Mmông hâo hưn kơ hdră bruă Mmông boh lăn thŭn 2023 mơ̆ng Êpul bruă êdam êra knơ̆ng bruă pui kmlă Kon Tum mkŏ mjing iêo jak klei nao hgŭm mơ̆ng 900 čô hđeh sang hră mơ̆ng sang hră gưl 2 – gưl 3 Đăk Bla, ƀuôn prŏng Kon Tum. Klei jăk jing jih jang dŭm klei êmuh mđăo mâo dŏ pah mni djŏ tuôm hŏng bruă mkiêt mkriêm pui kmlă msĕ si, yua pui kmlă mkiêt mkriêm hlăm adŭ hriăm, gŏ sang, thâo kral dŭm kdrăp yua lu pui kmlă, čuăn ruah dŭm kdrăp yua mkiêt mkriêm pui kmlă…phung hđeh sang hră mâo klei wĭt lač djŏ leh anăn klă. Adei Chu Thị Thanh Tuyền, hđeh sang hră adŭ 9D brei thâo:

“Leh hdră anei kâo thâo săng klă hĭn kơ boh tŭ mơ̆ng hdră Mmông boh lăn čiăng mkiêt mkriêm pui kmlă, răng mgang wăl hdĭp mda mơ̆ng klei mlih yan adiê. Kâo mâo dŭm bruă ngă mkiêt mkriêm pui kmlă msĕ si ti sang hră leh anăn hlăm sang jing mdjiê hĕ dŭm kdrăp yua tơdah amâo mâo yua, kbiă mơ̆ng sang pô mdjiê jih dŭm mta mnơ̆ng yua pui kmlă. Kâo hmăng hmưi dŭm bruă ngă điêt anăn srăng đru hlăm bruă răng mgang wăl hdĭp mda mơ̆ng klei mlih yan adiê”.

Hŏng bruă klam meh gơ̆ng, dhar bruă pui kmlă čar Kon Tum mâo lu hdră hâo hưn, mtrŭt mjhar jĕ giăm hŏng mnuih ƀuôn sang. Thŭn anei bi klă hâo hưn kơ phung hđeh sang hră, anôk bruă bi mguôp hŏng sang hră mơar mkŏ mjing dŭm mmông hriăm kơ phung hđeh. Mbĭt hŏng anăn jing hâo hưn hŏng pano, áp phích, băng rôn…leh anăn hlăm mbah hla pŏk, internet yang ƀuôn, mbah fanpage. Adŭ bruă mnia mblei knơ̆ng bruă bi mguôp hŏng Êpul bruă êdam êra pluă mbĭt hluê ngă hdră “Hrăm mbĭt hŏng adei nao sang hră” bi mguôp hâo hưn kơ hdră Mmông boh lăn thŭn 2023. Grăp bruă hlăm hdră dưi bi lar klei hưn “Mkiêt mkriêm pui kmlă – jing klei mưng”.

Nguyễn Quang Hùng, k’iăng khua kiă kriê knơ̆ng bruă pui kmlă Kon Tum brei thâo, anôk bruă hmăng hmưi bi lar klei yuôm bhăn mơ̆ng hdră “mkiêt mkriêm pui kmlă – jing klei mưng” nao giăm hĭn hŏng mnuih ƀuôn sang, boh nik jing mơ̆ng phung hđeh sang hră. Mơ̆ng anăn bi lar bruă anei truh kơ gŏ sang, ƀĭng găp leh anăn hĭn kơ năn jing kluôm yang ƀuôn. Hŏng dŭm bruă hâo hưn, mâo leh dŭm klei mlih hlăm klei mĭn leh anăn bruă ngă mơ̆ng mnuih ƀuôn sang kơ bruă yua pui kmlă mkiêt mkriêm čiăng răng mgang wăl hdĭp mda, bi mdrơ̆ng hŏng klei mlih yan adiê:

“Hâo hưn mkiêt mkriêm pui kmlă ăt msĕ hŏng sa ai hŏng Hdră mmông boh lăn jing bruă ngă jêñ jêñ. Knơ̆ng bruă pui kmlă Kon Tum ksiêm duah dŭm hdră êlan, dŭm bruă ngă ênưih nao hlăm klei mĭn mơ̆ng mnuih ƀuôn sang, mâo lu hdră mdê mdê ti grăp krĭng. Dŭm gŏ sang leh anăn knơ̆ng bruă ară anei ăt kñăm leh kơ klei mkiêt mkriêm pui kmlă čiăng mđĭ boh tŭ klei ngă bruă mơ̆ng knơ̆ng bruă. Bi hŏng dŭm gŏ sang mâo klei thâo săng leh anăn klei mkiêt mkriêm lu hĭn”.

Hŏng hdră Mmông boh lăn thŭn 2023, hnơ̆ng pui kmlă dưi mkiêt mkriêm ti čar Kon Tum jing 2.400 kWh. Klei anei brei ƀuh ai lar bra ktang phĭt mơ̆ng dŭm bruă hlăm mông boh lăn thŭn 2023. Klei năng mơak jing bruă mkiêt mkriêm pui kmlă amâodah knŏng mdei mă hlăm 1 mmông ti knăm 7, hruê kăm knal tuč mlan 3 mkŏ mjing hdră bruă mmông boh lăn, ƀiădah jing leh bruă jêñ jêñ hlăm grăp hruê.