Knhal jih hruê kăm êgao, bruă sang čư êa să Ea Tul, kdriêk Čư̆ Mgar, čar Dak Lak mkŏ mjing Hruê knăm jih jang mnuih ƀuôn sang răng mgang klei êđăp ênang lăn čar thŭn 2023. Nao hlăm knăm mơak mâo k’iăng Khua knŭk kna Trần Lưu Quang, pô bi ala Phŭn bruă kahan ksiêm, bruă Đảng čar, bruă sang čư êa čar Dak Lak mbĭt hŏng dŭm knơ̆ng, dhar bruă, alŭ wăl.

Dŭm thŭn êgao, hdră jih jang mnuih ƀuôn sang răng mgang klei êđăp ênang lăn čar ti să Ea Tul dưi hluê ngă ti djăp ƀuôn êlan leh anăn dưi mâo lu boh tŭ dưn klă klơ̆ng. Dŭm mta bruă djuê ana, klei đăo, klei êđăp ênang krĭng ƀuôn sang dưi rơ̆ng kjăp, phung ngă soh dưi mkhư̆, lŏ dơ̆ng rơ̆ng kjăp alŭ wăl amâo mâo matuĭ, amâo mâo klei truh hlăm êlan klông, bruă sang čư êa mâo klei bi mguôp, ngă bruă kyua mnuih ƀuôn sang, mnuih ƀuôn sang bi mguôp, đăo knang kơ Đảng, knŭk kna. Y-Uôt Ayŭn – khua bruă Đảng să Ea tul, kdriêk Čư̆ Mgar brei thêo, ară anei 10 ƀuôn leh anăn sa alŭ dưi dưm camera ktuê dlăng, leh anăn mkŏ mjing êpul kriê dlăng. Y-Uôt Ayŭn kah mbah klei hriăm mơ̆ng hdră jing jang mnuih ƀuôn sang răng mgang klei êđăp ênang lăn čar ti să hlăm wưng êgao. “Hlăm wưng êgao, kahan ksiêm thơ̆ng kơ bruă wĭt ti să dưi đru mkŏ mjing dŭm êpul kriê dlăng, grăp mlam nao gak răng čiăng rơ̆ng kơ klei êđăp ênang hlăm alŭ wăl. Kyuanăn ti alŭ wăl ka mâo ôh sa mta klei tlĕ mnơ̆ng dhơ̆ng. Êngao kơnăn, êpul êya ngă bruă lŏ hur har mtrŭt mjhar phung mda asei, phung hđeh sang hră mâo knuih hdĭp jăk, hur har, kriê dlăng phung ngă soh hlăm alŭ wăl.”

Nao hgŭm hlăm knăm mơak, k’iăng Khua knŭk kna Trần Lưu Quang čih yap, pah mni leh anăn yap yuôm bhăn dŭm boh tŭ dưn mơ̆ng Bruă Đảng čar, bruă sang čư êa leh anăn mnuih ƀuôn sang să Ea Tul dưi mâo leh hlăm wưng êgao. K’iăng Khua knŭk kna hmăng hmưi bruă Đảng, bruă sang čư êa leh anăn mnuih ƀuôn sang să Ea Tul lŏ dơ̆ng bi lar ai tiê bi mguôp, čŏng pô hlăm hdră jih jang mnuih ƀuôn sang răng mgang klei êđăp ênang, klă mgač hlăm bruă bi kdơ̆ng hŏng klei soh čhuai, bruă bi kdơ̆ng hŏng Đảng, knŭk kna leh anăn bi luč klei bi mguôp djuê ana ti alŭ wăl să, wăt kơ kluôm čar Dak Lak, čiăng đru mkŏ mjing yang ƀuôn mâo hdră bhiăn, êđăp ênang, răng mgang klei hdĭp êđăp ênang mnuih ƀuôn sang. K’iăng Khua knŭk kna Trần Lưu Quang mtă kơ bruă Đảng, bruă sang čư êa leh anăn mnuih ƀuôn sang să Ea Tul dŭm mta msĕ sơnei: “Lŏ dơ̆ng hyuă kjăp, hluê ngă tŭ dưn dŭm klei gĭt gai mơ̆ng gưl dlông kơ bruă jih jang mnuih ƀuôn sang răng mgang klei êđăp ênang lăn čar. Bi lar bruă klam nao êlâo mơ̆ng êpul kahan ksiêm thơ̆ng kơ bruă, mặt trận čar kwar, dŭm êpul êya ksiêm dlăng jêñ jêñ, mtrŭt mjhar čiăng mgaih msir dŭm klei dleh kpăk čiăng dưl hluê ngă tŭ dưn hdră anei. Ba hdră anei nao êlam hĭn, klă klơ̆ng leh anăn tŭ dưn hĭn, čiăng kơ mnuih ƀuôn sang hur har nao hgŭm.”

Mrâo anei, aduôn Trương Thị Ngọc Ánh, k’iăng khua dhar bruă gưl dlông mặt trận čar kwar Việt Nam ăt nao hgŭm hlăm hruê knăm jing jang mnuih ƀuôn sang răng mgang klei êđăp lăn čar ti să Ngọc Wang, kdriêk Đăk Hà, čar Kon Tum. Hlăm wưng êgao, Êpul gĭt gai bruă gang mkhư̆ phung ngă soh, klei amâo mâo jăk hlăm yang ƀuôn leh anăn mkŏ mjing hdră jih jang mnuih ƀuôn sang răng mgang lăn čar ti kdriêk Đăk Hà dưi hưn mdah leh hŏng Bruă Đảng kdriêk, bruă sang čư êa kdriêk hluê ngă tŭ dưn dŭm klei gĭt gai mơ̆ng gưl dlông leh anăn čar Kon Tum hlăm bruă anei. Kdriêk Đăk hà mkŏ mjing leh 188 mmông hâo hưn kơ bruă jih jang mnuih ƀuôn sang răng mgang klei êđăp ênang lăn čar kơ êbeh 37.000 gưl cô. Mnuih ƀuôn sang mkăp brei kơ kahan ksiêm 70 klei hưn mâo ênoh, čŏng pô ba jao dŭm mta phao ktuang čŏng mkra mjing leh anăn mnơ̆ng thâo mtuh.

Blŭ hlăm knăm mơak, aduôn Trương Thị Ngọc Ánh, k’iăng khua dhar bruă gưl dlông mặt trận čar kwar Việt Nam yap yuôm bhăn dŭm boh tŭ dưn mơ̆ng kdriêk Đăk Hà dưi mâo leh hlăm bruă hâo hưn, mtrŭt mkhar leh anăn mtrŭt mjhar hdră jing jang mnuih ƀuôn sang răng mgang klei êđăp ênang lăn čar. Mñă klă boh tŭ dưn yuôm bhăn mơ̆ng hdră anei hŏng anei êđăp ênang alŭ wăl. Ti anăp boh klei phung bi kdơ̆ng bi mguôp hŏng dŭm êpul êya mơ̆ng tač êngao ngă klei kčŭt mčhur, bi rai klei bi mguôp djuê ana, leh anăn mâo dŭm mta bruă bi rai knŭk kna yang ƀuôn, aduôn Trương Thị Ngọc Ánh lač: “Êpul gĭt gai lŏ dơ̆ng mđĭ hĭn klei đru kčĕ čiăng gưl bruă Đảng nah gŭ mâo dŭm hdră êlan, klei gĭt gai ktang hĭn hŏng hdră bruă. Dŭm mta bruă mơ̆ng anôk bruă hlăm êpul gĭt gai srăng klă hŏng hdră mđing kơ nah gŭ, kjăp hŏng alŭ wăl, thâo klă boh sĭt, hmao thâo klă dŭm klei hmăng hmưi, klei čiăng leh anăn mgaih msir dŭm klei akâo djŏ mơ̆ng dŭm gưl mnuih ƀuôn sang. Mtă kơ jih jang drei srăng ngă jăk bruă hâo hưn, kah mbha klei bhiăn ala čar hŏng mnuih ƀuôn sang.”