Hmư̆ hing Khua gĭt gai Đảng Nguyễn Phú Trọng djiê, knuă druh, đảng viên leh anăn dŭm gưl mnuih ƀuôn sang čar Tiền Giang ênguôt hnĭng êdi, lač anei jing klei luč liê prŏng êdi mơ̆ng Đảng, jih jang lĭng kahan, jing jang mnuih ƀuôn sang. Lê Trường Sơn, k’iăng khua Êpul gơ̆ng bruă ƀuôn sang kdriêk Tân Phước – krĭng Đồng Tháp Mười, čar Tiền Giang brei thâo:

   “Kâo ênguôt hnĭng kơ khua gĭt gai Đảng, kâo čiăng hia. Khua gĭt gai Đảng jih kyâo prŏng hlăm ênuk anei, jing pô bi êdah – pô hriăm mơ̆ng Awa Hồ dưi bi êdah knhuah hdĭp, knuih kniêng, klei mĭn jing sa čô cộng sản kpă ênô. Khua gĭt gai Đảng jing pô ngă bruă kđi čar dưi rơ̆ng kjăp hdră tă, klei mĭn, hdră êlan kơ mta kñăm, bi kdơ̆ng hŏng klei ƀơ̆ng ngăn čiăng răng mgang tur knơ̆ng klei mĭn, hmư̆ klei anei kâo čiăng luh êa ală”.

Đại đức Thích Minh Phước, pô kiă sang yơng Liên Hoa, să Xuân Đông, kdriêk Chợ Gạo, čar Tiền Giang mbĭt hŏng phung chư Tang, Ni hlăm čar ăt ênguôt hning êdi êjai hmư̆ hing khua gĭt gai lăn čar nao wĭt ti anôk lă lar:

"Hŏng kâo jing sa čô đăo yơng êjai hmư̆ hing awa Khua gĭt gai Đảng Nguyễn Phú Trọng djiê. Khădah thâo anăn jing hdră bhiăn hŏng grăp čô mnuih ƀiădah kâo ăt ênguôt êdi kyua lăn čar luč leh sa čô khua gĭt gai thâo êdi, siă suôr hŏng Đảng, hŏng mnuih ƀuôn sang. Awa đru kơ lăn čar truh kơ êwa knhal tuč. Năng pô mpŭ leh anăn bi mni. Kâo hdơr nanao kơ klei awa lač “sa čô mnuih knŏng hdĭp mă sa blư̆, srăng mâo boh tŭ dưn čiăng amâo mâo klei hƀlŏk kơ dŭm mtă bruă pô ngă amâo mâo jăk. Ya ngă prăk kăk, djiê dưi ba mbĭt mơ̆, kơhưm pô yơh jing klei yuôm bhăn hĭn. Awa kbưi leh hŏng mnuih ƀuôn sang Việt Nam čiăng wĭt hŏng ƀruih lăn ƀiădah bruă cách mạng leh anăn dŭm klei mtă yuôm bhăn mơ̆ng awa kơ mnuih ƀuôn sang srăng hdĭp nanao. Kkuh kơ rup Khua gĭt gai Đảng Nguyễn Phú Trọng”.

Yăl dliê kơ Khua gĭt gai Đảng Nguyễn Phú Trọng, Nguyễn An Chiến, sa čô đảng viên leh jih thŭn mă bruă ti ƀuôn hgŭm Cốc Lếu, ƀuôn prŏng Lào Cai lač, Khua gĭt gai Đảng Nguyễn Phú Trọng jing sa čô hriăm êdah êdi mơ̆ng khua gĭt gai Hồ Chí Minh, jing sa čô cộng sản kpă ênuah, jih klei hdĭp mă bruă kyua klei mĭn mơ̆ng Đảng, duh myơr kơ lăn čar, djuê ana. Boh nik hlăm klei mă bruă, Khua gĭt gai Đảng Nguyễn Phú Trọng jing sa hlăm phung khua gĭt gai êdah êdi hlăm bruă bi kdơ̆ng, gang mkhư̆ klei ƀơ̆ng ngăn, klei amâo mâo jăk.

 “Hmư̆ hing Awa djiê hmei bi kngăr êdi, ênguôt hnĭng êjai Đảng leh anăn knŭk kna luč sa čô anôk anak êdah êdi, sa čô khua gĭt gai dlưn hĭn mâo klei mĭn prŏng, sa čô ngă bruă kđi čar, lĭng kahan, bruă hŏng tač êngao mbruă hlăm bruă cách mạng Việt Nam”.