Kyua hmăi mơ̆ng angĭn êbŭ mrô 6, mơ̆ng tlam hruê 26/10, ti čar Kon Tum mâo adiê hjan prŏng hlăm lu anôk, hlăm anăn ti kdriêk Đăk Glei hnơ̆ng adiê hjan prŏng mơ̆ng 80-120mm. Dŭm kdriêk Ia H’Drai, Kon Plông, Đăk Tô, Kon Braih, Ngọc Hồi, Sa Thầy leh anăn ƀuôn prŏng Kon Tum hnơ̆ng adiê hjan mơ̆ng 50-80 mm.

Pŏk ngă hdră mdrơ̆ng hŏng angĭn êbŭ mrô 6, Knơ̆ng bruă sang čư̆ êa čar Kon Tum gĭt gai 10 kdriêk, ƀuôn prŏng boh nik 3 kdriêk nah Ngŏ, Ngŏ Dưr ti čar, mâo Đăk Glei, Tu Mơ Rông leh anăn Kon Plông ngă jăk klei gĭt gai mơ̆ng Knŭk kna, Phŭn dhar bruă gưl dlông leh anăn mơ̆ng čar kơ klei mđĭ bruă gang mkhư̆ klei yan adiê ngă. Lŏ dơ̆ng ktuê dlăng bi kjăp boh klei adiê hjan êa lip, hlue ngă hdră “4 tinăn”, mdrơ̆ng, msir mgaih klei yan adiê ngă, klei truh leh anăn tui duah phung mâo klei truh, pŏk ngă hdră răng mgang, rơ̆ng êđăp ênang kơ mnuih, ngăn drăp mnuih ƀuôn sang, rơ̆ng êđăp ênang leh anăn krĭng mbĕ đuĕ mnuih ƀuôn sang.