Ayŏng Rơ Châm Dun, 30 thŭn, mnuih Jarai, ti ƀuôn Ngol Rông, să Ia Krêl, kdriêk Đức Cơ mâo Anôk bruă 74, Binh đoàn 15 ruah brei mŭt mă bruă riêk ktăk ksu mơ̆ng akŏ thŭn anei. Ayŏng brei thâo, hnơ̆ng prăk mlan 7 êklăk, ayŏng mâo leh klei hdĭp h’ĭt kjăp hĭn.

          “Êlâo mŭt mă bruă tinei, gŏ sang kâo dleh dlan êdi, ară anei mâo sang dôk, mâo bruă mă leh snăn kâo čang hmăng klei hdĭp srăng h’ĭt kjăp hĭn, êdei anei anak čô dưi nao sang hră m’ar, kâo lač jăk kơ anôk bruă đru leh kâo”.

Hŏng ayŏng Ksor Y Đô dôk ti să Ia Krêl, kdriêk Đức Cơ, mâo klei đru mơ̆ng knuă druh hlăm Anôk bruă 75, Binh đoàn 15, truh ară anei, ayŏng thâo kjăp leh kơ bruă lehanăn mâo jao đang ksu čiăng riêk mă ktăk:

 “Mŭt mă bruă tinei kâo thâo kjăp leh kơ bruă, dưi hriăm lu klei thâo kơ bruă. Êlâo adih ka hriăm, mŭt ti anôk bruă mâo phung nai, knuă druh mtô mtă kơ êlan riêk ktăk ară anei kâo thâo leh. Mơ̆ng hdră mtô, kâo đăo knang êdi kơ klei thâo kơ bruă mơ̆ng pô, mprăp mŭt ngă bruă čiăng mđĭ hnư hrui wĭt kơ gŏ sang”.

          Dŭm thŭn êgao, Anôk bruă 75, Binh đoàn 15, ti kdriêk knông lăn Đức Cơ, čar Gia Lai mjuăt bi hriăm giăm 2 êbâo čô riêk ktăk ksu jing mnuih ƀuôn sang djuê ƀiă ti krĭng anei mtam. Anôk bruă lŏ hluê ngă tŭ dưn hdră đru čung ba mnuih ƀuôn sang, hdră đru kơ yang ƀuôn, hŏng bruă jao êmô ana mđai kơ mnuih ƀuôn sang; Đru kơ adei nao sang hră, kơ phung hđeh ƀun; mkra êlan klông, mkra sang khăp čiăng, sang “Bi hgŭm mguôp”, mkŏ mjing klei čhưn Têt hŏng mnuih ƀuôn sang, mđup brei mnơ̆ng kơ gŏ sang knŭk kna dlăng ba… hŏng ênoh êbeh dŭm pluh êklai prăk.

Kơ hdră mjuăt bi hriăm bruă kơ mnuih ƀuôn sang alŭ wăl, Đại tá Trịnh Hà Tâm – Khua Anôk bruă ty 75 - Binh đoàn 15 brei thâo: 

 “Anôk bruă 75 thŭn anei mâo djăp leh mnuih mă bruă, 100% jing mnuih mă bruă ti alŭ wăl. Tơdah mjuăt bi hriăm pô srăng đru jih wăt mnơ̆ng dhơ̆ng, prăk kăk mâo wăt dhŏng riêk lehanăn mtô bi klă, nik kơ hdră riêk, kyua anăn phung mtô lehanăn knuă druh hrăm mbĭt nanao hŏng mnuih mă bruă”.

Dlăng kơ bruă klam mơ̆ng Binh đoàn 15 hlăm hdră hluê ngă hdră bruă djuê ana ti alŭ wăl, Trần Ngọc Phận, K’iăng khua Anôk bruă sang čư̆ êa kdriêk Đức Cơ brei thâo:

 “Anôk bruă mơ̆ng Binh đoàn 15 mâo dŭm êpul êya đru nanao kơ alŭ wăl hlăm hdră duh bi liê kơ anôk bruă nah gŭ, tĭng tla prăk mlan kơ mnuih mă bruă, lu jing mnuih djuê ƀiă. Boh nik bruă răng mgang klei êđăp ênang, bi hgŭm hŏng alŭ wăl hlăm hdră mkŏ mkra krĭng ƀuôn sang mrâo snăn anôk bruă ngă jăk snăk. Dŭm bruă dưi ngă, anôk bruă srăng pral nao đru, mjing bruă mă, mđĭ hnư hrui wĭt kơ mnuih ƀuôn sang čiăng rơ̆ng kjăp klei hdĭp mda.

Đại tá Khuất Bá Cao, Khua bruă Đảng, K’iăng khua gĭt gai Binh đoàn 15, brei thâo, klei mđing ruah mnuih mă bruă jing mnuih djuê ƀiă jing sa hdră mtrŭn yuôm bhăn mơ̆ng bruă Đảng, knơ̆ng gĭt gai Binh đoàn 15, đru mđĭ kyar bruă duh mkra, bi mđĭ klei hdĭp kơ mnuih ƀuôn sang, krơ̆ng kjăp klei êđăp ênang bruă kđi čar, klei êđăp ênang ala ƀuôn ti krĭng knông lăn:

 “Giăm 8000 čô mnuih ƀuôn sang djuê ƀiă mơ̆ng Binh đoàn mâo hmei mđing dlăng, hmei gĭt gai leh dŭm anôk bruă mơ̆ng binh đoàn mđing dlăng hĭn, mđĭ hnơ̆ng tŭ jăk ăt msĕ mơh mđing tal êlâo hlăm bruă ruah mnuih mă bruă jing mnuih djuê ƀiă čiăng rơ̆ng klei h’ĭt kjăp kơ hnư hrui wĭt, klei hdĭp kơ mnuih ƀuôn sang mbĭt anăn ba mdah hdră msir đru kơ mnuih ƀuôn sang kơ kdrăp mnơ̆ng, hdră mnêč, mjeh, prăk duh bi liê. Krơ̆ng kjăp hdră mtô mblang, mtrŭt mjhar mnuih ƀuôn sang mă bruă duh mkra pla mjing mâo klei thâo, ba yua kdrăp mrâo”./.