Dlăng klei čih hlăm Knăm bi hdơr, Dương Văn Trang,  Khua  Êpul gơ̆ng bruă ƀuôn sang čar Kon Tum lŏ bi hdơr hƀuê ênuk, knhuah gru krŭ kdơ̆ng ktưn hưn mơ̆ng čar Kon Tum hlăm 110 thŭn rŭ mdơ̆ng leh anăn đĭ kyar. Hŏng kơhưm hdră bruă yuôm bhăn, hlăm hruê 9/2/1913, Anôk bruă mâo klei dưi kluôm Đông Dương (Indosin) mâo Hdră mtrŭn mkŏ mjing anôk bruă knŭk kna čar Kon Tum giăm sa krĭng prŏng ti Dưr lăn Dap Kngư čiăng mđĭ ktang klei kiă kriê leh anăn ba yua ngăn dŏ wăl hdĭp mda.

Amâo klam klei jing hlŭn kơ Prăng, mnuih ƀuôn sang dŭm djuê ana čar Kon Tum jhŏng kgŭ kdơ̆ng, bi hgŭm bi kdơ̆ng hŏng phung roh. Hŏng klei mphŭn mkŏ mjing mơ̆ng Bruă Đảng čar hlăm knhal jih mlan 9/1930, Kon Tum jing anôk tal êlâo ti krĭng lăn Dap Kngư mkŏ mjing Đảng Cộng sản. Găn 2 klei bi blah bi kdơ̆ng hŏng phung roh Prăng leh anăn Mi, kahan leh anăn mnuih ƀuôn sang čar Kon Tum ti gŭ klei gĭt gai mơ̆ng Đảng jhŏng mbĭt hŏng lĭng kahan mnuih ƀuôn sang kluôm ala kyua anăn klei kdrưh kơăm đru mguôp hlăm Klei tŭ dưi Yan mnga thŭn 1975 hluh lir lăn čar.

 Ară anei, čar Kon Tum mâo 10 anôk bruă ngă hră mơar gưl kdriêk hŏng ênoh mnuih ƀuôn sang giăm 590 êbâo čô. Hnơ̆ng đĭ kyar bruă duh mkra mơ̆ng čar ti hnơ̆ng man dưn; bruă duh mkra bi mlih hlue hdră jăk; ênoh gŏ êsei ƀun hrŏ ti gŭ 11%; klei hdĭp mda mnơ̆ng dhơ̆ng leh anăn ai tiê mnuih ƀuôn sang dưi mđĭ. Ktưn hưn kơ knhuah gru krŭ kdơ̆ng mơ̆ng čar Kon Tum hlăm bŏ 110 thŭn rŭ mdơ̆ng leh anăn đĭ kyar, Khua hlăm bruă Đảng gưl dlông, Khua dlăng bruă Đảng čar, Khua Êpul gơ̆ng bruă ƀuôn sang čar Kon Tum Dương Văn Trang bi mklă:

“Mbĭt hŏng kluôm ala, čar Kon Tum dôk kjăp ktang hlăm ktuê êlan mkŏ mjing leh anăn răng mgang čar kwar. Lŏ dlăng wĭt ktuê êlan 110 thŭn bŏ hŏng kdrưh kơăm, ƀrư̆ đru brei thâo săng leh anăn ktưn hưn kơ klei leh êgao, thâo săng djŏ kơ ară anei, đăo knang kjăp hlăm êdei anăp hlăm ktuê êlan Đảng, Awa Hồ leh anăn mnuih ƀuôn sang ruah leh.  Drei ngă kơ hƀuê ênuk yuôm bhăn djuê ana mngač nanao, năng hŏng klei aduôn aê êbâo thŭn mkŏ mjing ala čar Việt Nam yang ƀuôn ngă phŭn “ƀuôn prŏng sah mdrŏng, ala čar ktang, mnuih ƀuôn sang êngiê , mtăp mđơr, mdrŏng sah”.

Blŭ hrăm hlăm knăm bi hdơr 110 thŭn Hruê mkŏ mjing čar Kon Tum, Khua hlăm Phŭn bruă kđi čar, Khua hlăm Bruă Đảng gưl dlông Võ Văn Thưởng mñă klă: Kon Tum jing krĭng lăn mdrŏng hƀuê ênuk, dhar kreh. Găn dŭm klei dleh dlan, dŭm djuê ana čar Kon Tum mkŏ mjing, kriê pioh, mđĭ lar ai tiê khăp kơ ala čar, bi hgŭm, kreh kriăng, mbruă, sa ai tiê hluê Đảng, Awa Hồ krŭ kdơ̆ng, đru kơ krĭng lăn Dap Kngư.

Čiăng kơ čar Kon Tum lŏ dơ̆ng đĭ kyar ktang, kjăp, Khua anôk dlăng bruă Đảng Võ Văn Thưởng mtă dŭm mta phŭn čiăng kơ dŭm gưl bruă Đảng, êpul bruă Đảng, knŭk kna, bruă mặt trận, êpul hgŭm čar Kon Tum mđing hlăm wưng kơ anăp, anăn jing:

“Dŭm gưl bruă Đảng, Êpul bruă Đảng, grăp čô knuă druh, Đảng viên leh anăn mnuih ƀuôn sang dŭm djuê ana hlăm čar brei thâo săng djăp ênŭm bruă klam, klei găl, klei mâo, hŏng klei dleh dlan lông dlăng, mă klei hriăm yuôm bhăn hlăm bruă bi kdơ̆ng mtlaih êngiê djuê ana, mkŏ mjing leh anăn răng mgang ƀuôn sang dŭm thŭn êgao, mđĭ lar knhuah gru dhar kreh, hƀuê ênuk, krŭ kdơ̆ng mơ̆ng čar, krŭ wĭt ktang klei mĭn, klei čang hmăng, mjing ñu jing klei ktang, bruă ngă klă klơ̆ng mơ̆ng grăp êpul bruă đảng, grăp čô knuă druh, đảng viên leh anăn mnuih ƀuôn sang, hrăm mbĭt, hgao djăp klei dleh dlan mkŏ mjing ƀuôn sang Kon Tum mđĭ kyar pral, kjăp leh anăn jăk siam hĭn.”

 Mbĭt hŏng Dhar bruă Đảng gưl dlông Võ Văn Thưởng ăt mtă kơ čar Kon Tum lŏ dơ̆ng mlih mrâo mđĭ kyar, bi mlih ktang klei bhiăn bruă duh mkra hlue hdră đĭ kyar djŏ guôp čiăng mđĭ kyar kjăp, răng mgang wăl hdĭp mda, mdrơ̆ng hŏng klei bi mlih yan adiê, kriê dlăng leh anăn mđĭ lar hƀuê ênuk, mnơ̆ng dhar kreh dŭm djuê ana, mguôp hŏng đĭ kyar hiu čhưn ênguê, kƀĭn hâo hưn mtô mblang, iêo jak mnuih ƀuôn sang lăm lui klei kthŭl mluk, amâo djŏ guôp; kơrŭ wĭt klei ktưn hưn mơ̆ng mnuih ƀuôn sang dŭm djuê ana hlăm bruă mkŏ mjing leh anăn răng mgang ƀuôn sang, lăn čar; mđing mkra mđĭ, răng kriê klei êđăp ênang kđi čar, êđăp ênang ala ƀuôn ti alŭ wăl…

Hlăm Knăm bi hdơr 110 thŭn hruê mkŏ mjing čar, Kon Tum ăt hưn mdah leh anăn tŭ mă Hdră mtrŭn mơ̆ng Khua knŭk kna tŭ yap ƀuôn prŏng Kon Tum jing ƀuôn prŏng mta II ti čar. Leh anăn mâo klei kdŏ mmuiñ hŏng akŏ “Nao phă yang hruê” leh anăn rang mdah klei mnah phao briêng kkuh drông čar Kon Tum 110 thŭn mkŏ mjing leh anăn mđĭ kyar./.