Mrâo čang rang aguah, Hồ Sỹ Trung, pô đang war V-Ori ti să Ea Yông, kdriêk Krông Pač, čar Dak Lak nao čuă dlăng leh đang kphê dôk msah hŏng êa nguôm. Dlăng kơ dŭm knuh mnga ƀrư̆ ƀrư̆ dôk mlih mơ̆ng êa uê jing êa kô̆. Hồ Sỹ Trung pŏk mtam kdrăp krih êa, wăt kơ đang hma amâo mâo kƀah êa ôh. Hồ Sỹ Trung brei thâo, anei jing sa hdră mnêč čiăng bi kdung hĕ hruê kphê blang mnga, rơ̆ng kơ đang kphê mâo mnga blang kô̆, bŏ hŏng mnâo ƀâo mngưi, đru kơ phung tuê hriê hŏng knăm mơak kphê Ƀuôn Ama Thuôt gưl tal 8:

 Hmei dôk mprăp hlăm grăp hruê, čiăng hrăm mbĭt hŏng alŭ wăl, mbĭt hŏng ƀĭng ngă lŏ hma čiăng tŭ drông grăp čô. Mâo sa klei ƀuăn jing kphê srăng blang mnga djŏ hŏng knăm mơak, mơ̆ng hruê 10-14. Tơdah čuăn hruê mnga kphê blang, čiăng mâo dŭm dhan mnga kô̆ bhung, ƀâo mngưi ti krah đang kphê. Tŭ drông grăp čô hriê hŏng Knăm mơak kphê Ƀuôn Ama Thuôt leh anăn hriê ti Krông Pač.

Mlan 3 ti čar Dak Lak jing yan kơ knăm mơak, ăt jing yan kphê blang mnga. Ƀiădah mta mnga kô̆ bhung mkŏ mjing anăn knăl mơ̆ng Dak Lak blang hĕ sa blư̆. Grăp đang kphê knŏng blang hlăm 2 gưl leh anăn grăp gưl knŏng sui mă hlăm 3 hruê. Kyuanăn, lu pô farm Kphê ti čar mkra mjing leh êa čê mơ̆ng mnga kphê čiăng dưi djăp pioh mnâo ƀâo mngưi hlăm lu mlan. Bi hŏng phung tuê, đa đa ruah leh hriê ti Ƀuôn Ama Thuôt êlâo kơ knăm mơak Kphê, čiăng dưi ktuê dlăng mnga kô̆ leh anăn mnăm êa čê. Aduôn Mai Thị Thu Thủy, sa čô tuê hiu čhưn ênguê mơ̆ng čar Ninh Bình truh leh ti ƀuôn prŏng Ƀuôn Ama Thuôt mơ̆ng knhal jih mlan 2, kyuanăn dưi thut leh mnâo ƀâo mngưi mơ̆ng mnga kphê ti đang pla mjing leh anăn mnăm mta êa čê mrâo, lông mñăm gưl tal êlâo, Aduôn Thuỷ brei thâo:

Leh nao dlăng đang kphê dôk blang mnga, mă rup hŏng mnga kphê, leh anăn dưi mnăm êa čê mơ̆ng mnga kphê anei jing jăk êdi. Kâo mĭn phung mniê srăng khăp êdi kơ klei mnăm êa čê anei.

Knăm mơak Kphê Ƀuôn Ama Thuôt gưl ta 8 thŭn 2023 klă klơ̆ng kčưm mơ̆ng mmăt anei jing knăm mơak mrâo êdi. Anăn amâo djŏ jing dŭm mta phŭn mrâo mơ̆ng êpul mkŏ mjing hrŏng ruah, mơ̆ng phung tuê tar rŏng lăn đru mguôp hŏng dŭm knhuah dhar kreh lăn čar pô, mơ̆ng lu mta kphê leh anăn phung kar kphê mơ̆ng Việt Nam leh anăn tar rŏng lăn. Knăm mơak kphê Ƀuôn Ama Thuôt tal anei lŏ mâo klei mrâo kyua mâo klei sa ai mơ̆ng grăp alŭ wăl hlăm čar, anôk mâo dŭm đang pla mjing durian, boh êrang, nhản, boh kruê̆, kruê̆ dŭng… ăt dôk blang mnga, bŏ hŏng mnâo ƀâo mngưi. Mâo dŭm ƀuôn êlan kwang hŏng ênai čing leh anăn khăp kơ phung tuê. Ti grăp alŭ wăl, ƀuôn êlan, mnuih ƀuôn sang čar Dak Lak dưi ƀuh klă pô jing phŭn mơ̆ng knăm mơak leh anăn srăng drông tuê hŏng klei jăk siam hĭn. Amai H’Tit Aliô̆, ti ƀuôn akŏ Dhông, ƀuôn prŏng Ƀuôn Ama Thuôt, sa ƀuôn mrâo dưi tŭ yap jing ƀuôn hiu chưn ênguê yang ƀuôn brei thâo:

Yan knăm mơak anei djŏ tuôm amâo mâo djŏ knŏng kphê, ƀiădah lŏ djŏ tuôm hŏng dhar kreh mnuih djuê ana Êđê ti Ƀuôn Ama Thuôt, kyuanăn ƀuôn sang hơ̆k mơak čang guôn êdi. Kâo ƀuh hlăm ƀuôn sang mơak m’ưr hĭn, dôk bi đru hdơ̆ng pô mprăp kơ knăm mơak kphê anei. Ƀuôn sang ăt mâo dŭm bruă ngă msĕ si tông čing čhar, klei huă ƀơ̆ng, mnăm kphê amâo mâo liê prăk. Hlăm ƀuôn ăt mâo dŭm gŏ sang msĕ si Aê Ray, Tăng Ƀi, sang mnăm kphê Arul, sang mnăm kphê Akŏ Dhông ăt dôk mprăp êmiêt kơ Festival tal anei.

Êbeh 100 thŭn đĭ hriê ti krĭng čư̆ čhiăng Dak Lak, mbĭt hŏng boh tŭ bruă duh mkra prŏng prĭn, kphê jing êa ƀlĭt kơ dhar kreh, mkŏ dhar kreh giăm 50 djuê ana mơ̆ng 3 krĭng kwar Dưr – Krah – Dhŭng. Mơ̆ng anăn mkŏ mjing sa yan mơak kluôm krĭng anei, mơ̆ng knăm mơak dhar kreh dŭm djuê ana yŭ dưr, ngŏ dưr, truh kơ yan mnga quan họ Bắc Ninh, knăm mơak kphê leh anăn knăm mơak Durian. Knăm mơak kphê Ƀuôn Ama Thuôt gưl tal 8, mơ̆ng hruê 10 -14/3, srăng ba truh kơ phung tuê klei yăl dliê dlông kơ ana kphê leh anăn dŭm mta ana kphê mkra mjing leh kơ dŭm djuê ana ti krĭng lăn anei.