Kơiăng khua knŭk kna Lê Thành Long, Khua êpul hgŭm kriê dlăng krĭng Dap mnai êa krông Cửu Long gĭt gai Klei bi kƀĭn. Hluê si klei hưn mơ̆ng Phŭn bruă Hdră kčah lehanăn Duh bi liê, thŭn 2024, hdră mđĭ kyar bruă duh mkra ala ƀuôn krĭng Dap mnai êa krông Cửu Long dưi mâo leh boh tŭ dưn năng čih yap. Hnơ̆ng đĭ kyar bruă duh mkra mơ̆ng krĭng mâo 7,31%, đĭ hĭn mkă hŏng hnơ̆ng đĭ kah knar kluôm ala, hlăm brô 7%. Lu hdră bruă phŭn mơ̆ng krĭng dưi pŏk ngă, mkra mđĭ, mjing klei găl kơ hdră bi hgŭm mlir krĭng.

Khă snăn, hdră duh mkra – ala ƀuôn kluôm krĭng dôk dleh dlan, hnơ̆ng duh mkra krĭng điêt; 12/13 alŭ wăl hlăm krĭng ka bi knar bruă hrui – bi liê ngăn prăk, gru hmô đĭ kyar ka hơĭt kjăp. Klei trô̆ kma msĭn đĭ pral ngă kƀah êa yua aguah tlam lehanăn bruă duh mkra pla mjing. Blŭ klah čŭn ti knăm anei, Kơiăng khua knŭk kna Lê Thành Long mtă kơ dŭm alŭ wăl brei gĭr hluê ngă bruă klam kriê dlăng krĭng, msir mghaih dŭm klei lông dlăng dôk mâo. Hŏng dŭm hdră bruă phŭn mơ̆ng krĭng hlăm wưng ti anăp, brei mđing mkăp prăk duh kơ dŭm bruă phŭn mơ̆ng ala čar, hdră bruă nah gŭ đru mtrŭt mđĭ kyar bruă duh mkra – ala ƀuôn pral, hơĭt kjăp./.