Hlăm 2 klei bi blah bi  kdơ̆ng Prăng leh anăn Mi, sang yơng Ô chumaram Prếk Chếk, să Vĩnh Quới, wăl krah Ngã Năm jing anôk rông mdăp lu phung ngă bruă krŭ kdơ̆ng. Sang yơng mâo lu blư̆ tuôm hŏng phung roh mplĕ ƀom, bi rai. Hruê anei, sang yơng Ô chumaram Prếk Chếk jing leh klei bi mklă kơ hƀuê ênuk kdrưh kơăm mơ̆ng lĭng kahan leh anăn mnuih ƀuôn sang Sóc Trăng. Hlăm wưng êgao, čar Sóc Trăng mâo leh lu hdră êlan bi liê, mkra mđĭ, đru răng kriê, mđĭ lar hŏng ênoh yuôm hƀuê ênuk anei. Sang yơng ăt dưi dăp anăn jing anôk kriê pioh dhar kreh gưl čar hlăm thŭn 2008. Đại đức Sơn Phước Lợi, Khua kiă kriê Ô Chumaram Pkếk Chếk brei thâo:

Bruă sang čư̆ êa alŭ wăl, gưl bruă să leh anăn gưl čar mđing uêñ mkŏ mjing anôk sang phŭn. Čar đru leh êbeh 1 êklai prăk, hlăm anăn snăn phung mă bruă mtrŭt mjhar mnuih ƀuôn sang hlăm ƀuôn leh anăn phung yơng jĕ giăm taih kbưi đru mguôp thiăm.

Wĭt să Vĩnh Quới hlăm dŭm hruê anei, jăk snăk kơ klei bi mlih mơ̆ng sa krĭng ƀuôn sang dleh dlan, ară anei jing ƀuôn sang mrâo bi hmô. Anôk bruă nah gŭ mơ̆ng krĭng ƀuôn sang dưi bi liê, êlan klông mkŏ mơ̆ng să truh kơ ƀuôn sang leh anăn alŭ mkăn. Dŭm ktuê êlan adôk dưi dăp pui mtrang; sang hră, anôk bruă mdrao mgŭn, sang dhar kreh dưi bi mkra mđĭ. Mơ̆ng anăn, ba klei hdĭp mnơ̆ng dhơ̆ng, ai tiê mnuih ƀuôn sang amâo mdưi mđĭ, prăk hrui wĭt kah knar grăp čô mâo 73 êklăk prăk/čô/thŭn, ênoh gŏ êsei ƀun lu tĭng bi hrŏ adôk  2,39%.

Lâm Ở, ti să Vĩnh Quới kah mbha, hŏng knơ̆ng kdơ̆ng êa, anôk pom êa đru mkra mjing mâo boh tŭ dưn lu.

Ară anei bruă pla mdiê găl jăk lu, kyua Vĩnh Quới anei mâo guê gang êa kjăp, mâo anôk pom êa, mdiê mâo ênoh, tiu ba čhĭ ăt ênưih mơh, mjeh jăk mơh. Ară anei mkra mjing lu hŏng kdrăp mnơ̆ng anăn mnuih ƀuôn sang suaih snăk, amâo guôn lŏ mă bruă ktrŏ msĕ si êlâo ôh.

 Hlăm dŭm thŭn êgao, čar Sóc Trăng mđing uêñ gĭt gai nanao dŭm dhar bruă, dŭm gưl hmao pŏk ngă hdră êlan djuê ana, kƀĭn hlue ngă bi jăk dŭm hdră êlan, hdră bruă mđĭ kyar bruă duh mkra-ala ƀuôn krĭng mnuih djuê ana Khmer. Kyua anăn, boh klei bruă duh mkra - ala ƀuôn krĭng mnuih djuê ƀiă lŏ dơ̆ng mâo knhuang đĭ kyar, klei hdĭp mnơ̆ng dhơ̆ng ai tiê dưi mđing uêñ, bruă mdrao mgŭn, mtô bi hriăm, dhar kreh, ala ƀuôn mâo lu klei bi mlih jăk.

Châu Thành jing kdriêk mâo giăm mkrah wah ênoh mnuih ƀuôn sang jing mnuih Khmer. Ară anei klei hdĭp mnuih ƀuôn sang amâo mdei mđĭ kyar. Jing kdriêk mâo klei găl kơ bruă lŏ hma, čiăng mđĭ prăk hrui wĭt kơ mnuih ƀuôn sang, Châu Thành kƀĭn mđĭ ktang hlue si mđĭ ênoh yuôm leh anăn mđĭ kyar hơĭt kjăp. Lu gru hmô  tŭ dưn dưi mkŏ mjing, msĕ si pla kmŭn tuk, pla djam tam hlăm wăl ñuăl… dŭm gru hmô rông mnơ̆ng hlue si hdră bruă mrâo krĭp… Kyua anăn, ênoh yuôm mkra mjing kah knar mâo 152 êklăk prăk 1 ha thŭn 2023; prăk hrui wĭt kah knar grăp čô mnuih ƀuôn sang krĭng ƀuôn sang mâo giăm 61 êklăk prăk.

Nguyễn Văn Mỹ, K’iăng Khua Knơ̆ng bruă sang kdriêk Châu Thành, brei thâo, leh lu thŭn gĭr ktưn, knhal jih thŭn dih, kdriêk tŭ yap leh djăp krĭng ƀuôn sang mrâo. Boh nik, ênoh gŏ êsei ƀun leh anăn giăm ƀun hrŏ knŏng adôk 3%.

Kdriêk kƀĭn iêô mkrum  dŭm klei găl, êlâo hĭn jing dŭm hdră bruă, hlăm anăn mâo dŭm hdră kơ krĭng ƀuôn sang mrâo, hdră kơ  mnuih djuê ƀiă, bi mklă 2 hdră anei đru leh msĕ si mdơ̆ng anôk bruă nah gŭ krĭng ƀuôn sang, đru kơ mnuih ƀuôn sang ngă mjeh, kdrăp mnơ̆ng, ngă gru hmô mkra mjing, leh anăn đru kơ mnuih ƀuôn sang kơ hdră êlan bi hrŏ ƀun, đru kơ mnuih ƀuôn sang kơ hră ênua mdrao mgŭn, mtô bi hriăm, hdră êlan mđĭ lar leh tŭ dưn đru lu snăk kơ mnuih ƀuôn sang gĭr ktưn tlaih ƀun, êngao anăn snăn ai tiê mnuih ƀuôn sang mâo klei gĭr ktưn tlaih ƀun ăt jing sa hlăm dŭm klei êdah êdi mơ̆ng kdriêk.

Hŏng klei gĭr mơ̆ng alŭ wăl leh anăn ai tiê gĭr ktưn mnuih ƀuôn sang, krĭng ƀuôn sang čar Sóc Trăng, boh nik jing krĭng mnuih djuê ƀiă Khmer dôk grăp knhuang bi mlih, hlai mbĭt hlăm klei bi mlih mrâo mơ̆ng ƀuôn sang, lăn čar hruê anei./.