ng bruă kphê Việt Nam, mâo klei ling lar prŏng, mjing gru kđăm jăk hŏng anak mnuih lehanăn phung hiu čhưn hlăm ala čar lehanăn mơ̆ng ala tač êngao. klei anei, ăt jing bruă ngă kñăm bi hdơr 50 thŭn hrue  Buôn Ma Thuột mâo klei dưi, mâo suă mă čar Daklak hrue  (10/3/1975 - 10/3/2025).

Knăm mơak kphê thŭn anei mâo 17 mta bruă ngă, msĕ si: Rang mdah mnơ̆ng dhơ̆ng čhĭ mnia mơ̆ng bruă kphê, mnơ̆ng OCOP; klei bi lông đeh kphê jăk, klei bi trông hŏng ala tač êngao bruă bi hgŭm, mđĭ k’hưm kphê Việt Nam; mnăm kphê amâo mâo liê prăk oh hlăm kluôm čar, klei bi lông mtiŏ mran čông ti kdriêk Lăk, klei bi lông êman ti ƀuôn Đon…

Trần Hồng Tiến – Khua knơ̆ng bruă dhar kreh, mjuăt asei mlei lehanăn hiu čhưn êngue Daklak brei thâo, srăng iêo jao lu phung tue truh čiăng dlăng jih jang bruă mkŏ mjing jăk siam ti alŭ wăl./.