Leh lu thŭn mkŏ mjing, Hdră Kphê bruă duh mkra - phung duh mkra mkŏ mjing grăp mlan mơ̆ng Knơ̆ng bruă sang čư̆ êa čar Kon Tum jing leh anôk dŭm anôk bruă duh mkra hâo hưn kơ bruă tuôm hlăm klei mkea mjing, bi liê, mnia blei hŏng klei gun kpăk kơ hdră mơar brei ruh mgaih. Msĕ si sa anôk bruă duh mkra duah mă mnơ̆ng hlăm gŭ lăn, wăt tơdah dưi djŏ rŭ mdơ̆ng ƀiădah amâo dưi ngă bruă ti anôk mă mnơ̆ng rŭ mdơ̆ng kyua amâo dưi mkŏ hlăm êlan dơ̆ng ala čar mrô 24 čiăng dŭ mdiăng. Huỳnh Thanh Tú, bi ala kơ anôk bruă duh mkra mâo klei blŭ:

“Hdră bruă mơ̆ng Knơ̆ng bruă Hoàng Khánh Trâm ti kdriêk Kon Plông. Anei jing hdră bruă mă mnơ̆ng hlăm gŭ lăn jing ngăn drăp mơ̆ng Knŭk kna. Knơ̆ng bruă sang čư̆ êa čar kčah mnơ̆ng duah mnơ̆ng hlăm gŭ lăn leh anăn ba bi lông duah mnơ̆ng. Anôk bruă duh mkra djŏ hdră bi lông ngă bruă thŭn 2019. Bi mklă Hdră bi liê djăp ênŭm jih leh ară anei nao akâo hră brei yua mnơ̆ng hlăm gŭ lăn snăn Knơ̆ng bruă êlan klông dŭ mdiăng lač jing kdrêč anei amâo dưi mkŏ ƀiădah amâo dưi mâo hră mkăp. Snăn ngăn drăp anei jing ngăn drăp Knŭk kna, čhĭ kơ arăng leh ƀiădah amâo brei arăng dŭ mdiăng.”

 Hdră kphê anôk bruă duh mkra- phung duh mkra čar Kon Tum jing anôk gĭt gao čar mđing hmư̆ leh anăn ƀuh boh sĭt ngă bruă mơ̆ng hdră ngă hră mơar knŭk kna, sĕ si Knơ̆ng bruă Hoàng Khánh Trâm, Lê Ngọc Tuấn, Khua Knơ̆ng bruă sang čư̆ êa čar Kon Tum, amâo knŏng ƀuh klei dleh dlan mơ̆ng sa anôk bruă duh mkra ôh ƀiădah lŏ ƀuh klei êdu kƀah bi lông kuai mă mnơ̆ng rŭ mdơ̆ng ti čar leh anăn gĭt gai msir mgai ti anôk phŭn:

“Klei anei đăm brei phung bi liê luč liê ôh. Jao kơ Knơ̆ng bruă êlan klông ktrâo lač pô bi liê ngă hră mơar bi khuăt leh anăn hưn hŏng Knơ̆ng bruă. Mơ̆ng ară anei truh kơ jih jang anôk mă mnơ̆ng rŭ mdơ̆ng brei rơ̆ng jih klei găl leh anăn kơh bi lông. Dưi djŏ ngă bruă snăn hlue ngă yơh amâo lŏ hun kpăk ôh. Êlâo dih diih ka ngă leh, leh bi lông ngă snăn pŏk ngă truh kơ lăn lĭng kahan, leh anăn truh kơ dliê, truh kơ anôk mkŏ. Klei anei amâŏ djŏ ôh mơ̆ng ară anei amâo lŏ mâo ôh klei anei”

Hlue si Trương Lê Mãnh, Khua Êpul hgŭm phung mda asei čar Kon Tum, dŭm anôk bruă duhb mkra ti čar ară anei mâo leh klei găl čiăng bi tuôm hŏng khua gĭt gai čar duah klei găl bi liê amâodah kčĕ klei čiăng, hưn kơ klei gun kpăk, dleh dlan. Dŭm klei bi tuôm snăn ăt mâo nanao grăp mlan ềao mơ̆ng Hdră Kphê bruă duh mkra - phung duh mkra amâodah hdră bi blŭ hrăm hŏng anôk bruă duh mkra mâo čar mkŏ mjing 6 mlan sa blư̆. Trương Lê Mãnh lač, anei jing hdră bi trông tŭ dưn klă sĭt:

“Hlăm dŭm hdră bi blŭ hrăm ăt msĕ mơh Hdră Kphê bruă duh mkra - phung duh mkra kyua Knơ̆ng bruă sang čư̆ êa čar mkŏ mjing jing sa hdră hâo hưn tŭ dưn čiăng kơ bruă sang čư̆ êa hmao, păn kjăp leh anăn ruh mgaih klei dleh dlan gun kpăk năng djŏ hĭn kơ anôk bruă duh mkra, duh bi liê. Phung khua gĭt gai čar mđing hmư̆ klei blŭ, amâo ñĕ ôh kơ klei dleh dlan anôk bruă duh mkra tuôm, gĭt gai ruh mgaih dŭm anôk gun kpăk bruă mkra mjing, mnia blei mơ̆ng anôk bruă duh mkra hlăm klei dưi mơ̆ng Knơ̆ng bruă sang čư̆ êa čar.”

 Mơ̆ng thŭn 2022 truh ară anei mơ̆ng dŭm klei bi blŭ hrăm leh anăn Hdră Kphê bruă duh mkra - phung duh mkra, khua gĭt gai čar Kon Tum čih yap 136 klei phung bi ala anôk bruă duh mkra akâo kơ čar.

 Hŏng klei gun kpăk mâo Khua gĭt gai čar Kon Tum ruh mgaih mtam tiñăn. Dŭm klei gun kpăki djŏ tuôm kơ lu gưl, lu dhar bruă khua gĭt gai čar bi mklă bruă klam, jao bruă klă klơ̆ng kơ grăp anôk bruă, alŭ wăl kƀĭn ruh mgaih kơ anôk bruă duh mkra. Klei tŭ hlăm 136 bruă ară anei mâo 126 bruă dưi msir mgaih, 10 bruă adôk lŏ dơ̆ng mđing dlăng ruah mgaih.

Hồ Thị Kim Oanh, Khua Knơ̆ng bruă êa drao Lâm Thịnh Kon Tum, brei thâo mrâo mphŭn čô̆ kơ bruă mkŏ mjing Knơ̆ng bruă thŭn 2019 snăn tuôm hŏng klei dleh dlan kyua Covid-19, hlăm hdră hgao klei dleh dlan bi mklă mnơ̆ng dhơ̆ng phŭn Čê sâm hlăm anôk ba čhĭ, knơ̆ng bruă mâo nanao klei hrăm mbĭt, đru mơ̆ng bruă sang čư̆ êa leh anăn bruă djŏ tuôm čar Kon Tum:

“Anôk bruă duh mkra mphŭb čô̆ kơ bruă snăn tuôm hŏng lu klei dleh dlan ƀiădah mâo klei găl anăn jing klei đru mơ̆ng dŭm hdră êlan mơ̆ng čar. Mơak snăk kyua hlăm wưng giăm anei čar mkŏ mjing dŭm hdră mkŏ, mđĭ kyar leh anăn msir mgaih klei êmuh, dleh dlan mơ̆ng anôk bruă duh mkra. Hdră Kphê bruă duh mkra - phung duh mkra hlăm mlan êlâoknơ̆ng bruă gmei kčĕ hdră mđĭ bruă mkra mjing čiăng dưi hgŭm hlăm anôk ba čhĭ dleh hĭn. Khua gĭt gai čar mơĭt leh klei hmei čang hmăng kơ Knơ̆ng bruă kreh knhâo leh anăn kdrăp mrâo. Ară anei snăn hmei dôk mă bruă hŏng anôk bruă mâo klei dưi mtô bi hriăm ăt msĕ mơh mkăp hră bi mklă ISO”.

Ai tiê hrăm mbĭt ruh mgaih klei dleh dlan đru kơ anôk bruă duh mkra đĭ kyar ti čar Kon Tum mâo êpul êya duh mkra dôk mkra mjing, mnia blei leh anăn phung bi liê bi mni. Mlan 4/2023 ti Knăm hưn mdah ênoh mrô bi ktưn gưl čar thŭn 2022 kyua Êpul hgŭm mnia blei leh anăn tuh tia mkra mjing Việt Nam mkŏ mjing, Kon Tum bi kngăr snăn tơdah đĭ 24 gưl mkă hŏng thŭn 2021 dăp tal 37/61 čar, ƀuôn prŏng. Anei jing tal lu hĭn čar dưi mâo hlăm 16 thŭn êgao. Čiăng kơ bruă hrăm mbĭt ruh mgaih klei dleh dlan đru kơ anôk bruă duh mkra đĭ kyar hĭn klă sĭt, tŭ dưn, čar Kon Tum dôk kƀĭn hlue ngă lu hdră msir čiăng lŏ dơ̆ng mkra mlih wăl bi liê mnia blei, mđĭ klei dưi bi ktưn. Mbĭt anăn mâo hdră êlan đru mđĭ kyar ktang bruă duh mkra êngao knŭk kna, mphŭn čô̆ kơ bruă, mjing wăl mtăp mđơr hlăm klei ba yua klei găl plah wah phung duh mkra, bi liê, mđĭ bruă pŏk ngă ba yua kdrăp hâo hưn, mlih mrô; mđĭ hnơ̆ng jăk êpul knuă druh, phung mă bruă, phung mâo klei dưi đru hlăm klei ngă bruă, đru kơ anôk bruă duh mkra./.