Ti tač sang hră gưl 2 Nguyễn Văn Cừ, ƀuôn prŏng Ƀuôn Ama Thuôt, čar Dak Lak, phung hđeh sang hră hơ̆k kdơ̆k hŏng dŭm klei hlăp lêñ msĕ si ktŭng klei, guôm ală. Adei Nguyễn Việt Hùng, hđeh sang hră adŭ 8B brei thâo, anei amâo djŏ knŏng jing klei hlăp lêñ ƀiădah lŏ jing hdră ksiêm hriăm kơ knhuah gru djuê ana, mơ̆ng sang hră mkŏ mjing ƀri wưng bi hdơr hruê djiê mtao Hùng.

      “Hŏng hdră kâo ktưn hưn kơ knhuah gru djuê ana leh anăn brei kơ kâo mâo lu klei hriăm kơ knhuah gru. Kâo ƀuh klei lač jăk kơ ai mkŏ mjing lăn čar mơ̆ng mtao Hùng. Jing sa čô hđeh sang hră kâo čiăng kriăng hriăm hră čiăng amâo bi êdu ai phung nai, amĭ amaleh anăn năng jing amuôn thâo gưt mơ̆ng Awa Hồ”.

Bi adei Trần Văn Bảo hriăm adŭ mbĭt ƀuh klă klei jăk leh anăñ klei hriăm mơ̆ng klei hlăp mgưt mơ̆ng phung ƀĭng găp hlăm adŭ hriăm kơ klei yăl dliê “bánh chưng bánh giầy”.

 “Diñu ngă mgưt lăng jăk êdi, hơ̆k mơak leh anăn kâo ƀuh jăk hĭn jing klei ngă mgưt kơ klei yăl dliê “bánh chưng bánh giầy”. Klei hlăp ngă mgưt anăn jing tŭ dưn leh anăn mâo lu klei hriăm kơ hƀuê ênuk. Kâo ăt mâo klei hriăm jing drei srăñg gĭr hriăm hră mơar čăng mkŏ mjing leh anăn đru jing sa čô jăk kơ yang ƀuôn”.

Mơ̆ng akŏ mlan 3 hruê mlan blĕ, nai leh anăn hđeh sang hră ti sang hră gưl 3 Nguyễn Văn Cừ hriăm dŭm klei kdŏ mmuñ čiăng nao hlăm mmông hriăm êngao adŭ grăp tuôr. Hŏng akŏ “Dòng máu Lạc Hồng” gưl hriăm tal anei mđing truh bi hdơr hruê djiê mtao Hùng (hruê 10/3 hruê mlan blĕ). Nai Vũ Thị Thu Hằng, khua êpul Lịch sử - Địa lý – Giáo dục công dân mơ̆ng sang hră brei thâo: Amâo djŏ knŏng jing sa mmông hriăm ƀiădah hmei čiăng ƀuh klă boh tŭ dưn mơ̆ng hruê bi hdơr hruê djiê mtao Hùng, čiăng kơ phung hđeh thâo kơ klei khăp kơ  lăn čar amâo djŏ knŏng bi êdah hŏng klei blŭ ƀiădah lŏ bi êdah hŏng bruă ngă klă klơ̆ng.

  “Hlăm hdră dòng máu Lạc Hồng, êpul mtô kơ phung hđeh ksiêm hriăm, leh anăn duah dŭm klei mmuñ lač kơ ênuk Âu Cơ, Lạc Long quân leh anăn brei diñu ngă klei hlăp mgưt klei yăl dliê bánh chưng, bánh dày mơ̆ng ênuk mtao Hùng, yăl dliê kơ mtao Hùng lŏ čuê bruă mtao kơ Lang Liêu, klei yăl dliê êtuh asăr boh hŏng klei kdŏ mơ̆ng phung hđeh. Mơ̆ng dŭm mta bruă anei đru kơ phung hđeh lŏ duah klei hlăp lêñ knhuah gru mơ̆ng dŭm krĭng kwar čiăng mkŏ dŭm mmông hriăm jăk hĭn”.

Čiăng đru kơ phung hđeh thâo klă kơ hƀuê ênuk, sang hră ăt mkŏ mjing klei bi lông ksiêm hriăm kơ ênuk mtao Hùng, iêo jak lu phung hđeh sang hră nao bi lông. Diñu bi mbha êpul čiăng wĭt lač dŭm klei êmuh hƀuê ênuk, dhar kreh leh anăn klei yăl dliê kơ phung mtao Hùng. Mbĭt hŏng anăn, dŭm adŭ lŏ mprăp hlăp ngă mgưt dŭm klei yăl dliê hing ang msĕ si Sơn Tinh – Thủy Tinh; bánh chưng, bánh giầy…mơ̆ng anăn đru kơ phung hđeh ƀuh klă leh anăn êlam hĭn kơ hƀuê ênuk djuê ana. Adei Nguyễn Hoàng Nam, adŭ 8C, sang hră gưl 2 Nguyễn Văn Cừ, hơ̆k mơak brei thâo:

      “Kâo ngă mgưt anak mtao Đệ Nhị hlăm mmông hlăp mgưt kơ klei yăl dliê bánh chưng, bánh dày. Hŏng bruă anei, kâo buh boh tŭ dưn jing bruă mtao Hùng lŏ čuê bruă mtao kơ Lang Liêu kyua mâo klei thâo, mâo klei khăp kơ amĭ ama leh anăn mbruă hlăm klei mă bruă. Mơ̆ng anăn dưi bi myuôm ai tiê mbruă hlăm klei mă bruă mơ̆ng mnuih Việt Nam. Kâo ăt ktưn hưn kơ knhuahgru djuê ana pô hĭn”.

Hluê si Nguyễn Văn Lợi, k’iăng khua kiă kriê sang hră gưl 2 Nguyễn Văn Cừ, Ƀuôn Ama Thuôt, čar Dak Lak, bruă mtô kơ hƀuê ênuk leh anăn knhuah gru mơ̆ng sang hră ară anei jing lu jơr. Êngao kơ hdră knhuah gru jing nao bi kƀĭn, myơr brui mgưi ti sang bi hdơr kơ mtao Hùng, hlăm ênuk mrâo ăt mâo lu hdră đru kơ hđeh sang hră ksiêm hriăm kơ phŭn agha djuê  ana:

      “Mtô kơ diñu mđing kơ phŭn agha, thâo kơ êrah Lạc Hồng leh anăn mtô kơ diñu klei thâo hdơr kơ aduôn aê mâo ai rŭ mdơ̆ng lăn čar leh anăn răng mgang lăn čar leh anăn čiăng kơ diñu thâo ƀuh bruă klam rŭ mdơ̆ng lăn čar. Bruă mtô mjuăt anei jing kluôm, mkŏ mjing kơ diñu klei hơ̆k kdơ̆k, mkŏ mjing klei hơ̆k mơak êjai diñu nao sang hră”.

Hŏng dŭm mta hriăm êngao adŭ, hŏng hdră mkŏ mjing lu jơr amâo djŏ knŏng đru kơ hđeh sang hră Dak Lak thâo hĭn kơ hƀuê ênuk ƀiădah lŏ mjuăt hriăm klei mă bruă êpul, ai tiê bi mguôp leh anăn klei hdơr knga hŏng phŭn agha djuê ana. Anei jing dŭm boh tŭ dưn yuôm bhăn đru kơ diñu ksul mbŭ ai tiê khăp kơ lăn čar, lŏ čuê knhuah gru “Mnăm êa hdơr kơ hnoh” mơ̆ng djuê ana Việt Nam./.