Hlăm êpul mrô 6, ƀuôn hgŭm Tân Lợi, ƀuôn prŏng Ƀuôn Ama Thuôt- anôk mâo êbeh 1000 gŏ sang, bruă hâo hưn, mă klei blŭ mguôp dưi ngă jak, hrăm mbĭt leh anăn mâo klei sa ai mơ̆ng mnuih ƀuôn sang. Nguyễn Ngọc Thịnh, khua êpul mă klei blŭ mguôp brei thâo:

“Hmei ngă klei hâo hưn hlăm kdrăp hâo hưn yang ƀuôn, mbĭt anăn hưn ti anôk bi kƀĭn êpul. Truh kơ wưng anei, mnuih ƀuôn sang hmei hơ̆k mơak, sa ai hŏng hdră êlan prŏng mơ̆ng Đảng leh anăn knŭk kna hlăm bruă mkŏ dăp, bi khuăt mnuih mă bruă, leh anăn hmăng hmưi hdră bruă anei dưi tŭ jing”.

Ti dŭm ƀuôn sang, mnuih ƀuôn sang dŭm djuê ana ăt bi êdah klei uêñ mĭn hŏng hdră êlan anei. Y- Rul Niê, ti ƀuôn Pôč A, kdriêk Čư̆ Mgar brei thâo, mnuih ƀuôn sang ăt ƀuh dŭm klei dleh dlan wưng mrâo bi mŭt mbĭt, ƀiădah ăt đăo knang alŭ wăl pô srăng jăk hĭn.

“Să anei hŏng să dih jing kbưi êdi, bi mŭt mbĭt lŏ prŏng hĭn êjai, mnuih ƀuôn sang êrô êbat mă bruă ăt dleh dlan mơh. Ti anăp dŭm klei dleh dlan ƀiădah tơdah ngă jăk srăng tŭ jing.”

Hŏng lu mnuih ƀuôn sang, klei đăo knang leh hmăng hmưi amâo djŏ knŏng ti gưl čả, gưl să, ƀiădah wăt dŭm klei hmăng hmưi mđĭ kyar bruă duh mkra – ala ƀuôn mlir krĭng. Ayŏng Huỳnh Trần Minh Đức ti ƀuôn prŏng Ƀuôn Ama Thuôt brei thâo:

 “Tơdah bi mŭt Dak Lak hŏng Phú Yên srăng mkŏ mjing klei mkŏ krĭng ktang. Bruă duh mkra êa ksĭ bi mguôp hŏng bruă lŏ hma mơ̆ng Lăn Dap Kngư srăng mkŏ mjing klei đĭ kyar hơĭt kjăp. Mnia mblei, logistics srăng găl lu hĭn.”

Bi Nguyễn Ngọc Hiên, ti ƀuôn hgŭm Tân Lợi, bi mguôp hŏng dua čar, Dak Lak leh anăn Phú Yên bi êdah:

 “Ƀuôn amĭ kâo ti Phú Yên, hdĭp ti Dak Lak mơ̆ng điêt. Ară anei dua čar bi mŭt mbĭt kâo hơ̆k êdi. Dak Lak mâo čư̆, mâo dliê, mâo êa ksĭ – bi mguôp srăng jing ktang êdi, ba lăn čar drei đĭ kyar jăk hĭn.”

Êngao kơ bruă sa ai hŏng hdră êlan prŏng kơ klei mkŏ dăp, bi mŭt anôk bruă knŭk kna, mnuih ƀuôn sang Dak Lak ăt bi mguôp klei blŭ kơ dŭm klei yuôm bhăn hĭn hŏng bruă knuă druh hlăm bruă sang čư̆ êa dua gưl anăp anei. Hồ Hồng, ti să Quảng Tiến, kdriêk Čư̆ Mgar brei thâo:

“Kâo dôk bi mĭn, ară anei bi mŭt mbĭt lu sơnăn lŏ wĭt dăp pruê̆ msĕ hŏng ênuk hđăp mơ̆ hĕ. Kyuanăn kâo hmăng hmưi tơdah bi mŭt mbĭt srăng ngă kreh knhâo, mlih mrâo klei ngă hră mơar knŭk kna, ngă bruă khuăt hĭn.”

Nguyễn Thị Xuân, ti Ƀuôn Ama Thuôt ăt lač bruă mkŏ dăp jing djŏ ƀiădah tŭ jing sĭt ăt čiăng mâo knuă druh tŭ jăk.

 Kâo ƀuh hdră êlan bi mŭt mbĭt jing djŏ. Mnuih ƀuôn sang sa ai. Hmăng hmưi knŭk kna ruah phung knuă druh mâo klei thâo, mă bruă tŭ dưn čiăng kơ mnuih ƀuôn sang ƀrư̆ hruê ƀrư̆ trei mđao, yâo mơak.”

Bruă mkŏ dăp, bi mŭt mbĭt anôk bruă knŭk kna jing knhuang yuôm bhăn hlăm bruă bi mlih mrâo bruă knŭk kna hŏng hdră khuăt, tŭ dưn. Klei sa ai, đăo knang leh anăn klei hmăng hmưi mơ̆ng mnuih ƀuôn sang jing boh kdrŭt čiăng kơ dŭm gưl bruă knŭk kna hluê ngă tŭ jing hdră êlan anei, ba lăn čar ƀrư̆ hruê ƀrư̆ đĭ kyar hơĭt kjăp.