Hdră bruă anôk pla mjing rông ŭn mă kđeh ba yua kdrăp mrâo leh anăn pla   lu mta ana mâo Knơ̆ng bruă Thiên Thành Tài pŏk ngă ti alŭ Khơk Klong, să knông lăn Rờ Kơi, kdriêk Sa Thầy, čar Kon Tum. Hlue si Khua gĭt gai Knơ̆ng bruă anei, hdră bruă dưi hlue ngă hlăm ênhă êbeh 21 ha lăn, ênoh bi liê 165 êklai prăk. Hdră kñăm hdră bruă jing grăp thŭn rông 2 gưl ŭn mă kđeh mâo jih jang 48 êbâo drei.  Mbĭt hŏng anăn jing msir mgaih djah djâo, pla lu mta ana hŏng ênoh bi liê mĭn tĭng grăp thŭn hlăm brô 300 êklai prăk leh anăn mjing brua mă kơ hlăm brô 100 čô mnuih.

Phạm Văn Thành, Khua Êpul hgŭm kriê dlăng Knơ̆ng bruă Thiên Thành Tài brei thâo, hlăm hdră pŏk ngă, knơ̆ng bruă mâo klei đru jăk mơ̆ng bruă sang čư̆ êa alŭ wăl leh anăn bruă djŏ tuôm čar Kon Tum:

“Hmei bi mklă duh bi liê hlăm anôk anei mâo klei đru jih ai tie emơ̆ng Knơ̆ng bruă sang čư̆ êa čar Kon Tum, ăt msĕ mơh jing bruă mơ̆ng Knơ̆ng bruă sang čư̆ êa kdriêk Sa Thầy mjing leh klei găl kơ Knơ̆ng bruă ktuê dlăng, ruah anôk ăt msĕ mơh hlăm bruă ruh mgaih anôk ala. Tal dua jing dŭm knơ̆ng, dhar bruă ăt mjing keh klei găl kơ knơ̆ng bruă hlăm klei bi leh hră mơar čiăng kơ Knơ̆ng bruă dưi pŏk ngă hlăm wưng pral hĭn”.

Čiăng dưi iêô jak phung duh bi liê mjing klei găl mđĭ kyar bruă duh mkra- ala ƀuôn, leh klei bi kƀĭn bruă Đảng čar Kon Tum tal XVI hlăm mlan 9/2020, čar KOn Tum kƀĭn mkra mđĭ wăl duh bi liê, mđĭ hâo hưn kơ dŭm hdră bruă iêô jak duh bi lie leh anăn mprăp hrăm mbĭt hŏng anôk bruă duh mkra. Čiăng ƀư̆ mkra, hmao msir mgaih klei gun kpăk phung duh bi liê, Knơ̆ng bruă sang čư̆ êa čar Kon Tum mđĭ lar hdră “Kphê anôk bruă duh mkra mnia blei” hlăm krah mlan grăp mlan, mkŏ mjing “Klei bi kƀĭn bi blŭ hrăm hŏng anôk bruă duh mkra sa thŭn 2 blư̆. Mbĭt hŏng gưl čar, ti dua krĭng bruă duh mkra phŭn, bruă sang čư̆ êa ƀuôn prŏng Kon Tum leh anăn kdriêk Kon Plong ăt mđĭ lar lu hdră bi tuôm, bi trông, đru kơ anôk bruă duh mkra duah klei găl duh bi liê msĕ si mkra mjing, mnia blei. Nguyễn Thanh Mân, Khua Knơ̆ng bruă mặt trận Knơ̆ng bruă sang čư̆ êa ƀuôn prŏng Kon Tum, brei thâo:

“Tơdah phung duh bi liê nao ksiêm hriăm snăn ƀuôn prŏng srăng jing anôk bruă lŏ mkŏ jih jang bruă phung duh bi liê mđing dlăng, msĕ si hưn mthâo kơ lăn ala, hưn mthâo kơ hră mơar. Ƀuôn prŏng hŏng dŭm knơ̆ng. dhar bruă đua klam čiăng kčĕ kơ Knơ̆ng bruă sang čư̆b êa čar mjing klei găl jăk hĭn kơ phung duh bi liê.  Tơdah phung duh bi liê dleh dlan snăn ƀuôn prŏng srăng jing phung tal êlâo msir mgaih amâo brei phung duh bi liê čŏng ksiêm duah”.

 Hŏng lu hdră msir jăk, leh êbeh 2 thŭn pŏk ngă Hdră mtrŭn klei bi kƀĭn bruă Đảng čar tal XVI, Kon Tum iêô jak 68 hdră bruă bi liê hŏng ênoh čih anăn êbeh 18 êbâo êklai prăk. Năng mđing amâo djŏ knŏng ti krĭng găl ênưih ôh, ti dŭm krĭng taih kbưi, krĭng mnuih djuê ƀiă adôk lu klei dleh dlan msĕ si Tu Mơrông, Đăk Tô, Sa Thầy… ăt iêô jak phung duh bi liê hŏng lu hdră bruă dưi pŏk ngă ti alŭ wăl. Huỳnh Thị Thúy Hà, K’iăng Khua Knơ̆ng bruă Hdră kčah leh anăn duh bi liê čar Kon Tum, brei thâo čar dôk lŏ dơ̆ntg iêô jak phung duh bi liê hlăm lu mta bruă msĕ si: mkra mjing êa drao, mkra mjing bruă tuh tia, êa pui êwa čuh, hiu čhưn ênguê, bruă lŏ hma yua kdrăp mrâo… Leh anăn čiăng kơ Kon Tum jing anôk truh mơ̆ng phung duh bu liê, čar dôk gĭr mkra mlih wăl duh bi liê mnia blei:

“Čar bi mklă bruă mkra mlih wăl duh bi liê mnia blei, đru kơ anôk bruă duh mkra jing sa boh phŭn yuôm bhăn čiăng iêô jak duh bi liê, mđĭ kyar bruă duh mkra- ala ƀuôn ti čar. Čar mđing mđĭ ktang mkra mđĭ hră mơar. Dŭm gưl, dŭm dhar bruă msir mgaih hră mơar hŏng dŭm hdră bruă mâo leh hdră êlan duh bi liê čiăng dŭm anôk bruă duh mkra hnưm pŏk ngă hdră bruă dưi hmao ƀuh leh anăn tŭ dưn.  Gĭt mjing klei găl iêô jak phung duh bi liê mâo klei thâi, jih ai tiê kơ čar”.

Čiăng mkŏ mjing wăl duh bi liê mtăp mđơr, klă mngač, djŏ hdră bhiăn, čar Kon Tum ară anei ăt dôk gĭr msir mgaih klei kƀah ti dŭm hdră bruă phung duh bi liê amâo hlue ngă klei ƀuăn rơ̆ng. Mbĭt anăn msir mgaih bi jăk phung, êpul bruă mâo klei ngă dleh dlan, mtŭk mtŭl hlăm hdră phung duh bi liê nao ksiêm dlăng, ktuê dlăng leh anăn duh bi liê ti čar./.