Thu krô, mđiă ktang sui ară anei dôk ngă kơ lu wăl dliê ti čar Kon Tum tlă anăp hŏng klei hŭi hyưt pui ƀơ̆ng. Ti čar mâo leh đa đa klei pui ƀơ̆ng dliê ngă kơ 2 čô djiê. Ară anei, mnuih ƀuôn sang, pô dliê, Êpul êya djŏ tuôm ti čar Kon Tum dôk jih ai gang mkhư̆ klei pui ƀơ̆ng dliê. Klei hưn mơ̆ng Anôk bruă kriê dlăng dliê čar Kon Tum brei ƀuh, ară anei mâo leh 8/10 kdriêk, ƀuôn prŏng hlăm čar dôk hlăm klei hưn brei răng kơ klei arưp aram pui ƀơ̆ng dliê gưl 5 – jing gưl arưp aram êdi. Ti dŭm kdriêk nah Yŭ msĕ si Ia H’Drai, Sa Thầy, Đăk Tô, Ngọc Hồi mâo giăm 230.000ha dliê mâo klei huĭ hyưt pui ƀơ̆ng ktang.

Anôk bruă kriê dlăng dliê čar Kon Tum brei thâo, mbĭt hŏng bruă gang mkhư̆ klei pui ƀơ̆ng dliê, bruă sang čư êa čar ăt bi leh kluôm ênŭm dŭm klei čuăn čiăng mkŏ mjing klei sa ai hlăm bruă gang mkhư̆ klei pui ƀơ̆ng dliê. Ti anăp klei dleh dưi ksiêm dlăng mơ̆ng yan adiê, klei không kƀah êa năng ai dôk sui, klei hŭi hyưt pui ƀơ̆ng dliê jing lu êdi, mnuih ƀuôn sang, pô dliê, êpul êya djŏ tuôm leh anăn bruă sang čư êa dŭm gưl ti čar Kon Tum dôk jih ai gang mkhư̆ klei pui ƀơ̆ng dliê.